යුද සමයේදී කොටි නායක ප්රභාකරන් විසින් වැදගත් සාකච්ඡා පවත්වන ලද කිළිනොච්චියේ වට්ටකච්චි ප්රදේශයේ අක්කර හතක ඉඩමක් යුද හමුදාව විසින් ආපසු බාර දී තිබෙනවා. Sri Lanka Latest News
කෘෂිකර්ම දෙපාර්තමේන්තුවට අයත් මෙම විශාල භූමියේ ගොඩනැගිලි සංකීර්ණ ගණනාවක් පිහිටා තිබූ අතර ප්රභාකරන් දකුණේ ජනමාධ්යවේදීන් සමග 2002 වසරේ අප්රේල් මාසයේදී සාකච්ඡාවක් පවත්වන ලද්දේද මෙම ඉඩමේ පිහිටි ගොඩනැගිලි සංකීර්ණයක් තුළදීය.
එපමණක් නොව උතුරේ ජෙයෂ්ඨ පරිපාලන නිලධාරීන් සදහා කොටි නායකයින් විශේෂ සාකච්ඡා පවත්වන විටද යොදා ගනු ලැබුවේද විශාල අඹ වත්තක පිහිටි මෙම ගොඩනැගිලි සංකීර්ණයයි.
සාකච්ඡාවලට සහභාගී වූ අමුත්තන්ට ආහාරයෙන් පසුව අතුරුපස වශයෙන් ලබා දුන් කරත්ත කොලොම්බන් අඹ සපයා දුන්නේද එම අඹ වත්තේ පලදාවෙනි.
යුද්ධයේදී යුද හමුදාව විසින් කිළිනොච්චිය අත්පත් කර ගැනීමෙන් පසුව එම ගොඩනැගිලි සංකීර්ණය යුද හමුදාවේ ප්රයෝජනයට ලබා ගෙන තිබූ අතර වසර 15 කට පමණ පසුව එම අක්කර හතක භූමිය හා ගොඩනැගිලි කෘෂිකර්ම දෙපාර්තමේන්තුව වෙත යුද හමුදාව විසින් බාර දෙනු ලැබුවා.
එම ඉඩම කෘෂිකර්ම දෙපාර්තමේන්තුවේ පුහුණු සැසි පවත්වන මධ්යස්ථානය ලෙස 2009 වසරට පෙර යොදා ගෙන තිබූ අතර ඉඩම නිදහස් කිරීමෙන් පසුවද එම කටයුතු සදහා ඉඩම හා ගොඩනැගිලි සංකීර්ණය යොදා ගැනීමට බලාපොරොත්තු වෙනවා.
