අනුර චීන නියෝජිත හමුව චීන කොමියුනිස්ට් පක්ෂයේ ඉහළ පෙළේ නිලධාරියකු වූ Wang Junzheng ලංකාවට එන බව නිවේදනය කළ විගසම ඉන්දීය අගමැති මෝදිගේ විශේෂ නියෝජිතයකු ලෙස ඉන්දීය විදේශ ඇමැති ජෙයශංකර් ලංකාවට ආවේය. ජෙයශංකර් ලංකාවට ඇවිත් දිට්වා සුළි කුණාටුවෙන් විනාශ වූ ප්රදේශ යළි ඉදිකිරීම සඳහා ඩොලර් මිලියන 450ක සහන පැකේජයක් නිවේදනය කළේ චීන දූතයාගේ ගමන පහළට ඇද දමමිනි.Sri Lanka Latest News
අනුර චීන දූතයා හමුවූ විටදී සුළි කුණාටුවෙන් විනාශවී ගිය දුම්රිය මාර්ග පද්ධතිය හදන්න චීන විශේෂඥයන්ගේ උදව් ඉල්ලුවේය. අනුර චීනයෙන් හානිවූ දුම්රිය මාර්ග පද්ධතිය හදන්න චීන තාක්ෂණික විශේෂඥ සහාය ඉල්ලා සිටියේ චීනය ආපදාවලින් විනාශ වූ රටවලට ගොඩ එන්න තම තාක්ෂණික විශේෂඥ සහාය දෙන්න කැමැත්තෙන් සිටින නිසාය. ඒ සම්බන්ධයෙන් චීනයට ඇති පළපුරුද්ද චීනය ආපදාවලින් විනාශ වූ රටවලට ලබාදෙන්න කැමැතිය.
ඒත් යුද්ධයෙන් විනාශ වූ උතුරු දුම්රිය පද්ධතිය යළි හදන්න විශේෂඥ සහාය සහ ආධාර ලබාදුන්නේ ඉන්දියාවය. දුම්රිය සාමාන්යාධිකාරී කියා සිටියේ උතුරේ රේල්වේ ලයින් යාවත්කාලීන කරපු ඉන්දීය සමාගම සුළි කුණාටුවෙන් විනාශ වූ දුම්රිය මාර්ග පද්ධතිය යළි හදන්න සහාය දෙන්න කැමැත්ත පළකර ඇති බවය.
ආපදාවෙන් ලංකාව යළි ගොඩනගන්න චීනය සහ ඉන්දියාව අතර ඇති තරගකාරීත්වය ලංකා ආණ්ඩුව කෙසේ කළමනාකරණය කරයිද කියා තවම පැහැදිලි නැත.
මේ අතර විදේශ ඇමැති විජිත හේරත් මෙරට චීන තානාපති හමුවී විදුලි වාහන සඳහා ලංකාව පුරා චාර්ජින් නෙට්වර්ක් හදන්න චීනයේ ආධාර ඉල්ලා ඇති බව මාධ්ය වාර්තා කර ඇත. ඉදිරියේදී ලංකාවට විදුලි බස් රථ හඳුන්වා දෙන්න ආණ්ඩුව බලාපොරොත්තු වන බවද විදේශ ඇමැති පවසා ඇත.
ලංකාව බස් මිලදී ගන්නේ ඉන්දියාවෙනි. ලංකාවේ භාවිත වන්නේ ඉන්දීය ටාටා බස් රථය, චීනය ලංකාව පුරා විදුලි වාහන චාර්ජින් ස්ටේෂන් හදන්න ආධාර කරනවා නම් එසේ කරන්නේ නිකම් නොවේ. එවිට චීනයේ විදුලි බස් මිලදී ගැනීමට ලංකාවට සිදුවේ. ඉන් පහර වදින්නේ ඉන්දීය බස්වලටය. ඉන්දියාව මේ යෝජනාව ඉවසා සිටීද කියා තවම නිශ්චිතව කිව නොහැකිය.
