මරික්කාර් හදිසියේම චන්නට ස්තූති කළේ ඇයි?

සමගි ජන බලවේගයේ කොළඹ දිස්ත්‍රික් පාර්ලිමේන්තු මන්ත්‍රී එස්.එම්. මරික්කාර් මහතා විසින් ඖෂධ නිෂ්පාදනය , සැපයීම හා නියාමන රාජ්‍ය අමාත්‍ය මහාචාර්ය චන්න ජයසුමන මහතා හට විශේෂ ස්තූතියක් පිරිනමා තිබේ.

ඒ, කොලොන්නාව ප්‍රදේශයේ ජනතාවට ස්පුට්නික් එන්නතේ දෙවන මාත්‍රාව නිසි අයුරින් ලබා දීම සම්බන්ධයෙනි.

ඒ පිළිබදව මරික්කාර් මහතා සිය ෆේස්බුක් පිටුවෙහි තබා තිබූ සටහන මෙසේය.

කොලොන්නාව ප්‍රාදේශීය ලේකම් කොට්ඨාසයේ ගොතටුව සෞඛ්‍ය නිලධාරී කොට්ඨාසය තුළ පදිංචි පුද්ගලයන් 14,410ක් සදහා sputnik V එන්නතේ පළමු මාත්‍රාව ලබා දී තිබූ අතර , එහි දෙවන මාත්‍රාව මෙතෙක් නොලැබීම නිසා ජනතාවට ඒ පිලිබදව කුකුසක් ඇතිව තිබේ.

මාගේ ආසනයේ ජනතාවගේ මෙම ගැටලුව පිළිබදව ඖෂධ නිෂ්පාදනය , සැපයීම හා නියාමන රාජ්‍ය අමාත්‍ය මහාචාර්ය චන්න ජයසුමන මැතිතුමාගෙන් විමසීමක් කළ අතර , ඒ අනුව පළමු මාත්‍රාව ලබා ගන්නා අවස්ථාවේදී එන්නත් කාඩ්පතෙහි මාසයක කාලයක් තුළ දෙවන මාත්‍රාව ලබා දෙන බව සටහන්ව ඇති බැවින් මෙය අනිවාර්යයෙන් ලබාදිය යුතු බව එතුමාට දැන්වූ අතර, ඒ අනුව එතුමා පෞද්ගලිකව මැදිහත් වී කොලොන්නාව ප්‍රාදේශීය ලේකම් කොට්ඨාසය තුළ sputnik V එන්නත ලබාගත් පුද්ගලයන් 14,410 සදහා දෙවන මාත්‍රාව එළබෙන සිකුරාදා දින දිවයිනට ලැබෙන බවත්, ඒ අනුව එම 14,410 සදහා sputnik V එන්නතේ දෙවන මාත්‍රාව ලබාදෙන බවත් අද දින මා වෙත දැනුම් දුනි.

එබැවින් කොලොන්නාව ආසනයේ ජනතාව වෙනුවෙන් එම ප්‍රදේශය නියෝජනය කරන පාර්ලිමේන්තු මන්ත්‍රීවරයා ලෙස, ඖෂධ නිෂ්පාදනය , සැපයීම හා නියාමන රාජ්‍ය අමාත්‍ය මහාචාර්ය චන්න ජයසුමන මැතිතුමා වෙත මාගේ ස්තුතිය පුද කරමි.