ඉදිරි දින කිහිපය ඇතුළත පාර්ලිමේන්තු මන්ත්රීවරයකු ලෙස දිව්රුම් දීමට නියමිත බැසිල් රාජපක්ෂ මහතාට ලබා දෙන අමාත්ය ධූරය සහ විෂයයන් සම්බන්ධයෙන් වන අවසන් තීන්දුව ජනාධිපති ගෝඨාභය රාජපක්ෂ මහතා වෙත පවරාගෙන ඇති බව දැනගන්නට ඇත.
මේ සම්බන්ධයෙන් ඊයේ දින ජනාධිපතිවරයා, අගමැතිවරයා සහ බැසිල් රාජපක්ෂ මහතා අතර පැවැති සාකච්ජාවේදී මෙම තීන්දුව ගෙන ඇති බව දේශපාලන ආරංචි මාර්ග සදහන් කරයි.
මෙම රැස්වීම මුලින්ම අරලිය ගහ මන්දිරයේ පැවැත්වීමට තීන්දු වී තිබුණද ජනාධිපතිවරයාගේ කාර්ය බහුලත්වය මත එය මිරිහානේ පිහිටි ඒ මහතාගේ නිවෙසේදී පැවැත්වීමට පියවර ගෙන ඇත.
මුලදී සාකච්ජාවට මේ තිදෙනා පමණක් සහභාගී වී ඇතත් සාකච්ජාව අතරමැදදී නාමල් රාජපක්ෂ මහතාද ඊට එක්ව තිබේ.
පසුව ශෂීන්ද්ර රාජපක්ෂ හා නිපුණ රණවක යන මහත්වරුන්ද ඊට සම්බන්ධ වී ඇත.
කෙසේවෙතත් සාකච්ජාවේ මුල් අදියරේදී ආණ්ඩුවේ කටයුතු, ජාත්යන්තර තත්ත්වය ආදී අවශේෂ කරුණු පිළිබදව කතාබහ කෙරී ඇත.
පසුව විනාඩි 5ත් 7ත් අතර කාලයක් තුළ පමණක් බාසිල් රාජපක්ෂ මහතාගේ අමාත්ය ධූරය සම්බන්ධයෙන් සාකච්ජා වී තිබේ.
එහිදී අගමැතිවරයා පවසා ඇත්තේ තමන් සතු ඕනෑම අමාත්යංශයක් හෝ ආයතනයක් බැසිල්ට ලබා දීමට තමන් සූදානම් බවකි.
එමෙන්ම පාර්ලිමේන්තු පැමිණෙන දිනය සහ ඒ සදහා ඉල්ලා අස්වන මන්ත්රීවරයා සම්බන්ධයෙන් බැසිල් රාජපක්ෂ මහතාට තීරණය කරන ලෙසද දැනුම් දී ඇත.
මීට අමතරව බැසිල් රාජපක්ෂ මහතාට ලබා දෙන අමාත්යංශය සහ වීෂයයන් සම්බන්ධයෙන් වූ තීන්දුව ගැනීම ජනාධිපතිවරයා වෙත පවරාගෙන ඇති බවද දැනගන්නට ඇත.
