නියෝජ්ය පොලිස්පති බිම්සානි ජයසිංහආරච්චි මහත්මියගේ පත්වීමට එරෙහිව උසස් පොලිස් නිලධාරීන් පිරිසක් අධිකරණය හමුවට යෑම බමුණු වැඩවසම් සමාජ චින්තනයේ වර්තමාන පිළිබිඹුවක් බවත්, එම ක්රියාව තරයේ හෙළා දකින බවත් සමගි වනිතා බලවේගය නිවේදනයක් නිකුත් කරමින් පෙන්වා දී ඇත.
එම සම්පූර්ණ නිවේදනය මෙසේය.
ස්ත්රී – පුරුෂ සමාජභාවය පිළිබඳව මුළු මහත් ලෝකයම වඩාත් ධනාත්මක ස්ථාවරයක සිට කටයුතු කරන මොහොතක ශ්රී ලංකා පොලිසියේ ඇතැම් නිලධාරීන් පිරිසක් පසුගාමී ගෝත්රික සමාජයක මතවාදයක් දක්වා පහතට වැටීම පිළිබඳව අපගේ දැඩි කනස්සල්ල පළ කරමු. ශ්රී ලංකා පොලිස් ඉතිහාසයේ පළමු වරට කාන්තාවකට නියෝජ්ය පොලිස්පති ධුරය දක්වා පැමිණීමට ලැබුණු අවස්ථාවට අප විසින් සැලකිය යුත්තේ පූර්වාදර්ශයක් නොව පරමාදර්ශයක් සැපයූ අවස්ථාවක් ලෙසයි. නියෝජ්ය පොලිස්පති, බිම්ශානි ජයසිංහආරච්චි මහත්මියගේ පත්වීමට එරෙහිව උසස් පොලිස් නිලධාරීන් පිරිසක් අධිකරණය හමුවට යෑම බමුණු වැඩවසම් සමාජ චින්තනයේ වර්තමාන පිළිබිඹුව බව කනගාටුවෙන් වුවත් සඳහන් කරමු.
කාන්තාව පිළිබඳව උත්තරීතර මඟ පෙන්වීම සිදුකළ බුදුරජාණන් වහන්සේ විටෙක සඳහන් කළේ කාන්තාව පිරිමියෙකුට නොදෙවැනිව ක්රියාකිරීමට හැකියාව ඇති බවයි. එවැනි උදාර මඟපෙන්වීම්වලට අනුගතව ක්රියා කරන සමාජය තුළ ‘ධර්මයේ හැසිරෙන්නා ධර්මය විසින් සුරකියි’ යන්න උධෘතය තේමා පාඨය කරගත් ශ්රී ලංකා පොලිසියේ කොටසකගේ මෙම හැසිරීම අතීතය විසින් අප රට පෙන්වාදී ඇති පූර්වාදර්ශ පවා නොසළකා හැරීමකි.
ලොව ප්රථම අගමැතිනිය බිහිවූයේ ශ්රී ලංකාවෙනි. ඉතිහාසය පුරා අපේ රාජාවලියේ රට පාලනය කළ රැජනියන් පිළිබඳව මහාවංශයේද සඳහන් වේ. ප්රජාතන්ත්රවාදී පාලනය තුළ ජනාධිපතිවරියක් ශ්රී ලංකාවෙන් බිහි කිරීමට අප සමත් වීමු. නිදහස් පාර්ලිමේන්තුවේ සිට ව්යවස්ථාදායකයේ මන්ත්රිවරියන්, ඇමැතිවරියන් ලෙස විශාල පිරිසක් කටයුතු කොට තිබේ. ප්රජාතන්ත්රවාදයේ ප්රමුඛ කුළුණක් වන අධිකරණය තුළ අග්රවිනිශ්චයකාරිය පත්කිරීමට ශ්රී ලංකාවේ අපට හැකියාව ලැබුණි.
අමාත්යාංශ ලේකම්වරියන්, විශ්වවිiාල උප කුලපතිවරියන්, බැංකු සේවයේ සභාපතිවරියන්, ප්රධාන විධායක නිලධාරිවරියන්, රේගුව, ආදායම් බදු දෙපාර්තමේන්තුව වැනි වගකිව යුතු ස්ථානවල ප්රධාන නිලධාරිනියන් ලෙස කාන්තාව කටයුතු කිරීමේ ගෞරවණීය පසුබිමක් අප සතුව තිබේ.
නීතිමය අවකාශයක කුඩා හිඩැසක් තුළින් රිංගා යමින් බිම්ශානි ජයසිංහ ආරච්චි මහත්මියට එරෙහිව අධිකරණය තුළ ගොනුකළ පෙත්සම අප දකිනුයේ මෙම ඉතිහාසයට සරදම් කිරීමක් ලෙසයි. සිදුකළ යුත්තේ ඇයගේ පත්වීමට බාධකයක් ඇත්නම් එය ඉවත් කිරීම මිස එය භාවිත කොට එතුමිය තනතුරින් ඉවත් කිරීම නොවන බව සමඟි වනිතා බලවේගය වන අපි අවධාරණය කරමු.
හිරුණිකා ප්රේමචන්ද්ර
ජාතික සංවිධායක
සමගි වනිතා බලවේගය
