76 හැවිරිදි මුස්ලිම් සහෝදරත්වයේ (Muslim Brotherhood) නායක මහමුද් එසාත්ට එරෙහිව නැගුනු ත්රස්තවාදී චෝදනා මත ඊජිප්තු අධිකරණය විසින් ඔහුට ජීවිතාන්තය දක්වා සිර දඬුවම් නියම කළ බව එරට රජය විසින් මෙහෙයවන අල් අහ්රාම් පුවත්පත වාර්තා කර ඇත.
ඊජිප්තු ජනාධිපති මොහොමඩ් මොර්සි 2013 වසරේ ජුලි මාසයේ දී නෙරපා දැමීමෙන් පසු ප්රචණ්ඩත්වය සම්බන්ධ ත්රස්තවාදී චෝදනා මත එසාත් වරදකරු කරනු ලැබීය.
පසුගිය වසරේ අගෝස්තු මාසයේදී කයිරෝ නුවරදී එසාත් අත්අඩංගුවට ගනු ලැබීය.
මුස්ලිම් සහෝදරත්වයේ (Muslim Brotherhood) ආධාරකරුවන් සහ විරුද්ධවාදීන් අතර ගැටුම්වලදී ආයුධ සැපයීමේ චෝදනාවට එසාත් වැරදිකරු විය. එමෙන්ම. මුස්ලිම් සහෝදරත්වයේ සතුරෙකු වන හිටපු රජයේ නීතිපති ජෙනරාල් හිෂාම් බරකට් ඝාතනය කිරීමට අනුබලදී ඇති බවට ඔහුට චෝදනා එල්ල විය.
මීට පෙර 2015 දී එසාත්ට මරණීය දණ්ඩනය සහ ජීවිතාන්තය දක්වා සිර දඬුවම් නියම කර තිබූ අතර, ඔහු අගෝස්තු මාසයේ අත්අඩංගුවට ගැනීමෙන් පසු නැවත නඩු විභාගය පවත්වා ඇත.
ඔහු 2013 සිට ඊජිප්තුවේ මුස්ලිම් සහෝදරත්වයේ (Muslim Brotherhood) වැඩබලන නායකයා ලෙස සේවය කර ඇත. 1928 දී ඊජිප්තු නගරයක් වන ඉස්මයිලියා හි හසන් අල්-බන්නා විසින් ආරම්භ කරන ලද මුස්ලිම් සහෝදරත්වය (Muslim Brotherhood) ඊජිප්තු රජය විසින් ත්රස්තවාදී සංවිධානයක් ලෙස සලකනු ලැබේ.
2014 සිට ඊජිප්තුවේ ජනාධිපති ලෙස සේවය කළ යුද හමුදා ජෙනරාල් අබ්දෙල් ෆටා එල් සිසි මුස්ලිම් සහෝදරත්වයේ ආධාරකරුවන්ට එරෙහිව සටන් කිරීම සඳහා විවිධ ක්රමවේදයන් ක්රියාත්මක කර තිබේ. 2013 අගෝස්තු මාසයේදී එල්-සිසිගේ නායකත්වය යටතේ ආරක්ෂක හමුදා විසින් කයිරෝවේ නස්ර් සිටි දිස්ත්රික්කයේ මෝර්සි හිතවාදී සහ මුස්ලිම් සහෝදරත්වයට පෙලපාලි කළ පෙලපාලිකරුවන් සිය ගණනක් ඝාතනය කළහ.
ඊජිප්තු විනිසුරුවන් මෑත වසරවලදී මුස්ලිම් සහෝදරත්වයේ (Muslim Brotherhood) සාමාජිකයින්ට මරණ දඬුවම් සිය ගණනක් නිකුත් කර තිබේ.
