තඹුත්තේගම පොලිස් කොට්ඨාසයේ රාජකාරි කටයුතු වඩාත් කාර්යක්ෂම කිරීම සහ අපරාධ විමර්ශන සඳහා නවීන තාක්ෂණික සහය ලබාගැනීමේ අරමුණින් ස්ථාපිත කරන ලද නව ඒකක රැසක් පෙරේදා (28) විවෘත කෙරිණි. Sri Lanka Latest News
පොලිස්පති නීතිඥ ප්රියන්ත වීරසූරිය මහතාගේ ප්රධානත්වයෙන් තඹුත්තේගම පොලිස් අධිකාරි කාර්යාල පරිශ්රයේදී මෙම සමාරම්භක උත්සවය පැවැත්විණි.
මෙහිදී තඹුත්තේගම පොලිස් කොට්ඨාසය සඳහා අලුතින් ඉදි කරන ලද නිල සුනඛ අංශයක්, ඇඟිලි සටහන් ඒකකයක්, විශේෂ කාර්යාංශ ඒකකයක්, දිසා ගබඩාවක් සහ ප්රවර්ධන අංශයක් විවෘත කරන ලදි.
මීට අමතරව එම කොට්ඨාසයේ සේවය කරන කනිෂ්ඨ නිලධාරීන්ගේ සුභසාධනය උදෙසා ඉදි කරන ලද නව භට නිවාසයක් ද පොලිස්පතිවරයා අතින් විවෘත කෙරිණි.
මෙම නව ඒකක ස්ථාපිත කිරීමේ ප්රධාන අරමුණ වන්නේ පොලිස් වසම් තුළ සිදුවන අපරාධ විමර්ශනය සඳහා නවීන තාක්ෂණික සහ විද්යාත්මක ක්රමවේද උපයෝගී කරගැනීමයි. මේ හරහා අපරාධ විමර්ශනයකදී හමුවන ඉතා සියුම් සාක්ෂි පවා නිවැරදිව විශ්ලේෂණය කිරීමට හැකිවන අතර, එමඟින් සැකකරුවන් හඳුනා ගැනීමේ ක්රියාවලිය වඩාත් පහසු වනු ඇත. මෙමඟින් අධිකරණ ක්රියාවලිය වඩාත් ශක්තිමත් කරමින් එහි ඍජු ප්රතිලාභ මහජනතාව වෙත ලබා දීමට පොලිස් දෙපාර්තමේන්තුව අපේක්ෂා කරයි.
මෙම අවස්ථාව සඳහා උතුරුමැද පළාත් ජ්යෙෂ්ඨ නියෝජ්ය පොලිස්පති තිලක් සී. ඒ. ධනපාල, පොලිස් විශේෂ කාර්යාංශ දිසාව භාර නියෝජ්ය පොලිස්පති සම්පත් කුමාර, පොලිස් විශේෂ කාර්යාංශයේ අධ්යක්ෂ ජ්යෙෂ්ඨ පොලිස් අධිකාරි නිශාන්ත චන්ද්රසේකර, නිල සුනඛ අංශයේ අධ්යක්ෂ ජ්යෙෂ්ඨ පොලිස් අධිකාරි කාංචන ගොඩකුඹුර, අපරාධ වාර්තා කොට්ඨාසයේ අධ්යක්ෂ ජ්යෙෂ්ඨ පොලිස් අධිකාරි රුවන් කුමාර, තඹුත්තේගම කොට්ඨාස භාර ජ්යෙෂ්ඨ පොලිස් අධිකාරි චන්දන කන්දෙවත්ත, තඹුත්තේගම ප්රාදේශීය ලේකම් එස්.කේ. සෝමරත්න මහතා ඇතුළු උසස් නිලධාරීහු හා තඹුත්තේගම කොට්ඨාසයේ නිලධාරීහු රැසක්ද සහභාගි වූහ.
