මත්ද්රව්ය ළඟ තබා ගත් බවට ව්යාජ සාක්ෂි මත නඩු පැවරූ පුද්ගලයෙකුට රුපියල් ලක්ෂ 2ක වන්දියක් ගෙවන ලෙස ගම්පහ දූෂණ මර්දන අංශයේ පොලිස් නිලධාරීන් තිදෙනෙකුට සහ පොලිස් දෙපාර්තමේන්තුවට ගම්පහ මහේස්ත්රාත් බන්දුල ගුණරත්න නියෝග කළේ ය.Sri Lanka Latest News
එක් මාසයකට වඩා ඊළඟ මාසයේ නඩු සංඛ්යාව වැඩි කර ගත යුතු බවට පොලිසියේ ඉහළ නිලධාරීන්ගේ නියෝග මත ක්රියාත්මක වුවහොත් වසර 5ක කාලයක් ගත වන විට පොලිසියට නඩු පැවරීම සඳහා ලංකාවේ ජනගහනය ද ප්රමාණවත් නොවන බව අවධාරණය කළ මහේස්ත්රාත්වරයා රට වැසියෙකුට පීඩාකාරී වන අන්දමට පොලිස් නිලධාරීන් නිස්සාරණ නඩු පැවරීමක් කර ඇතැයි තීන්දු කරමින් ඔහුට වන්දි ගෙවීමට මෙලෙස නියෝග කළේ ය.
ගම්පහ මහේස්ත්රාත්වරයා අවධාරණය කළේ, නඩු සංඛ්යාව වැඩිවීම යනු සැබවින් ම ප්රදේශය භාර පොලිසියේ අකාර්යක්ෂමතාව විදහා පෙන්වන්නක් බව ය.
එම නියෝගයේ පිටපතක් පොලිස්පතිවරයාට යොමු කරන ලෙස ද අධිකරණ ලේඛකාධිකාරීවරයාට නියම කළේ ය.
නිස්සාරණ නඩු පැවරීමකට යටත් කළ දෙවලපොළ, මාකන්දන පදිංචි චාමර චතුරංග මාරසිංහ නමැත්තාට එරෙහිව ගම්පහ දූෂණ මර්දන කොට්ඨාසය පවරා තිබූ නඩු දෙකෙන් ම ඔහු නිදහස් කළ මහේස්ත්රාත්වරයා නියම කළේ, ඔහු අත්අඩංගුවට ගත් පොලිස් නිලධාරීන් සහ පොලිස් දෙපාර්තමේන්තුව අදාළ වන්දිය ගෙවිය යුතු බව ය.
එක ම චෝදනාව යටතේ එක ම දිනයේ නඩු දෙකක්
2026 මැයි 06 වන දා හෝ ඊට ආසන්න දිනයක ගම්පහ අස්ගිරිය මංසන්ධියේදී අයිස් මිලිග්රෑම් 130ක් සහ හෙරොයින් මිලිග්රෑම් 500ක් ළඟ තබා ගත් බවට ගම්පහ දූෂණ මර්දන අංශයේ ස්ථානාධිපති පොලිස් පරීක්ෂකවරයා චාමර චතුරංග මාරසිංහ නමැත්තා ට එරෙහිව නඩුවක් පවරා තිබිණි.
එහි සාක්ෂිකරුවන් වශයෙන් ගම්පහ දූෂණ මර්දන කොට්ඨාසයේ පොලිස් සැරයෙන්වරයෙකු සහ කොස්තාපල්වරයෙකු නම් කර තිබිණි.
විත්තිකාර චාමර චතුරංග නමැත්තාට එරෙහිව මත්ද්රව්ය සන්තකයේ තබා ගැනීම සම්බන්ධයෙන් එක් නඩුවක් කැඳවනු ලැබූ අවස්ථාවේදී ඔහු අදාළ චෝදනාවලට වරද පිළිගැනීම නිසා දඩයක් නියම කෙරුණු අතර, තවත් සුළු මොහොතකින් ඔහුට එරෙහිව එම චෝදනාව යටතේ ම තවත් නඩුවක් කැඳවිණි.
දෙවන නඩුව කැඳවනු ලැබූ අවස්ථාවේදී එක ම පුද්ගලයෙකුට එරෙහිව එක ම දින නඩු දෙකක් පවරා ඇති බව නිරීක්ෂණය කළ මහේස්ත්රාත් බන්දුල ගුණරත්න, රට වැසියන්ට පීඩාකාරී වන අන්දමින් නඩු පැවරීම සම්බන්ධයෙන් එම නඩුවල සාක්ෂිකරුවන්ට සහ ඉහළ නිලධාරීන්ට එරෙහිව අපරාධ නඩු විධාන සංග්රහයේ 17(1) යටතේ කටයුතු නොකළ යුත්තේ මන්දැයි විමසීම සඳහා අදාළ නිලධාරීන් අධිකරණයට කැඳවුව ද ඔවුන් කිසිවෙකුත් අධිකරණය හමුවේ පෙනී නොසිටියහ.
නඩුව කැඳවූ අවස්ථාවේදී පැමිණිල්ල වෙනුවෙන් පෙනී සිටි අදාළ පොලිස් සැරයන්වරයා ප්රකාශ කළේ, මෙම වැටලීම කළ දින මෙම විත්තිකරු සමග තවත් පුද්ගලයින් 16 දෙනෙකු අත්අඩංගුවට ගත් හෙයින් මෙම විත්තිකරුට එරෙහිව චෝදනා වැරදි ලෙස ගොනුකර ඇති අතර, චාමර චතුරංග මාරසිංහ නමැත්තාට එරෙහිව පවරා ඇති නඩු දෙකෙන් එක් නඩුවක් ඉල්ලා අස්කර ගන්නා බවත්, අනෙක් නඩුව පවත්වාගෙන යාමට අවසර දෙන ලෙසත් ඉල්ලා සිටියේ ය.
පොලිසිය වැටලීම් කළ යුත්තේ වැටලීමේදී අත්අඩංගුවට ගන්නා පුද්ගලයින්ට එරෙහිව අධිකරණයක් හමුවේ සාක්ෂි දී ඔවුන් වරදකරුවන් බව පෙන්වීම සඳහා සාක්ෂි සහිතව බව මහේස්ත්රාත්වරයා අවධාරණය කළේ ය.
ඔහු පෙන්වා දුන්නේ, මෙම විත්තිකරුට එරෙහිව පවරා ඇති නඩුවේ සාක්ෂිකරුවන් වශයෙන් පොලිස් නිලධාරීන් තිදෙනෙකු නම් කිරීම මගින් විත්තිකරු නඩු විභාගයකදී වරදකරු කිරීමේ අරමුණින් යුතුව නඩු පවරා ඇති බව පැහැදිලි වන්නේ යැයි ද ඒ අනුව පොලිසියේ ඉල්ලීම පිළිගැනීමට නොහැකි බව සඳහන් කරමින් ඉල්ලීම එම ප්රතික්ෂේප කෙරිණි.
පොලිසිය විශාල වශයෙන් මත්ද්රව්ය නඩු පවරනු ලැබූවත් එම නඩුවල ඇති මත්ද්රව්ය ප්රමාණයන් සැලකිල්ලට ගැනීමේදී පොලිසිය සඳහන් කළ ප්රමාණයට වඩා ඉතා ම අඩු මත්ද්රව්ය ප්රමාණයන් අඩංගු බව රජයේ රස පරීක්ෂකවරයාගේ වාර්තා සැලකිල්ලට ගැනීමේදී පෙනී යන බවත් සඳහන් කළ මහේස්ත්රාත්වරයා රස පරීක්ෂකවරයාට යවනු ලැබූ ඇතැම් නඩු භාණ්ඩවල මත්ද්රව්ය ඉතා ම සුළු ප්රමාණයන් අඩංගු බව මෙන් ම ඇතැම් නඩු භාණ්ඩවල කිසිදු මත්ද්රව්යයක් අනාවරණය නොවන අවස්ථා ද ඇතැයි අවධාරණය කළේ ය.
මත්ද්රව්ය වැටලීම් වැඩි කිරීමට පොලිස් දෙපාර්තමේන්තුව උපදෙස් දී ඇතත්, එම උපදෙස් ක්රියාත්මක කරනු ලබන්නේ ඉතා ම අවිධිමත් ලෙස බව පෙන්වා දුන් මහේස්ත්රාත්වරයා එක් මාසයකදී ගන්නා නඩු සංඛ්යාවට වඩා වැඩි නඩු සංඛ්යාවක් ඊළඟ මාසයේදී ගත යුතු බවට අණකර එමගින් පොලිසියේ හා නිලධාරීන්ගේ ප්රගතිය සලකා බැලීම නිරන්තරයෙන් සිදුවූවත් එමගින් පොලිසියේ හෝ නිලධාරීන්ගේ ප්රගතිය සලකා බැලීමට කිසිදු හැකියාවක් නැතැයි ද පෙන්වා දුන්නේ ය.
සැබැවින් ම පොලිස් දෙපාර්තමේන්තුවේ කාර්යක්ෂමතාවය වැඩි කිරීම සඳහා අපරාධ වැටලීම් කරන්නේ නම් එක් මාසයකදී ගත් නඩු සංඛ්යාවකට වඩා අඩු නඩු සංඛ්යාවක් ඊළඟ මාසයේදී වාර්තා විය යුතු බව පෙන්වා දුන් මහේස්ත්රාත් බන්දුල ගුණරත්න, බල ප්රදේශයේ නඩු වැඩිවීම යනු සැබවින් ම එම ප්රදේශය භාර පොලිසියේ අකාර්යක්ෂමතාව විදහා පෙන්වන්නක් බව ද අවධාරණය කළේ ය.
එක් මාසයකදී ගත් නඩු සංඛ්යාවකට වඩා වැඩි නඩු සංඛ්යාවක් ඊළඟ මාසයේදී ගත යුතු බවට පොලිසියේ ඉහළ නිලධාරීන් පහළ නිලධාරීන්ට අණ කිරීම මගින් තවත් වසර පහක කාලයක් ගත වන විට පොලිසියට නඩු පැවරීම සඳහා ශ්රී ලංකාවේ ජනගහනය ප්රමාණවත් නොවනු ඇති බව ද මහේස්ත්රාත් බන්දුල ගුණරත්න පෙන්වා දුන්නේ ය.
ඇතැම් අවස්ථාවල අධිකරණයේ අභිමතය සීමා කිරීමේ උපක්රමයක් වශයෙන් පොලිසිය අන්තරායදායක ඖෂධ පනතේ 54 වගන්තිය උපයෝගී කර ගන්නා බව අධිකරණයේ මතය බව පෙන්වා දුන් මහේස්ත්රාත්වරයා, මෙහි අවසාන ප්රතිඵල පොලිස් නිලධාරීන් කෙරෙහි අධිකරණයට ඇති විශ්වාසය පළුදු වීම බව ද අවධාරණය කළේ ය.
මෙම ක්රමවේදය පිළිබඳව පොලිසියේ ඉහළ නිලධාරීන්ගේ අවධානය වහා ම යොමු කර එම ක්රමවේදය වහා ම වෙනස් කළ යුතු බව අවධාරණය කළ මහේස්ත්රාත් බන්දුල ගුණරත්න සඳහන් කළේ, මේ සම්බන්ධයෙන් කරුණු විමසීම සඳහා ගම්පහ ජ්යෙෂ්ඨ පොලිස් අධිකාරීවරයා අධිකරණයට කැඳවා ඇතත් ඔහු අධිකරණයේ පෙනී නොසිටීම මගින් ඔවුන් අධිකරණයේ කටයුතු පිළිබඳ දැඩි නොසැලකිලිමත් බවකින් කටයුතු කරන බවක් පෙනී යන බව ය.
මෙම නඩුවේ විත්තිකරුට එරෙහිව පීඩාකාරී අන්දමින් නඩු පැවරීම පිළිබඳව අපරාධ නඩු විධාන සංග්රහයේ 17(1) වගන්තියේ යටතේ කටයුතු නොකළ යුත්තේ මන් ද? යන්න පිළිබඳ පොලිසිය විසින් ප්රමාණවත් කරුණු ඉදිරිපත් කර නොමැති බව පෙන්වා දුන් මහේස්ත්රාත්වරයා විත්තිකරුට එරෙහිව පවරා ඇති නඩු දෙකේ වැටලීම කළ බව පවසමින් සාක්ෂිකරුවන් වශයෙන් නම් කර ඇති පොලිස් නිලධාරීන් විසින් ඔහුට රුපියල් 25000 බැගින් වන්දි ගෙවිය යුතු බවට නියම කළේ ය.
පොලිසියට දුන් උපදෙස්
විෂ වර්ග සහ අබිං අන්තරායදායක ඖෂධ පිළිබඳ පනත යටතේ අය කර ගනු ලබන දඩ මුදල්වලින් විශාල මුදල් ප්රමාණයක් පොලිස් තෑගි අරමුදලට බැර කරනු ලබන බව පෙන්වා දුන් මහේස්ත්රාත්වරයා මෙවැනි ආකාරයේ නිස්සාරණීය ලෙස නඩු පැවරීම්වලදීත් එම අරමුදල භාවිත කළ යුතු බව ද තීරණය කළේ ය.
ඒ අනුව විත්තිකරුට එරෙහිව නිස්සාරණීය ලෙස පවරා ඇති එක් නඩුවකට රුපියල් පනස් දහස බැගින් නඩු දෙකට රුපියල් ලක්ෂයක වන්දි මුදලක් ගෙවීමට නියම කළ මහේස්ත්රාත්වරයා ඒ සඳහා මෙම නඩුවේ පිටපතක් පොලිස්පතිවරයාට යැවීමට ද නියම කළේ ය.
පොලිස් නිලධාරීන්ගේ වැරදි පුරුදු සම්බන්ධයෙන් අවධානය යොමු කරවීමේ අරමුණින් මෙම නියෝගය දෙන ලද බව අවධාරණය කළ මහේස්ත්රාත්වරයා, මෙම නිලධාරීන් කිසිදු විනය ක්රියාමාර්ගයකට යටත් නොවිය යුතු බව ද අවධාරණය කළේ ය.
මෙම පොලිස් නිලධාරීන් කිසියම් හෝ විනය ක්රියාමාර්ගයකට යටත් කරන්නේ නම් මෙවැනි ආකාරයෙන් වැටලීම් කරන ලෙසට ඔවුන්ට උපදෙස් දී ඇති ඉහළ සිට සියලු ම පොලිස් නිලධාරීන් වගකීමට යටත් කළ යුතු බව ද මහේස්ත්රාත් බන්දුල ගුණරත්න වැඩිදුරටත් පැවසීය.
BBC සිංහල
