රජයට ඉදිරිපත් කර ඇති යෝජනාවලියට සාධාරණ විසඳුමක් නොලැබුණහොත් අඛණ්ඩ වැඩ වර්ජනයකට යොමුවීමට තම සංගමයට සිදුවන බව රජයේ වෛද්ය නිලධාරීන්ගේ සංගමය පවසයි.Sri Lanka Latest News
තම සංගමය මගින් ශ්රී ලංකා වෛද්ය සේවාවට අනන්ය වූ වැටුප් දීමනා ලබාදීම, අමතර රාජකාරි දීමනාව ස්ථාවර දීමනාවක් ලෙස වැටුපට එක්කිරීම ඇතුළුව ඉල්ලීම් පහක් මුල්කර ගෙන රජයට ඉදිරිපත් කර ඇති යෝජනාවලියට රජය මෙතෙක් යහපත් ප්රතිචාරයක් නොදැක්වීම නිසා, ඉකුත් 23දා පැය 48ක සංකේත වර්ජන ක්රියා මාර්ගයක් ඇරඹුවද ඊට පසුවද සාධාරණ විසඳුමක් ලබා නොදුණහොත් දැඩි වෘත්තීය සමිති ක්රියා මාර්ගයකට යාමට තම සංගමය තීරණය කර ඇතැයි එම සංගමයේ ලේකම් වෛද්ය ප්රභාත් සුගතදාස මහතා ‘මව්රට’ට පැවැසීය.
වෛද්ය ගැටලුවලට විසඳුම් ලබාගැනීම සඳහා ඉදිරිපත් කළ යෝජනාවලියට විසඳුම් ලබාදීමට සෞඛ්ය අමාත්යාංශය කල් මරමින් සිටීම නිසා මෙවැනි ක්රියා මාර්ගවලට යොමුවීමට තම සංගමයට සිදුවී ඇති බවද ලේකම්වරයා කීවේය.
පවතින ගැටලුසහගත තත්ත්වය පිළිබඳ තම සංගමය මේ වනවිට ජනාධිපතිවරයා මෙන්ම, සෞඛ්ය අමාත්යවරයා සමග සාකච්ඡා කර ඇති බවද, තම යෝජනාවලියට රජය පැත්තෙන් තවමත් සාධාරණ පිළිවෙතක් ඉදිරිපත් වී නොමැති බවද ලේකම්වරයා කීය.
දිවයින පුරා රෝහල්වල රාජකාරියේ නිරත වෛද්යවරු එක්ව සංකේත වැඩවර්ජනයක් පැවැත්වුවද, ඒ කෙරෙහිත් අවධානය යොමුකොට සාධාරණ විසඳුමක් ලබා නොදුණහොත්, ඉදිරියේදී අඛණ්ඩ වැඩවර්ජන ක්රියා මාර්ගයක් ගැනීමට තම සංගමයට සිදුවන බවද ලේකම් වෛද්ය සුගතදාස මහතා අවධාරණය කළේය.
නන්දන ශ්රී දොරකුඹුර
