ආණ්ඩුවේ ලොකු ලොක්කන් එක්ව මුළු රටම මිනී පෙට්ටියට දමා ඇති බවත්, දැන් ඔවුන් අවසන් ඇණ ටික ගසමින් සිටින බවත් කබ්බ්රාල් රටත්, ආර්ථිකයත් සුසාන භූමිය කරා රැගෙන යන්නට පාර කපන බවත් විපක්ෂ නායක සජිත් ප්රේමදාස මහතා පැවසීය. රටේ යමක් ඉතිරිව ඇත්නම් ඒ ටිකක් විකුණා දමන්නට මොල හතානෝ කටයුතු කරන බවද ඒ මහතා කීය.
“අද වනවිට ආශ්චර්යයි සෞභාග්යයයි දෝර ගලනවා. ලිපට දාන දර ටික සුපර්මාකට්වල විකුනනවා. ගෑස් ටික පිපිරෙනවා. දියර පොහොර කෑන් පුපුරනවා. ගහන ගැසට් රිවස් කරනවා, දිවා රෑ නොබලා සල්ලි අච්චු ගහනවා. රට ගොඩ නැගීමෙන් අසමත් ආණ්ඩුව රට ෆේල් කිරීමෙන් පමණක් සමත් වී ඇතැයි” ද විපක්ෂ නායකතුමා පැවසීය.
මෙහිදී ජනතාව පැවසුවේ ‘දැන් හරිනේ… ඔය දෙන්නෙ හොඳට…! ඔය ටික කරගන්නනේ දැඟලුවේ! දැන් දුන්න එකෙක් නෑ මහත්තයෝ…! අපි දුක් විඳිනවා!’ යැයි කියාය.
විපක්ෂ නායක සජිත් ප්රේමදාස මහතා ඊයේ (31) ජනදුක විමසන “මනුශ්යත්වයේ චාරිකාව” ආරම්භ කළේ තිස්සමහාරාම නගරයේ ජනතාව හමුවට යමිනි. නගරයේ ජනතාව මෙන්ම වෙළඳුන් සමඟ ඔවුන්ගේ ගැටලු පිළිබඳව සාකච්ඡා කළ විපක්ෂ නායකතුමා, රටේ වර්තමාන තත්ත්වය අලලා සකස් කොට තිබූ “පවුල් පාලනය රටේ විනාශය” කැමති අත්පත්රිකාව ද ඔවුන් අතර බෙදා දුන්නේය.
