මෙවර මැයි දිනය සැමරීම සඳහා සමගි ජන බලවේගය විසින් සිය පක්ෂය සමඟ එකතු වන ලෙසට එක්සත් ජාතික පක්ෂයට කළ ආරාධනයකට පිලිතුරු දෙමින් එම පක්ෂයේ මහලේකම් තලතා අතුකෝරල මහත්මිය ලිපියක් නිකුත් කර ඇත.Sri Lanka Latest News
ඇය එම ලිපියෙන් දැනුම් දී ඇත්තේ, මෙවර මැයි දිනය යෙදී ඇති පළමු වැනිදා පසළොස්වක පොහෝ දිනයක් බැවින්, එදින දේශපාලන කටයුතුවල නොයෙදී ආගමික උත්සව සඳහා වෙන් කිරීමට එක්සත් ජාතික පක්ෂය කලින්ම තීරණය කළ බවය.
මැයි පළමු වෙනිදා පොහෝ දිනයක් වුවහොත් දේශපාලන කටයුතුවල යෙදීම සුදුසු නොවන බවට රණසිංහ ප්රේමදාස මහතා අගමැතිවරයා ලෙස සිටි සමයේ පෙන්වා දී ඇති බව ඇය සිහිපත් කරයි.
එබැවින් සමගි ජන බලවේගයේ හෝ වෙනත් පක්ෂයක හෝ මැයි දින රැලිවලට සහභාගී වීමට එක්සත් ජාතික පක්ෂයට අවකාශක් නොමැති බව ඇය දැනුම් දී තිබේ.
එක්සත් ජාතික පක්ෂ සහ සමගි ජන බලවේගය එකට එකතු වී වැඩකිරීම බොහෝ දෙනෙකුගේ අපේක්ෂාව බවත් එබැවින් අනාගත දේශපාලන කටයුතුවලදී එකට වැඩ කිරීමට එක්සත් ජාතික පක්ෂය සූදානම් බවත් ඇය සිය ලිපියෙන් වැඩිදුරටත් දැනුම් ද තිබේ.
කෙසේවෙතත් මේ සම්බන්ධයෙන් අප රාජ්ය රහස් තීරයේ අවසථා කිහිපයකදීම සජබ එජාප එකමුතුව කඩන භූතයන් දෙදෙනකු පිළිබදවත්, ඔවුන්ගේ සැලසුම් පිළිබදවත් හෙළිදරව් කිරීමට කටයුතු කළෙමු.
මේ ඒ සම්බන්ධයෙන් කළ එක් හෙළිදරව්වකි.
සජබය මාලිගාවත්තට
උද්ගත වූ ප්රශ්න හමුවේ ආණ්ඩුව මේ ආකාරයට ජනප්රියත්වයෙන් පහළ වැටෙද්දී විපක්ෂය ඔළුව උස්සා ඇති ආකාරයක් මේ වනවිට දැකගැනීමට පුළුවන. මේ නිසාම ගල්අඟුරු වංචාව මුල් කරගෙන කුමාර ජයකොඩි මහතා අමාත්ය ධුරයෙන් ඉවත් වීමත් සමග සජබය තීන්දු කළේ කලින් නොපැවැත්වීමට සැලසුම් කර තිබූ මැයි රැලිය පැවැත්වීමටය. සාමාන්යයෙන් මේ වනවිට දේශපාලන තත්ත්වය දෙස බලද්දී මැයි රැලියක් සංවිධානාත්මකව විශාල පිරිසක් සහභාගී කරවාගෙන පැවැත්විය හැකි පක්ෂ ඇත්තේ අතේ ඇඟිලි ගණනටත් වඩා අඩුවෙනි. මාලිමාව කල්තියාම කියා සිටියේ තමන් මෙවර මැයි රැලිය පවත්වන බවකි. සජබයද මාලිගාවත්ත පී.ඩී. සිරිසේන ක්රීඩා පිටියේ මේ වනවිට මැයි රැලියක් පැවැත්වීමට තීරණය කොට ඇති අතර, ශ්රීලනිපය බොරැල්ල කැම්බල් පිටියේ සිය මැයි රැලිය පැවැත්වීමට තීරණය කොට ඇත. පෙරටුගාමී සමාජවාදී පක්ෂය සිය මැයි රැලිය පැවැත්වීමට තීරණය කොට ඇත්තේ කොළඹ හයිඩ් පිටියේදීය. මහ සඟරුවනේ ඉල්ලීම පරිදි වෙසක් පොහෝ දිනය මැයි 30 වැනි දිනට යෙදීමට ආණ්ඩුව තීරණය කොට තිබුණද, එජාපය සහ පොහොට්ටුව මැයි පළමු වැනි දිනටම වෙසක් පොහොය යෙදී ඇති බව කියමින් මැයි රැලි නොපවත්වන බව කල් තියාම ප්රකාශයට පත්කර සිටියේය. එජාපය සූදානම් වන්නේ එදිනට ආගමික වතාවත් පවත්වා බුරියානි දන්සලක් දීමටය. නමුත් ඇත්තම කතාව නම් සෙනග දාහක්වත් එකතු කරගැනීමට නොහැකි වීම මත එජාපය මැයි රැලියක් පැවැත්වීමෙන් වැළකී සිටින බවය.
නමුත් ගැටලුව ඇත්තේ එහි නොවේ. මීට පෙර අවස්ථා ගණනාවකදීම අප මෙම තීරයෙන් වාර්තා කර සිටියේ සජබය සහ එජාපය අතර ගොඩනැගෙමින් පවතින සමගිය කඩාබිඳ දැමීම සඳහා එජාපයේ සිටින දෙතුන් දෙනකු තිරය පිටුපස විවිධ මෙහෙයුම් දියත් කරමින් සිටින බවය. පක්ෂ දෙක එකමුතු කිරීම සඳහා සජබ නායක සජිත් ප්රේමදාස මහතා එජාපයේ ජ්යෙෂ්ඨයන් සමග සාකච්ඡා වට කීපයක් පැවැත්වූ අතර, එය ඉතා සාර්ථක බව දෙපාර්ශ්වයෙන්ම ප්රකාශයට පත්විය. නමුත් පක්ෂ දෙකේ එකමුතුව කඩාබිඳ දැමීම සඳහා එජාපය ඇතුළේ සිටින භූතයන් දෙදෙනකු කටයුතු කරන බව පළමු වතාවට රටට හෙළි කළේ අප නොව, එජාපයේම ජ්යෙෂ්ඨයකු වන රවී කරුණානායක මහතාය. හෙතෙම කියා සිටියේ මේ භූතයන් දෙදෙනා රනිල් සමීපයේ සිටිමින් රනිල්වත්, එජාපයත් විනාශ කරනවා යැයි කියාය. රවී කළ මෙම කතාව සාධක සාක්ෂි සහිතවම ඔප්පු කර පෙන්වීමට අවස්ථා ගණනාවකදීම අප මෙම තීරයෙන් කටයුතු කර සිටියෙමු.
සජිත් පසුගිය කාලයේදී රුවන්, නවීන්, අකිල, තලතා, සාගල ආදීන් සමග කළ සාකච්ඡා සාර්ථක වීම මත මේ වනවිට ඇත්තේ එය ලිඛිත ලියවිල්ලක් දක්වා වූ අවසානයක් කරා රැගෙන යෑම පමණි. නමුත් මේ අවස්ථාවේදී ඡන්දයක් හෝ විශේෂ දේශපාලන තත්ත්වයක් නොමැති නිසා පක්ෂ දෙක එකතුකොට ගිවිසුම්ගත වනවාට වඩා සජිත්ගේ සැලැස්ම වී ඇත්තේ මැතිවරණයක් මුල්කරගෙන ඒ ආසන්නයේදී උත්සවාකාරයෙන් මුළු රටටම පෙනෙන පරිදි මෙම පක්ෂ දෙක එකතු කිරීමටය. නමුත් ලිඛිතව පක්ෂ දෙක තවමත් එකතු නොවුණද, බිම් මට්ටමේ සිටින සජබ සහ එජාප පාක්ෂිකයන් දැනටමත් ඒකාබද්ධව කටයුතු කරමින් සිටින ආකාරයක් දැකගත හැකිය. ඒ අනුව සජිත් මැයි දිනය සැලසුම් කරද්දීම පක්ෂයේ ජ්යෙෂ්ඨයන් සමග අදහස් හුවමාරු කරගෙන තිබූ ප්රධාන කරුණක් වූයේ මෙවර මැයි රැලියට එජාප ජ්යෙෂ්ඨයන්ටද ආරාධනා කොට, එය සජබ-එජාප නායකයන් එකතු වූ අවස්ථාවක් ලෙස අතිඋත්කර්ෂවත් ආකාරයෙන් පැවැත්වීමටය. මැයි දිනයට දින කීපයක් තබා සජබ සභාපති කබීර් හෂීම්, සජබ මහලේකම් රංජිත් මද්දුමබණ්ඩාර යන මහත්වරුන් සමග ඒකාබද්ධව පවත්වන විශේෂ මාධ්ය හමුවකදී සජිත් මෙම විවෘත ආරාධනාව එජාප නායකයන් වෙත සිදුකිරීමටද සැලසුම් කර තිබිණි. ඉන් අනතුරුව රංජිත් මද්දුමබණ්ඩාර හරහා නිල ආරාධනාව ලිඛිතව එජාපයට යැවීමටද සජිත් සැලසුම් කර තිබිණි.
කෙසේ වෙතත් සජිත්ගේ මෙම සැලසුම කල් තියාම එජාපයේ සිටින භූතයන් දෙදෙනාටද දැනගන්නට ලිබිණි. ඒ අනුව ලාම්පු තෙල් ගැසූ ගැරඬින් සේ කලබලයට පත් මෙම භූතයන් දෙදෙනා එතැන් සිට කටයුතු කළේ මැයි දිනයේදී ඇතිවීමට යන මෙම එකමුතුව කඩාකප්පල් කිරීමටය. ඒ අනුව මුලින්ම රනිල්ගේ නිවුස් ප්ලාන්ට් කල්ලිය හරහා රනිල්ගේ පවුලට අයත් ලංකාදීප වෙබ් අඩවියේ පුවතක් පළකළ මෙම භූතයන් දෙදෙනා මැයි දිනය වෙසක් පෝය දිනටම යෙදී ඇති බැවින් දේශපාලන රැලි නොපවත්වා ආගමික වතාවත්වලට මුල් තැන දෙන ලෙස නායක හිමිවරුන් විසින් ඉල්ලා ඇති බවට පුවතක් පළකිරීමට පියවර ගත්හ. නමුත් එම ලිපිය ලියූ මාධ්යවේදියකුගේ නමක් හෝ එම ඉල්ලීම කළ නායක හිමිනමකගේ නමක් හෝ එහි සඳහන් නොවීම විශේෂ සිදුවීමක් විය. මේ හරහා මෙම භූතයන් දෙදෙනාගේ සැලසුම වී තිබුණේ සජබ මැයි රැලිය කෙසේ හෝ කඩාකප්පල් කිරීමය.
