අතීත ගැටුමේ උරුමය ආමන්ත්රණය කිරීම, වින්දිතයින් සඳහා පිළිගැනීම් සහතික කිරීම සහ වගවීම, සංහිඳියාව සහ මානව හිමිකම් පෝෂණය කිරීම සඳහා වූ එක්සත් ජාතීන්ගේ රාමුවට තවදුරටත් සහාය නොදීමට ශ්රී ලංකා රජය ගත් තීරණය ගැන යුරෝපා සංගමය සිය කනගාටුව ප්රකාශ කර තිබේ.
46/1 කවුන්සිල යෝජනා අනුව සංහිඳියාව, වගවීම සහ මානව හිමිකම් සඳහා අඛණ්ඩ උත්සාහයක අවශ්යතාවය ද යුරෝපා සංගමය අවධාරණය කළේය.
“අතුරුදහන් වූ තැනැත්තන් පිළිබඳ කාර්යාලයේ සහ වන්දි ගෙවීමේ කාර්යාලයේ ඵලදායී වැඩ කටයුතු සහතික කිරීම ඇතුළුව තිරසාර සංහිඳියා ක්රියාවලියක් පවත්වා ගෙන යාම සඳහා ශ්රී ලංකා රජයේ ප්රකාශිත අභිප්රාය යුරෝපා සංගමය සටහන් කරන අතර ඒ සම්බන්ධයෙන් සිය කැපවීම් ක්රියාත්මක කරන ලෙස රජයෙන් ඉල්ලා සිටී.”යුරෝපා සංගමය වෙනුවෙන් ස්ලෝවේනියා ජනරජයේ නිත්ය නියෝජිත තානාපතිනි ඇනිටා පිපාන් මහත්මිය අද එක්සත් ජාතීන්ගේ මානව හිමිකම් සැසිවාරයේදී පැවසීය.
ත්රස්තවාදය වැළැක්වීමේ පනත ජාත්යන්තර සම්මතයන් හා මානව හිමිකම් ප්රමිතීන්ට අනුකූලව සංශෝධනය කිරීමේ වැදගත්කම යුරෝපා සංගමය දිගින් දිගටම අවධාරණය කරන බව ද ඇය පැවසුවාය.
“46/1 යෝජනාව සම්බන්ධයෙන් මෙන්ම ජාත්යන්තර හවුල්කරුවන් සමඟ ද එක්සත් ජාතීන් සමඟ අඛණ්ඩව කටයුතු කරන ලෙස යුරෝපා සංගමය විසින් ශ්රී ලංකා රජයට දිරිගන්වන අතර පාලනය, නීතියේ ආධිපත්යය, බලය බෙදා හැරීම සහ මානව හිමිකම් පිළිබඳ සංවාදය තවදුරටත් ශක්තිමත් කිරීමේ අරමුණින් ශී්ර ලංකාවේ උත්සාහයට අඛණ්ඩව සහයෝගය ලබා දෙනු ඇත” යනුවෙන් ඇය තවදුරටත් පැවසුවාය.
