මහජන දේපළ අවභාවිතා කිරීම යන චෝදනාව යටතේ, පසුගිය සැප්තැම්බර් මාසයේ සිට මේ දක්වා, අල්ලස් හෝ දූෂණ චෝදනා විමර්ශන කොමිෂන් සභාව හිටපු රාජ්ය නිළධාරීන් කිහිප දෙනෙකුම අත්අඩංගුවට ගෙන තිබේ.Sri Lanka Latest News
අද දිනයේ දී මුදල් අමාත්යංශයේ හිටපු ලේකම්වරයෙකු මෙන්ම හිටපු අග්රාමාත්ය රනිල් වික්රමසිංහ මහතාගේ ජ්යේෂ්ඨ උපදේශකයෙකුද වූ චරිත රත්වත්තේ මහතා අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගනු ලැබී ය.
ඒ, 2015 වසරේ දී රාජ්ය වාණිජ නීතිගත සංස්ථාව හරහා නිසි ක්රමවේදයෙන් බැහැරව රුපියල් කෝටි නමයකට වඩා වැඩි වටිනාකමකින් යුතු තාවකාලික වී ගබඩා ආනයනය කිරීමේ සිදුවීමක් සම්බන්ධයෙනි.
ශ්රී ලංකා දුම්රිය සේවයේ හිටපු සාමාන්යාධිකාරවරයෙකු වන සුමතිපාල මහානාම සහ රාජ්ය ඉංජිනේරු සංස්ථාවේ හිටපු විධායක අධ්යක්ෂ සරච්චන්ද්ර ගුණරත්න යන අය ඊයේ දිනයේ දී අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගනු ලැබී ය.
ඉන්ජිනේරු සංස්ථාවේ හිටපු විධායක අධ්යක්ෂවරයා අත්අඩංගුවට ගෙන තිබුණේ එජාප මූලස්ථානය වන සිරිකොත නවීකරණය කිරීම සදහා රුපියල් ලක්ෂ 16 කට වඩා වැඩි මහජන මුදලක් අවභාවිතා කිරීම සම්බන්ධයෙනි.
ඔක්තෝබර් 31 වන දා, රාජ්ය වාණිජ නීතිගත සංස්ථාවේ හිටපු සභාපති හුසේන අහමඩ්, අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගනු ලැබී ය.
ඒ, 2015 වසරේ දී, කොටි නමයකට වඩා වැඩි මුදලක් වැය කරමින් නිසි ක්රම සම්පාදන ක්රියාවලියෙන් තොරව තාවකාලික ගබඩා මිල දී ගැනීමේ සිදුවීමක් සම්බන්ධයෙනි. (මුදල් අමාත්යංශයේ හිටපු ලේකම්වරයෙකු වූ චරිත රත්වත්තේ අත්අඩංගුවට ගෙන තිබෙන්නේ ද මෙම චෝදනාවට අදාලවයි.)
හිටපු රාජ්ය අමාත්ය ශෂීන්ද්ර රාජපක්ෂට අනීතිකව වන්දි මුදලක් නිකුත් කිරීම යන චෝදනාව මත, වන්දි ගෙවීමේ කාර්යාලයේ හිටපු වැඩ බලන අධ්යක්ෂ, සේපාලිකා සමන්කුමාරි ද අල්ලස් හෝ දූෂණ චෝදනා විමරශන කොමිෂන් සභාව මගින් පසුගිය දා අත්අඩංගු-වට ගනු ලැබීය.
ඊට අමතරව, නාගරික සංවර්ධන අධිකාරියට අයත්, කොළඹ 5, මයුර පෙදෙසේ පර්චස් පනස් පහක ඉඩමක් බදු දීමේ දී රජයට කෝටි තුනකට ආසන්න මුදලක් පාඩු කිරීමේ සිදු වීමක් සම්බන්ධයෙන්, නාගරික සංවර්ධන අධිකාරියේ හිටපු අධ්යක්ෂ ජනරාල් සුමේධ රත්නායක සහ තවත් නිළධාරියෙකු අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංග-ුවට ගන්නා ලදී.
