ඇවිදින මංතීරුව ඉදිකිරිම වෙනුවෙන් දැනට ඉවත් කර ඇති පරාක්රම සමුද්රයේ රළපනාව එළඹෙන 25 වනදා වන විට යළි පිළිසකර කිරීමට කටයුතු කළ යුතු බව ගොවි සංවිධාන අවධාරණය කරති.
පොළොන්නරු දිස්ත්රික් ඒකාබද්ධ ගොවි සංවිධාන මේ බව අවධාරණය කළේ , මාධ්ය හමුවක් කැඳවමිනි.
පොළොන්නරු දිස්ත්රික් ඒකාබද්ද ගොවි සංවිධානය සභාපති ජගත් චන්ද්රකීර්ති මහතා අවධාරණය කර සිටියේ, 25 වන දා වනවිට ඉවත් කර ඇති රළපනාව යළි පිළිසකර නොකළ හොත් සියලුම ගොවීන් යම් තීන්දුවකට එළඹෙන බවත් එම තීන්දුව කුමක් ද යන්න එදිනට දැනගත හැකි වනු ඇති බවත් ය.
”වැව් බ්න්ට් එකේ මේ මංතීරුව හදන්න යන්නේ ගොවියන්ට ඉල්ලන සහන නැතිව. හිතාගන්නකෝ මොකද්ද අපේ රටේ තත්ත්වේ කියලා. ඒ කරලා කියනවා අරක නෑ. මේක නෑ. කන්න නෑ. මිනිස්සුන්ට හැබැයි ජොගින් කරන්න සල්ලි අපි මේක හදන්න දෙන්නේ නෑ. කියලා කියුවා එපා කියලා කියුවා. දැනට නතර කරලා තියෙනවා. අපේ මේ මාසේ 25 වෙනකන් කිසි දෙයක් කරන්නේ නෑ. බලන් ඉන්නවා. 25 වැනිදා වෙනකොට සම්සථ ගොවි සංවිධාන ගොවියෝ සියල්ලම යම් තීන්දුවකට එනවා. තීන්දුව මොකද්ද කියලා අපි එදාට කියන්නම්. 25 වෙන කොටවත් මේක නැවත පිළිසකර කරගන්න ඕන”
මේ අතර අලුත්වැව බෙදුම්ඇල ගොවි සංවිධානය පවසන්නේ, මේ වෙනුවෙන් ගොවි ජීවිත පූජා කිරීමට හෝ සූදානම් බවයි.
අලුත්වැව බෙදුම්ඇල ගොවි සංවිධානයේ සභාපති පී.කේ.ඩී. චන්ද්රකීර්ති මහතා අද මාධ්ය හමුවේදී කළ ප්රකාශයයි.
”රොෂාන් ඇමතිවරයා කියනවා තිබ්බ අඩිය පස්සට ගන්නේ නෑ කියලා. අපි කියනවා ගොවියෝ විදියට මේකේ මැරි මැරී උපදින අපි, වකුගඩු හැදිලා සර්පයෝ ගහලා මැරෙන අපි, අලි ගහලා මැරෙන අපි, අපි ඕකට බය නෑ. ගොවි ජීවිත ගණනාවක් බන්ට් එක උඩ අපි පූජා කරන්න ලෑස්තියි. ඒක කරන්න දෙන්නේ නෑ. අපේ හදවත වැව”
ගැමුණු ගොවි සංවිධානය ද අවධාරණය කරන්නේ, දිවි පරදුවට තබා හෝ වැවේ අයිතිය වෙනුවෙන් සටන් කරන බවයි.
එහි සභාපති ලලිත් ප්රියදර්ශන මහතා පැවසුවේ, එය රටේ මුලුමහත් ගොවි ජනතාව වෙනුවෙන් ම සිදු කරන ප්රකාශයක් බවයි.
”මුළු මහත් ලංකාවේ ගොවි ජනතාව වෙනුවෙන් මේ ප්රකාශය කරන්නේ. වී මිල වෙනුවෙන් පොහොර සහනාධාරය වෙනුවෙන් වැවේ අයිතිය වෙනුවෙන් සටන් කරලා අපේ ජීවිත ගියත් අපි බය නෑ. අපි සටන් කරනවා”
