හැර යාමේ ගතිකත්වය: සගයන් විවේචකයන් බවට පත්වන විට
ආම් ආද්මි පක්ෂය (AAP)ය බිඳවැටීමේ වඩාත්ම හානිකර ලක්ෂණයක් වූයේ පීඩනය හමුවේ එහි අභ්යන්තරය ඉතා වේගයෙන් විසිරී යාමයි. දූෂණ චෝදනා එල්ල වෙද්දී සහ මැතිවරණ පරාජයන් එක්රැස් වෙද්දී, හිටපු හිතවතුන්, මන්ත්රීවරුන් සහ පක්ෂ නිලධාරීන් ගිලෙමින් පවතින එම නෞකාව අතහැර දමා ගිය අතර, බොහෝ පිරිසක් භාරතීය ජනතා පක්ෂයට එක් වූහ. 2026 අප්රේල් මස අවසාන සතියේ දී ප්රමුඛ පෙළේ පුද්ගලයන් ඇතුළු AAP මන්ත්රීවරුන් හත්දෙනෙකු AAPයෙන් ඉල්ලා අස් වී BJPයට එක් වූහ. මෙම පක්ෂ මාරුකිරීම් වැළැක්වීමට කෙජ්රිවාල් පෞද්ගලිකවම උත්සාහ කළ බව වාර්තා විය. එහෙත් ඔහුට එය සාර්ථක කරගත නොහැකි විය.Sri Lanka Latest News
ජාතික ජන බලවේගයට මෙහි ඇති පාඩම ඉතා බැරෑරුම්ය. NPP යනු සන්ධානයක් මිස ඒකාකාරී පක්ෂයක් නොවේ. එහි ජනතා විමුක්ති පෙරමුණේ විනයගරුක කේඩර ව්යුහය අන්තර්ගත වන අතරම, JVPයේ මතවාදයට වඩා NPPයේ ප්රතිපත්ති ප්රකාශනය විශ්වාස කරමින් එක්වූ සිවිල් සමාජ වෘත්තිකයන්, වෘත්තීය සමිති ක්රියාකාරීන්, කාන්තා ක්රියාකාරිනියන් සහ ප්රජා නායකයන්ද ඇතුළත් වේ. ශ්රී ලංකාවේ තත්ත්වය පිළිබඳ වාර්තා දක්වන අන්දමට, JVP නොවන සාමාජිකයන්ගෙන් බොහෝ දෙනෙකුට තමන් දැනටමත් කොන් වීමට ලක්වෙමින් පවතින බවක් හැඟෙමින් පවතී.NPPයේ ප්රතිපත්ති ප්රකාශනයෙන් එහි සිටින වඩා අලුත් සහ වඩාත් ලිබරල් කොටස්වල ප්රමුඛතා පිළිබිඹු වූ නමුත්, ප්රායෝගිකව සෑම මට්ටමකදීම තීරණ ගැනීමේ බලය හොබවන්නේ JVPයයි.
NPPය මෙම සභාග හවුල්කරුවන්ට දුන් පොරොන්දු ඉටුකිරීමට අපොහොසත් වුවහොත්, එනම්, බලය විමධ්යගත කිරීම, ආණ්ඩුක්රම ව්යවස්ථා ප්රතිසංස්කරණ සහ ජන වාර්ගික සංහිඳියාව පිළිබඳ මැතිවරණ ප්රකාශනයේ පොරොන්දු අභිබවා JVPයේ රාජ්යවාදී, ජාතිකවාදී ප්රවණතා දිගින් දිගටම ඉස්මතු වුවහොත්, මෙම සභාගය බිඳීයනු ඇත. AAP විනාශ කළ හැර යාමේ ගමන් මගට විපක්ෂයට එක්වීම් අත්යාවශ්ය නොවේ. ඒ සඳහා අවශ්ය වන්නේ උද්යෝගිමත් ලෙස සහයෝගය දැක්වීම ඉවත් කර ගැනීම, ක්රියාකාරීන් අධෛර්යයට පත්වීම සහ 2024 NPP ජයග්රහණයට මග පෑදූ පුළුල් ජනවරම ක්රමයෙන් ක්ෂය වී යාම පමණි.
විපක්ෂයේ වීදුරු ගෙවල්
මෙහිදී සන්දර්භයට අදාළ ඉතා වැදගත් කාරණයක් අමතක නොකළ යුතුය. AAP සහ NPPය යන දෙපාර්ශ්වයටම එරෙහිව දූෂණ චෝදනා එල්ල කරන බලවේගද කිසිසේත්ම ගුණධර්ම අතින් පිරිපුන් අය නොවේ. BJPය, දූෂණයට එරෙහිව කොතරම් කතා කළත්, බරපතළ චෝදනා එල්ල වී ඇති දේශපාලනඥයන්ගේ දිගු ලැයිස්තුවක් ඔවුන් සතු වේ. ශ්රී ලංකාවේ NPPයට එරෙහිව ප්රචාරණ කටයුතු සිදුකරන විපක්ෂ කණ්ඩායම් වන පොදු ජන පෙරමුණේ ඉතිරිව සිටින පිරිස, සමගි ජන බලවේගය සහ විවිධ ජාතිකවාදී කණ්ඩායම් දෙස බැලීමේදී, 2022 වසරේදී රට අගාධයට ඇදදැමූ ආර්ථික කළමනාකරණයට හා දූෂණයට ඍජුවම සම්බන්ධ පුද්ගලයන් ඒ අතර වේ.
ශ්රේෂ්ඨාධිකරණය විසින් කරන ලද තීන්දුවකට අනුව, ආර්ථික අර්බුදය සඳහා පැහැදිලිවම දායක වූ සහ මහජන විශ්වාසය කඩකළ බවට ඔප්පු වූ අදූරදර්ශී පාලනයක් ගෙන ගිය රාජපක්ෂ පවුල තවමත් දේශපාලන බලවේගයක් ලෙස පවතී. රාජ්ය සම්පත් පෞද්ගලිකව භාවිතා කිරීම සම්බන්ධ චෝදනා මත 2025 අගෝස්තු මාසයේ දී කෙටි කලකට අත්අඩංගුවට ගන්නා ලද රනිල් වික්රමසිංහ හිටපු ජනාධිපතිවරයාට, දේශපාලන වර්ණාවලියේ විවිධ පක්ෂවල ආරක්ෂාව හිමි විය. NPPය නිවැරදිව පෙන්වා දුන් පරිදි, එය තමන් විස්ථාපනය කිරීමට උත්සාහ කරන දූෂිත දේශපාලන පන්තියේ ගැඹුර ඉස්මතු කර පෙන්වන දර්ශනයක් විය.
මෙම සන්දර්භය වැදගත් වුවද එය ප්රමාණවත් නොවේ. AAP හා අදාළ සිද්ධියේ දී, BJPයේ දූෂණය පෙන්වා දීමෙන් පමණක් සිය පක්ෂය මැතිවරණ පරාජයෙන් ගලවා ගැනීමට ඔවුන්ට නොහැකි විය. ඡන්දදායකයන් සැම විටම හෝ බොහෝ විට, තීරණ ගනු ලබන්නේ තරගකාරී පක්ෂ අතර පවතින සාපේක්ෂ සදාචාරාත්මක ගුණාංග සැසඳීම මත පදනම්ව නොවේ. ඔවුන් ඡන්දය ප්රකාශ කරන්නේ තමන්ට හැඟෙන දේ, තමන් අත්විඳින දේ සහ තමන් අපේක්ෂා කරන දේ පදනම් කර ගෙනයි. දූෂණය තුරන් කිරීමේ තේමාව මත මැතිවරණ ව්යාපාර මෙහෙයවන, එහෙත් එම ප්රමිතිය තෝරාගත් පිරිසකට පමණක් අදාළ කරන බවක් පෙනෙන, හෝ අකාර්යක්ෂම ලෙස පාලනය ගෙන යන, හෝ සාධාරණ විවේචන හමුවේ උඩඟු ලෙස සහ නීතිමය තර්ජන මගින් ප්රතිචාර දක්වන ආණ්ඩුවක් කෙරෙහි ඡන්දදායකයන් තැබූ විශ්වාසය බිඳීයනු ඇත. එහි විරුද්ධවාදීන් කෙතරම් දූෂිත වුවද එය වෙනස් නොවේ.
ව්යුහාත්මක වෙනස්කම් සහ ශ්රී ලංකාවට ආවේණික දුර්වලතා
දිල්ලියේ සන්දර්භයට වඩා වෙනස් වන ශ්රී ලංකාවේ දේශපාලන සන්දර්භය, NPPයට වාසිදායක මෙන්ම අභියෝගාත්මකද වේ. NPPය පාලනය කරන්නේ ජාතික මට්ටමෙන් මිස සතුරු මධ්යම රජයක් යටතේ පවතින ප්රාදේශීය ආණ්ඩුවක් ලෙස නොවේ. ශ්රී ලංකා දේශපාලන ඉතිහාසයේ කලාතුරකින් දැකිය හැකි, තුනෙන් දෙකක පාර්ලිමේන්තු බහුතරයක් ඔවුන් සතුයි. විපක්ෂය බෙදීගොස් දුර්වලව ඇත. මෙම ව්යුහාත්මක වාසිදායක තත්ත්වයන් NPPයට එඩිතරව කටයුතු කරන්නට ඉඩ සලසයි.
කෙසේ වෙතත්, ඉන්දියාවේ දක්නට නොලැබෙන සුවිශේෂ අවදානම්සහගත තත්ත්වයන් ශ්රී ලංකාව තුළ පවතී. දශක ගණනාවක් පුරා ශ්රී ලංකාවේ දේශපාලනය හැඩගැස්වූ සහ විනාශකාරී සිවිල් යුද්ධයකට මගපෑදූ ජනවාර්ගික හා ආගමික බෙදීම් තවමත් නිසි ලෙස විසඳා නැත. පළාත් සභා මැතිවරණ සඳහා පැහැදිලි කාලසටහනක් සකස් කිරීමට NPPය අසමත් වීම, ව්යවස්ථාපිත බලය බෙදාහැරීමේ නිශ්චිත කරුණු පිළිබඳ ඔවුන් දක්වන නිහඬතාව සහ ත්රස්ත විරෝධී පොලිසිය විසින් දෙමළ ක්රියාකාරීන් දිගින් දිගටම හිරිහැරයට ලක්කිරීම උතුරු සහ නැගෙනහිර වැසියන්ගේ කලකිරීම තවත් උග්ර කර තිබේ. 2025 මැයි මාසයේ පැවැති පළාත් පාලන මැතිවරණවලදී දෙමළ පක්ෂ ඔවුන් තරග කළ සභා බොහොමයක් ජයග්රහණය කළ අතර, ඉන් ඇඟවෙන්නේ NPPයේ ජාතිවාද-විරෝධී ජනවරම 2024 පාර්ලිමේන්තු සංඛ්යාලේඛනවලින් පෙන්නුම් කළ ප්රමාණයට වඩා බිඳෙනසුලු බවයි.
AAPය මුහුණ දුන් තත්ත්වයට වඩා අස්ථාවර ආර්ථික තත්ත්වයකට NPPය මුහුණ දී සිටී. ශ්රී ලංකාව තවමත් මධ්යම ආදායම් ලබන රටවල් අතර ඉහළම ණය බරක් සහිත රටක් ලෙස පවතින අතර, 2026 වසරේදී එහි ආදායමෙන් සියයට 49ක් ණය සේවා කරණය සඳහා වැයවනු ඇතැයි ඇස්තමේන්තු කර ඇත. ආණ්ඩුව ජාත්යන්තර මූල්ය අරමුදලේ (IMF) කොන්දේසිවලට අනුකූලව කටයුතු කිරීම මූල්යමය වශයෙන් වගකිවයුතු පියවරක් වන්නේ වුවද, එමගින් ඡන්දදායකයන්ට පොරොන්දු වූ ආර්ථික සහන ලබාදීමේ හැකියාව සීමාකර ඇත. දිට්වා සුළි කුණාටුව, මැදපෙරදිග ගැටුම් හේතුවෙන් ඇති වූ ඉන්ධන හිඟය සහ 2022 අර්බුදයේ ඉතිරි බලපෑම් යන ත්රිවිධ කම්පන විසින් ජන ජීවිතය තවදුරටත් පීඩාවට පත්කර ඇත. නැවත නැවතත් පෙන්වාදී ඇති පරිදි, එකම වැරදි දෙවතාවක් කිරීමට ශ්රී ලංකාවට හැකියාවක් නැත. සැබෑ ප්රතිසංස්කරණ සඳහා ඇති අවස්ථාව ඉතා අල්ප වන අතර, එය සදහටම විවෘතව පවතින්නේ ද නැත.
අමතර ලෙස, ශ්රී ලංකාවේ මෑතකාලීන දේශපාලන ඉතිහාසය පෙන්වා දෙන්නේ වැදගත් දේශපාලන චරිත කිහිපයක්ම තමන්ගේම ක්රියාකලාප හේතුවෙන්, අත්දැකීම් අඩුකම, පවතින තත්ත්වය පිළිබඳ අවබෝධයක් නොමැතිකම හෝ දේශපාලන විරුද්ධවාදීන්ගේ උපාය මාර්ගවලට හසුවීම හේතුවෙන් තමන් කෙරෙහි පවතින විශ්වසනීයත්වය පලුදු කරගෙන ඇති බවයි. ඔවුන් විසින්ම සිදුකර ගත් මෙම රිදවීම්, දුර්වල කරුණු මත පදනම්ව ප්රහාර එල්ල කිරීමට සිදුව ඇති විවේචකයන්ට, පහසු අවි ආයුධ සපයා දී ඇත.
ජාතික ජන බලවේගය උගත යුතු පාඩම් – ප්රමාද වීමට පෙර
AAPය එක දශකයක් තුළ ආසන 67 සිට 22 දක්වා කඩාවැටීම, NPPයට වැළැක්විය නොහැකි ඉරණමක් නොවේ. කෙසේ වෙතත්, එය සිදුවිය හැකිය. මෙම අවස්ථා දෙක පිළිබඳ සිදුකරන ලද සංසන්දනාත්මක විශ්ලේෂණයකින් පහත සඳහන් පාඩම් ඉස්මතු වන අතර, ඒවා NPP නායකත්වයේ ක්ෂණික අවධානය යොමුවිය යුතුය.
- වගවීම සැමට පොදු විය යුතුය. එය තෝරාගත් පිරිසකට පමණක් සීමා නොවිය යුතුය. NPPයට කළ හැකි ඉතාමත්ම හානිකර දේ වන්නේ, දූෂණ විරෝධී ප්රමිතීන් තෝරා බේරාගෙන යෙදවීමයි. එනම් විපක්ෂයේ පුද්ගලයන්ට නඩු පවරමින් තම පාර්ශ්වයේ අය ආරක්ෂා කිරීමයි. බලශක්ති අමාත්යවරයා ආරක්ෂා කිරීමට ගත් තීරණය ආපසු හැරවිය යුතුය, නැතහොත් ඒ පිළිබඳ ඒත්තු යන අන්දමේ පැහැදිලි කිරීමක් කළ යුතුය. දූෂණ විමර්ශන කොමිසම සහ අනෙකුත් අධීක්ෂණ ආයතනවලට සම්පූර්ණ සම්පත් ලබාදී ඒවා වඩාත් කාර්යක්ෂම බවට පත්කළ යුතුය. තොරතුරු දැන ගැනීමේ අයිතිය වැනි ස්වාධීන කොමිෂන් සභා දුර්වල නොකර, ඒවාට අරමුදල් සපයා බලගැන්විය යුතුය.
- හරය සේම එය ඉදිරිපත් කරන ස්වරයද වැදගත් වේ. NPPය සදාචාරවාදී ස්ථාවර සහ විවේචන හමුවේ දක්වන ආරක්ෂාකාරී ස්වභාවයෙන් බැහැර විය යුතුය. ශ්රී ලංකාවේ ගැටලු කිසිදු තනි පක්ෂයකට පමණක් විසඳිය නොහැකි බවත්, ඒ සඳහා නිර්මාණාත්මක විවේචන සහ මහජන පරීක්ෂාව අවශ්ය බවත් දිසානායක ජනාධිපතිවරයා සිය මුල්කාලීන දේශනවල දී පිළිගත්තේය. එම ගුණය නැවත මතු කරගත යුතුය. ස්ථාපිත මාධ්ය පැමිණිලි ක්රියා පටිපාටි භාවිත කරනවා වෙනුවට, විවේචනාත්මක මාධ්යවේදීන් හෝ විපක්ෂ අදහස් දක්වන්නන්ට එරෙහිව පොලිස් පරීක්ෂණ ආරම්භ කිරීම, AAPයට සිය මධ්යම පාන්තික පදනම අහිමි කිරීමට හේතු වූ ආකාරයේ උපක්රමයක් විය.
- සභාගය සැබවින්ම සියලු පාර්ශ්වයන් ඇතුළත් කර ගන්නා එකක් විය යුතුය. NPPයේ ශක්තිය පවතින්නේ එහි ඇති පුළුල් විවිධත්වය මතයි. JVPයේ සංවිධානාත්මක ආධිපත්යය හේතුවෙන්, යහපත් චේතනාවෙන් ජාතික ජන බලවේගය හා සම්බන්ධ වූ වෘත්තිකයන්, සිවිල් සමාජ නායකයන් සහ ප්රජා ක්රියාකාරීන් තව දුරටත් කොන් කරනු ලැබුව හොත්, මෙම, සභාගය බිඳීයනු ඇත. NPPයේ ප්රතිපත්ති ප්රකාශය අයත් වන්නේ එහි සියලු සාමාජිකයන්ට මිස ජනතා විමුක්ති පෙරමුණට පමණක් නොවේ.
- පාලන ධාරිතාව කඩිනමින් ගොඩනැගිය යුතුය. දිට්වා සුළි කුණාටුවට ප්රතිචාර දැක්වීමේදී ඇති වූ අසාර්ථකත්වය ඒ පිළිබඳ ලැබුණු අනතුරු ඇඟවීමකි.NPPය බාහිර විශේෂඥ දැනුම කෙරෙහි දක්වන අවිශ්වාසය පසෙකලා, තම ප්රතිසංස්කරණ න්යාය පත්රය සකස් කිරීමේදී සහ ක්රියාත්මක කිරීමේ දී විද්වතුන්, සිවිල් සමාජ සංවිධාන සහ ජාත්යන්තර තාක්ෂණික උපදේශකයන් සම්බන්ධ කරගත යුතුය. තීරණ ගැනීම තවදුරටත් කුඩා අමාත්ය මණ්ඩලයකට පමණක් සීමා නොවිය යුතුය.
- ජනවාර්ගික සංහිඳියාව තවදුරටත් ප්රමාද කළ නොහැක. පළාත් සභා මැතිවරණ තවත් ප්රමාද කිරීමකින් තොරව පැවැත්විය යුතුය. ත්රස්ත විරෝධී පොලිසිය විසින් දෙමළ ක්රියාකාරීන් හට සිදුකරන හිරිහැර කිරීම් අවසන් විය යුතුය. අර්ථවත් බලය බෙදාහැරීමක්ද ඇතුළත් වන පරිදි, ව්යවස්ථා ප්රතිසංස්කරණ සඳහා විශ්වසනීය කාල රාමුවක් ඉදිරිපත් කළ යුතුය. NPPයේ දිගුකාලීන වලංගු බව තීරණය වන්නේ, හුදෙක් ජාතික මට්ටමට ළඟාවීමේ අභිලාෂයන් සහිත හුදු සිංහල බහුතර ආණ්ඩුවක් නොවී එයට සැබෑ ජාතික ආණ්ඩුවක් වීමට හැකිද යන්න මතය.
- ආර්ථික සහන සැලසීම දින නියමයකින් තොරව කල් දැමිය නොහැකිය. IMF වැඩසටහන මූල්යමය වශයෙන් අත්යවශ්ය වුවද, එය ශ්රී ලාංකික දිළිඳු ජනයාගේ අවශ්යතාවලට වඩා ණයහිමියන්ගේ අවශ්යතාවලට ප්රමුඛතාවය දෙන බවක් පෙනෙන්නට තිබේ නම්, එය දේශපාලනික වශයෙන් අවදානම්සහගතය. ධන බදු පැනවීම, බදු බර සාධාරණ ලෙස බෙදාහැරීම සහ සමාජ ආයෝජන සඳහා මූල්ය අවකාශය සැලසෙන පරිදි ණය කොන්දේසි නැවත සාකච්ඡා කිරීම සඳහා NPPය දැඩි ලෙස බලපෑම් කළ යුතුය. ශ්රී ලාංකිකයන් ගෙන් හතරෙන් එකකට ආසන්න ප්රමාණයක් වන අන්ත දිළිඳු ජනතාව ජීවත් වන්නේ දරිද්රතාවෙනි. ඔවුන්ගේ ඉවසීම සීමා රහිත එකක් නොවේ.
- තීව්ර කෙරෙන විපක්ෂ ප්රචාරක ව්යාපාර සඳහා සූදානම් වන්න. ඉන්දියාවේ BJPය AAPයට එරෙහිව ගෙනගිය ප්රචාරණ ව්යාපාරය නොපසුබට, සංකීර්ණ මෙන්ම බලපෑම් සහිත එකක් විය. ශ්රී ලංකාවේ විපක්ෂය දුර්වල වුවද, ඔවුහු ඒ හා සමානව NPP ආණ්ඩුවේ සෑම අත්වැරදීමක්ම විශාල කර පෙන්වීමටත්, සෑම ප්රසම්පාදන තීරණයක්ම දූෂණයක් ලෙස හුවාදැක්වීමටත්, ආණ්ඩුවේ විශ්වසනීයත්වයට හානි කිරීම සඳහා තමන් සතු ඕනෑම ආයතනික බලපෑමක්ම යොදාගැනීමටත් උත්සාහ කරනු ඇත. මෙයට එරෙහිව ඇති හොඳම ආරක්ෂාව වන්නේ ප්රති-ප්රචාරක ව්යාපාරයක් නොව, සැබෑ සහ ප්රායෝගිකව පෙන්විය හැකි යහපාලනයයි.
නිගමනය: අවස්ථාව තවමත් පවතින මුත් එය කෙමෙන් ගිලිහී යමින් පවතී
ආම් ආද්මි පක්ෂයේ කතාව අනිවාර්ය අසාර්ථකත්වයක් පිළිබඳ කතාවක් නොවේ. එය දූෂණ විරෝධී පොරොන්දු මත ගොඩනැගුණු ව්යාපාරයක් තමන්ගේම අඛණ්ඩතාව ආරක්ෂා කර ගැනීමට අපොහොසත් වූ විට, අදක්ෂ ලෙස පාලනය මෙහෙයවන විට සහ තමන්ට ඓතිහාසික ජනවරමක් ලබාදුන් ඡන්දදායකයන්ගේ විශ්වාසය පලුදු කරගත් විට සිදුවන දේ පිළිබඳ කතාවකි. ඔවුන්ට එරෙහිව භාරතීය ජනතා පක්ෂය දියත් කළ ව්යාපාරය අනුකම්පා විරහිත මෙන්ම බොහෝ විට උපහාසාත්මක එකක් විය. එහෙත් එය සාර්ථක වූයේ ආම් ආද්මි පක්ෂය විසින්ම තම සතුරන්ට අවශ්ය කරන අවි ආයුධ ඔවුන් අතට පත්කළ බැවිනි.
ශ්රී ලංකාවේ ජාතික ජන බලවේග ආණ්ඩුවට එම ඉරණමම අත්කර ගැනීම වළක්වා ගැනීමට තවමත් කාලය තිබේ. කිසිදා ආම් ආද්මි පක්ෂය සතුව නොතිබූ බහුතර බලයක් සහිතව එය පාලනය කරගෙන යයි. එහි විපක්ෂය, දිල්ලි ප්රාන්තයේදී භාරතීය ජනතා පක්ෂය සිටි තත්ත්වයට වඩා දුර්වලය. ශ්රී ලංකාවේ ද්විපාර්ශ්වික හවුල්කරුවන් ඇතුළු ජාත්යන්තර ප්රජාව ශ්රී ලංකාවේ සාර්ථකත්වය කෙරෙහි අව්යාජ උනන්දුවක් දක්වමින් සහාය ලබාදෙන්නට සූදානමින් සිටිති. ක්රම පද්ධතික ප්රතිසංස්කරණ සඳහා පවතින අවස්ථාව පටු වෙමින් පැවතුණද, එය තවමත් සම්පූර්ණයෙන්ම වැසී ගොස් නැත.
එසේ වුවද, ආම් ආද්මි පක්ෂයේ අත්දැකීම්වලින් උගත හැකි පාඩම් අවංකව හා කඩිනමින් අවබෝධ කරගත යුතුය. දූෂණ විරෝධී ජනවරම යනු ස්වයංක්රීය ලෙස පවතින එකක් නොවේ. නීතිය අඛණ්ඩව සහ පොදුවේ සැමට එක හා සමානව ක්රියාත්මක කිරීම තුළින් ඒවා නැවත නැවතත් අලුත් කළ යුතුය. පාලනයක් ජයග්රහණය කරනු ලබන්නේ වාග් අලංකාරය මගින් නොව, ජනතාවගේ දෛනික ජීවිතය, පොදු ආයතනවල ක්රියාකාරීත්වය, බදු ක්රමයේ සාධාරණත්වය සහ ප්රජාවන්ගේ ආරක්ෂාව වැනි කරුණු සම්බන්ධයෙන් අත්කර දෙන ප්රායෝගික ප්රතිඵල මගිනි. තවද ජනවරම, මැතිවරණ කාලයේ දී එය කෙතරම් බලවත් ලෙස පෙනුණද, අවසානයේ දී එය කොන්දේසි සහිත එකක් වේ.
ශ්රී ලංකාවේ දූෂිත පැරණි ක්රමය අතුගා දමන ඉලපතම, රාජ්යය, එහි ආයතන සහ ආණ්ඩුව පිරිසිදු කිරීමටද භාවිත කළ යුතුය. නිරන්තරයෙන් භාවිත කරන නිවසක් නිතිපතා පිරිසිදු කිරීම අත්යාවශ්ය වේ. ආණ්ඩුවකටද එය එසේම වේ. පැහැදිලි ක්රම පද්ධති සහ ක්රමවේදයන් සකස් කර ඒවා දැඩි ලෙස පිළිපැදිය යුතුය. දූෂණය එක වර සදහටම තුරන් කළ හැක්කක් නොවේ. නිරන්තරයෙන් කළමනාකරණය කළ යුත්තක් වන එයට ඉහළින්ම නායකත්වය ලබාදිය යුතුය. එය නායකයෙකුගේ මිත්රත්ව, පක්ෂපාතිත්ව හෝ පෞද්ගලික අභිමත මත රඳාපැවතිය නොහැකිය. මෙහිදී අසමත් වුවහොත්, ඉතිහාසයට පැවසීමට ඇත්තේ අපට හුරුපුරුදු පරණ කතාවම පමණි.
ලයනල් බෝපගේ
