මීගමුවේ වෙසෙන පුද්ගලයකු විසින් තමිල්නාඩු මහඇමැති තලපති විජේ වෙත ලිපියක් යොමුකොට තිබේ.Sri Lanka Latest News
එය පහත දැක්වේ.
තමිල් රටේ මහ ඇමති තලපති විජේ වෙතයි,
ඔබතුමා තමිල් රටේ මහ ඇමතිවීම ගැන ලංකාවේ දෙමළ භාෂාව කතා කරන අය සතුටට පත්ව ඇතැයි අනුමාන කරමි.
එසේ වීම සාධාරණය.
ඔවුන්ට මේ රට තුළ ලැබෙන්නේ දෙවන පංතියේ සැළකිල්ලක් නිසා තම භාෂාව කතා කරන අයෙක් මහ ඇමති තනතුරකට පත්වීම ඔවුන්ට සතුටකි.
මෙරට දේශපාලන හාමුදුරු නමක් නම් “ඔලු ගෙඩිය හතරට පැළෙන්න බෝම්බයක්වත් ගසත්වායි!”
ඔබට සුබ පතා තිබේ.
ජනාධිපති සහ නාමල් නම්, සාමාන්ය රාජ්ය තාන්ත්රික ස්වභාවයෙන් සුභ පැතුම් පිරිනමා ඇත.
ලංකාවට ශ්රී මහා බෝධියත්, දළදා හිමිත් වැඩමවන ලද්දේ ඔබේ රාජ්යයේ වෙරළේ සිට නිසා ඒ පිළිබඳව ලාංකිකයින්ගේ ගෞරවයක්ද තිබේ.
එපමණක් නොව ලංකාවේ සමහර රජවරුන්ට තම රාජ්යත්වය ස්ථාවර කර ගැනීමට අවශ්ය හමුදා ශක්තිය ලබා දී ඇත්තේද එකල සොළී රට ලෙස හැඳින්වූ ඔබේ රාජ්යයේ සිටි රජවරුන්ය.
ඊටත් වඩා වැදගත් ඉතිහාස කතාවක් තිබේ. එනම් :
එළාර නම් සොළී රජු වසර හතලිහක පමණ කාලයක් ලංකාවේ ධර්මිෂ්ඨ පාලනයක් ගෙන ගිය බවය.
අපේ ඉතිහාසයේ ලියා ඇත්තේ එහෙමය.
මේ අතීත කතා දිගහැරියේ ඔබගෙන් උදව්වක් බලාපොරොත්තු වෙමිනි:
තලාහේන පේරුව (පිටිපන අර්ධද්වීපය) නම් වූ ලංකාවේ බටහිර වෙරළේ පිහිටි බිම් තීරුවක් ගැන කීමටය.
මේ බිම් කඩ ලංකාව හා සම්බන්ධ වන්නේ පටු ඉඩම් කැබැල්ලකින්ය.
ඒ නිසාමදෝ මෙහි ජනයාට ආණ්ඩුව සළකන්නේ දෙමළ බස කතා කරන අයට සළකන ආකාරයටමය.
මෙහි වැසියන් ආදියේ සිට ජීවත් වූයේ ධීවර රැකියාවෙන්ය.
එහෙත්,
චීනයට අවශ්ය වූ නගරයක් ඉදිකිරීමට මුහුද හැරීමත්, ව්යාපාරිකයින්ට අවශ්ය ආකාරයට කළපු පරිසරය විනාශ කිරීමට ඉඩ දීමත් නිසා ධීවර රැකියාවට අපල කාලයක් උදාවිය.
ඒ මදිවාට රසායනික ද්රව්ය රැගත් කොහේද යන නෞකාවකට ලංකාවේ මුහුදට ඇතුළු වීමට ඉඩදීම නිසා සිදුවූයේ මහා විපතකි.
ඒ නැව ගිනිගෙන විනාශවී එහි තිබුණු විස රසායන මුහුදට මුදාහැරීමෙන්, මුහුදත් ධීවරයාත් තවදුරටත් විපතට පත් විය.
මේ කියන තලාහේන පේරුව පාලනය වන්නේ මීගමු නගර සභාව මගින් වුවත්, කඩා වැටී ඇති ජන ජීවිතය නංවාලීමට වැඩපිළිවෙලක් ඇති කිරීමට ඔවුහු උනන්දු වී නැත.
දේශපාලකයනුත්, ආගමික සභාත් මේ ගම්වලට එන්නේ ඔවුන්ට උවමනාවක් ඇතිවූ විටය.
ඒ නිසා තලපති තුමනි,
ලංකා ආණ්ඩුවත් සමඟ හෝ මීගමු නගර සභාව සමඟ හෝ සාකච්ඡා කර මේ අර්ධද්වීපයේ ජනතාවගේ තත්ත්වය නගා සිටුවීමට ඔබ සහය වන්නේ නම් කෘතඥ වෙමු.
දැනටමත් චීනය, ඉන්දියාව වැනි රටවල් කිහිපයක්ම ලංකාවේ කොටස් පවරාගෙන සංවර්ධනය කරන හෙයින් මෙරට සිටින රට – ජාතිය – ආගම රැක ගැනීමට සිටින අයගෙන් මේ සඳහා විරෝධයක් එල්ල නොවනු ඇත.
ඉතින්, මේ ගැන වැඩිදුරට සිතා බලන්න.
ඔබතුමාට වෙට්රී පෙරට්ටුම් !
ෂෙල්ටන් හෙට්ටියාදුර
2026.5.07.
(තලපති = ප්රධානියා, නායකයා).
