බන්ධනාගාර අමාත්යවරයා වශයෙන් වැඩ බාරගැනීමෙන් අනතුරුව ලොහාන් රත්වත්තේ මහතා සිය පළමු රාජකාරිය වශයෙන් ගැටුමින් විනාශ වී ගිය මහර බන්ධනාගාරයේ නිරීක්ෂණ චාරිකාවක නිරත විය.
පසුගිය දින කිහිපයේ යම් කළහකාරී තත්ත්වයක් පැවතුණු බන්ධනාගාරය හොඳින් නිරීක්ෂණය කළ අමාත්යවරයා විනාශ වූ ගොඩනැගිලි හා දේපළ හැකි ඉක්මනින්, නැවත එවැනි ගැටුමක් ඇති නොවන ලෙස යථා තත්ත්වයට පත් කිරීමට බලධාරීන්ට උපදෙස් දුනි.
අනතුරුව බන්ධනාගාරගත රැඳවියන් හමු වී ඔවුන්ගේ ගැටළු පිළිබඳ සොයා බැලූ අතර දැනට බන්ධනාගාර රැඳවියන්ට ඇති ප්රධාන ගැටළුවක් වන 1998 සිට ක්රියාත්මක නොවූ සිව්වස් සමාලෝචන ක්රියාවලිය ක්රියාත්මක කිරීමට ජනාධිපතිතුමා එකඟ වූ බවත් ඉදිරියේදී හැකි ඉක්මනින් මෙය ක්රියාත්මක කරන බවත් දැන්වීය.
තව ද Covid – 19 තත්ත්වය තුළ බන්ධනාගාර භූමිය හා රැඳවියන්ගේ සෞඛ්ය තත්වයන් ආරක්ෂා කිරීම පිළිබඳ විශේෂ වැඩපිළිවෙළක් සකස් කරමින් මහර බන්ධනාගාරය ඇතුළු අනෙකුත් සියළු ම බන්ධනාගාරයන්හි රැඳවියන්ගේ ක්ෂණික ප්රතිදේහ පරික්ෂාව ( Rapid Antigen Test) පරීක්ෂා කඩිනම් කිරීමටත් උපදෙස් ලබා දුනි.
තව ද මේ Covid – 19 තත්ත්වය තුළ තම පවුල්වල සාමාජිකයන් අතර ඇති සම්බන්ධතාවය සඳහා වූ බාධාව තමා තේරුම් ගත් බවත් ඒ සඳහා බන්ධනාගාර රැඳවියන්ගේ පවුල් වල උදවියට ඇති ගැටළු බන්ධනාගාර දෙපාර්තමේන්තුව වෙත දැනුම් දීමට විශේෂ දුරකථන අංකයක් ඉක්මනින් හඳුන්වා දෙන බවත් ප්රකාශ කළේය.
තව ද ශ්රි ලංකාවේ බන්ධනාගාර තුළ පවතින තදබදය අවම කිරීම සඳහා සුළු වැරදි හා දඩ මුදල් ගෙවා ගැනීමට නොහැකි ව බන්ධනාගාරය තුළ සිර වී සිටින නිදහස කළ හැකි සියලු ම රැඳවියන් බන්ධනාගාර කළමනාකරණ හා සිරකරුවන් පුනරුත්ථාපන කටයුතු රජ්ය අමාත්යංශයේමැදිහත් වීමෙන් හා අධීක්ෂනය යටතේ සිදු කිරීමට කටයුතු කරන බවත් මේ තුළින් බන්ධනාගාරවල ඇති තදබදය අවම කිරීමට කටයුතු කෙරේ.
ඒ සමඟ බන්ධනාගාරය තුළ පවතින සනීපාරක්ෂක ප්රශ්නය ද යම්තාක් දුරට විසඳිය හැකි බවත් ගරු අමාත්යතුමා ප්රකාශ කළේය.
පසුගිය දිනවල මහර බන්ධනාගාරය තුළ ඇති වූ ප්රචණ්ඩකාරී තත්ත්වය තුළ බන්ධනාගාරයට හා දේපළවලට සිදු වූ හානියත්, බන්ධනාගාර තුළ ඇති තත්ත්වය ජනතාව දැන ගත යුතු නිසා සිද්ධියට අදාළ රූපරාමු හා ඡායාරූප මාධ්ය වෙත මුදා හරින ලෙසත් බලධාරීන්ට උපදෙස් දුනි.
