නිල්වන් කඳුවැටි අතරින් නිරන්තරයෙන් මීදුම් සළු තැවරෙන නුවරඑළියේ, ග්රේට් වෙස්ටර්න් කඳු මුදුන සංචාරකයන්ට නම් සොඳුරු පාරාදීසයකි. නමුත්, මීට වසර තුනකට පෙර ඒ සොඳුරු කඳු මුදුන ලෙයින් තෙත් කරමින් සිදුවූ අතිශය අමානුෂික ඝාතනයක සුලමුල සොයා යන්නට මධ්යම පළාත් විශේෂ විමර්ශන ඒකකයේ නිලධාරීන්ට හැකිවී තිබේ.
වසර තුනක් තිස්සේ නීතියෙන් බේරී, වෙස්වළාගෙන සැඟව සිටි මිනීමරුවා අවසානයේ පොලිස් දැලට කොටුවූයේ සැබෑ රහස් පරීක්ෂක කතාවක් සිහිගන්වමිනි.Sri Lanka Latest News
කඳු මුදුනෙන් හමු වූ නාඳුනන සිරුර
ලිඳුල පොලිස් වසමට අයත් ග්රේට් වෙස්ටර්න් කඳු මුදුනේ තිබී මියගිය කාන්තාවකගේ සිරුරක් හමුවන විට, විමර්ශන නිලධාරීන්ට ඇය කවුදැයි හඳුනා ගැනීමට කිසිදු සාක්ෂියක් ඉතිරිව තිබුණේ නැත. මීදුමෙන් සහ වන සතුන්ගෙන් වටවුණු ඒ පාළු පරිසරයේ තිබූ එකම හෝඩුවාව වූයේ ඇයගේ වම් අතෙහි කොටා තිබූ එක්තරා පච්චයක් පමණි.
‘මදුසංඛ’ මියගිය කාන්තාවගේ වම් අතේ සටහන්ව තිබූ ඒ නම, විමර්ශනවල හැරවුම් ලක්ෂ්යය විය. කාන්තාව අතුරුදන් වීම් පිළිබඳ දිවයින පුරා පරීක්ෂා කළ නිලධාරීන්ට, තංගල්ල කිරින්ද ප්රදේශයෙන් තොරතුරක් ලැබිණි. ඒ අනුව පැමිණි ඇයගේ නීත්යනුකූල සැමියා, බිරිඳගේ අතේ තිබූ මෙම පච්චය දැක හඳුනා ගත්තේය. ඇය 36 හැවිරිදි ජුනයිඩ් ක්රිෂාණි නම් කාන්තාවයි.
දුරකතන ජාල විශ්ලේෂණය සහ මාරක අනියම් සබඳතාව
ඇයගේ අනන්යතාව තහවුරු කරගැනීමෙන් පසු ක්රියාත්මක වූ විමර්ශන නිලධාරීන්, ක්රිෂාණිගේ දුරකතන දත්ත වාර්තා ඔස්සේ දීර්ඝ පරීක්ෂණයක් ඇරඹීය. එහිදී අනාවරණය වූයේ හෝමාගම පදිංචි 44 හැවිරිදි මහේෂ් අකලංක ද සොයිසා නමැත්තකු සමග ඇය සමීප සබඳතාවක් පවත්වා ඇති බවයි.
තමන්ව නීත්යනුකූලව විවාහ කරගන්නා ලෙස ක්රිෂාණිගෙන් දිගින් දිගටම එල්ල වූ බලපෑම, මහේෂ්ට හිසරදයක් වී තිබිණි. අවසානයේ ඔහු ඇයව මෙලොවින් තුරන් කිරීමට සැලසුම් කළේය.
විනෝද චාරිකාවක මුවාවෙන් ඇටවූ මර උගුල
සැකකරු පොලිසිය හමුවේ පාපෝච්චාරණය කර ඇති පරිදි, මරණයේ සැලසුම ක්රියාත්මක වූයේ මෙලෙසිනි. පළමු පියවර ලෙස විනෝද චාරිකාවක් යමුයි පවසමින් ක්රිෂාණිව නානුඔය ප්රදේශයට කැඳවාගෙන ඒම. දෙවැනි පියවර වී තිබුණේ එදින රාත්රිය නානුඔයේ ගතකර, පසුදා උදෑසන ඇයව ග්රේට් වෙස්ටර්න් කඳු මුදුනට කැඳවාගෙන යාමයි. පසුව, කඳු මුදුනේ පාළු ස්ථානයකදී, ඇය හැඳ සිටි ජර්සි ඇඳුමෙන්ම ඇයගේ ගෙල සිරකර ඝාතනය කර ඇත. ඝාතනයෙන් පසු සිරුර කඳු මුදුනේම දමා සැකකරු සූක්ෂ්ම ලෙස පලාගොස් තිබිණි.
සැකකරු අලුත්ගමදී කොටුවීම
වසර තුනක් තිස්සේ පොලිස් ඇසට වැලි ගසමින් අලුත්ගම ප්රදේශයේ සැඟව සිටි මහේෂ් අකලංකව කොටුකර ගැනීමට මධ්යම පළාත් විශේෂ විමර්ශන ඒකකය සමත් විය. පොලිස් ප්රශ්න කිරීම් හමුවේ තවත් භයානක තොරතුරක් අනාවරණ විය. එනම්, මෙම සැකකරු මීට පෙර පිළියන්දල ප්රදේශයේදීද තවත් කාන්තාවක ඝාතනය කිරීම සම්බන්ධයෙන් පොලිසියට අත්යාවශ්යව සිටි, කාන්තා ඝාතනවලට හුරු වූ දරුණු අපරාධකරුවෙකු බවයි.
අත්අඩංගුවට ගත් සැකකරු නුවරඑළිය මහෙස්ත්රාත් පුෂ්පිකා ධර්මදාස මහත්මිය වෙත ඉදිරිපත් කිරීමෙන් අනතුරුව, ජුනි මස 09 වැනිදා දක්වා රක්ෂිත බන්ධනාගාර ගතකිරීමට නියෝග කෙරිණි. ලිඳුල පොලිසිය වැඩිදුර විමර්ශන සිදුකරයි.
නීතියේ රැහැනට සැමදා සැඟව සිටිය නොහැකි බව ග්රේට් වෙස්ටර්න් කඳු මුදුනෙන් නැවතත් ඔප්පු වී හමාරය.
