මේජර් ජෙනරල් ගාල්ලගේට එරෙහිව මඩ බළකායක් දැන් දින කිහිපයක සිට ක්රියාත්මක වී ඇත.. මඩ ගහන එවුන් දෙස බලන විට ඒවාට පිළිතුරු දිය යුතු නැති වුවත්, මඩ ගහන එවුන් ඒ මහා පුරුෂයාගේ පාදයේ ගෑවෙන දූවිල්ලක් තරමටවත් වැදගත්කමක් නැති එවුන් වුවත්, ඒ ගැන යමක් නොකියා සිටීමටද නොහැක.Sri Lanka Latest News
ජෙනරල් ගාල්ලගේ යනු කිසිදු වරදානයක් වරප්රසාදයක් උදෙසා මවුබිමට එරෙහි ක්රියාවකට දශමයකින්වත් නම්මාගත හැකි චරිතයක් නොවේ. ඔහුගේ ජීවිතයේ කිසිම දිනක කිසිවකු පසුපස ගොස් තනතුරු වරප්රසාද ලබාගත් පුද්ගලයෙකුද නොවේ. ඔහු කිසිදු ආණ්ඩුවක් පසුපස නොගිය අතර ඔහු හැමදාම සිටියේ රාජ්යය වෙනුවෙන්ය. රාජ්යයට අහිතකර යමක් සිදුවේ නම් ඔහු කොන්දේසි විරහිතව එයට එරෙහිව නැගීසිටියේය. කතා කළේය.
මෙරට ගිලගත් බිහිසුණු ත්රස්තවාදයට එරෙහි සටනේ ඔහු ඔටුනු නොපලන් රජකු විය. යුද පිටියේ දීද ඔහු පිටුපස සිට අණදුන් සෙනෙවියකු නොව, පෙරමුණේ ඉදිරියේ සෙබළුන් සමග මරුවාට බිය නැතිව සටන් කළ මිනිසෙකු විය.
තමාගේ මිතුරෙක් වුවත්, නැති වුවත්, පිටියේ සැබෑ සටන්කරුවාට ඔහු ගරු කළේය. අගය කළේය. එමෙන්ම පෙරමුණේ සටන් කරද්දී යුද හමුදාපතිවරයාගේ වුවද වැරදි නියෝගයකට එරෙහිව අභියෝග කිරීමට තරම් ආත්මශක්තියක් ඔහුට විය.
මේජර් ජෙනරල් චාගි ගාල්ලගේගේ නම බිහිසුණු ත්රස්තවාදීන් බියගන්වන නමක් විය. ඒ බිහිසුණු ත්රස්තවාදය විනාශ කරදැමීම සඳහා පෙරමුණේ සටන් කළ ඔහුට, එම ජයග්රහණයට අහිතකර දෙයක්, අවමානයක් වන දෙයක්, සිදුවන විට නිහඬව බලාගෙන සිටීමට නොහැකි වීම සාධාරණය. විශේෂයෙන්ම ඔහු වැනි කශේරුකාවක් ඇති සෙන්පතියන්ට එය කළ නොහැකිය.
ශ්රී ලංකා යුද හමුදාවේ ඉතිහාසයේ ගරුකටයුතු නමක් ලෙස ඉහළින්ම රඳවා ඇති නමක් ඔහු හිමි කරගෙන ඇත. ඔහු යමක් ප්රකාශ කරන විට ඒ පිළිබඳ අවබෝධයක් නැතුව ප්රකාශ කරන්නෙක් නොවේ. කෙසේ වෙතත් ඔහුගේ ප්රකාශයකින් පසුව සමාජයේ යම් කතාබහක් ඇතිවී එම ප්රකාශයට අදාළ කරුණ සිදු නොවන බවට දැන් සහතිකයක් ලැබී ඇත. එසේ සහතිකයක් ලබාගැනීමට හැකි වූයේ ඔහු යම් ප්රකාශයක් කළ නිසාය.
මිනිසුන්ට ජීවිතේ වටිනා සිහිවටන සහිත ඡායාරූප තිබේ. මගේ ජීවිතයේ මම එවැනි ඉතා වටිනාකමක් විශ්වාස කරන ඡයාරූපයක් මෙහි ඇතුළත් කළෙමි. මේ මවුබිම ආරක්ෂා කිරීමේ මහා සටනේ පතාක යෝධයන් වැනි මහා සෙන්පතියන් දෙදෙනකුට මැදිව සිටිය ඡායාරූපයක් ලබාගැනීම හැකිවීම මම වාසනාවක් කොට සලකමි.
ඒ බිහිසුණු ත්රස්තවාදය අවසන් ගමන් යැවූ සටනේ නියමුවන් දෙදෙනකු හෝ මේජර් ජෙනරල් චාගී ගාල්ලගේ සහ මේජර් ජෙනරල් විජිත රවිප්රිය අතර සිට ගන්නා ලද ඡායාරූපයයි.
මේ රටේ ඉතිහාසයේ හිමිදිරිය ගැන සිතන විට වේළුසුමන සහ නන්දිමිත්ර මහා සෙනෙවියන් අතර සිට ගන්නා ලද ඡායාරූපයක් තරමට එය හදවතට දැනෙන එකකි. මේ මහ පොළොවට ආදරය කරන මිනිසුන් ඔබටද ආදරය කරති. එය කිසිදා වෙනස් නොවන සත්යයකි.
අමනයන්ගේ මඩවලින් ඔබව අපිරිසිදු කිරීමට නොහැක. එසේ අපිරිසිදු කිරීමට නොහැකි තරම් ඔබ සුවඳවත් ලංකා පුත්රයන්ය.
ලාල් ද අල්විස්
