මහ මැතිවරණය ළංවෙත්ම දේශපාලන පොරපිටියද උණුසුම් වෙලා. ඇතැම් දේශපාලනඥයන්ගේ හදවත් තුළ දැවෙන අනාගත බලාපොරොත්තු දැන් දැන් එළියට පනින්න පටන් අරන්. අනාගත ජනාධිපති – අගමැති වීමේ සිහිනයක්ද දැන් දැන් දේශපාලන කරළිය තුළින් මතුවෙනවා. ඒ සඳහා තම තමන් සතුව ඇති දේශපාලන ජ්යෙෂ්ඨත්වය ගැන ජනතාවට කියෙන්නේද අන්න ඒ අනාගත සිහින දකින අයයි. ඒවගේ අනාගත අගමැති ජනපති සිහින දැන් තියා දකින දේශපාලන කතාවක් පසුගිය සතියේ අපට අසන්නට ලැබුණේ නුවරඑළිය දිස්ත්රික්කයෙන්ය. නුවරඑළිය දිස්ත්රික්කයෙන් එක්සත් ජාතික පක්ෂයේ (අලියා) ලකුණෙන් තරග කරන අපේක්ෂක නවීන් දිසානායක මහතා එවැනි කතාවක් කීවේ නුවරඑළිය දිස්ත්රික්කයේ පැවැති දේශපාලන රැලියකදීය. ඔහු එදා කිව් ඒ කතාව ජනමාධ්ය හරහා ප්රචාරය වී තිබුණේ මෙන්න මෙහෙමයි.
‘එක්සත් ජාතික පක්ෂයේ නායකත්වයේ වෙනසක් තියෙන්න ඕනෑ. අවුරුදු 26ක් එක් අයකුට නායකත්වයේ ඉන්න බැහැ. අපි ඒක ප්රසිද්ධියේ කියන්නෙ හංගන්න දෙයක් නැහැ. මම පක්ෂයේ නායකයා වෙන්න සුදුසුකම් තියෙනවා. මම ජනාධිපති, අගමැති වුණොත් ඉස්සෙල්ලාම වැඩ කරන්නෙ නුවරඑළියේ ජනතාවටයි. ලබන 25දා රනිල් නුවරඑළියට ආවහම අපේ අදහස් අපි එළිපිට කියනවා. මම දැන් ඉන්නෙ පක්ෂයේ තුන්වැනි, හතරවැනි තැන්වලයි. මට ඕනෑ පළමුවැනියා වෙන්නයි. ඒ සඳහා මට අවශ්ය වන්නේ පොඩි තල්ලුවක් පමණයි.’
මේ දේශපාලන කතාව කඳුකරයේ එසේ රැව්දෙද්දී අපි එක්සත් ජාතික පක්ෂයේ සාමාජිකත්වය දරාසිටින දේශපාලනඥයන් කිහිපදෙනකුගෙන්ම ඒ ගැන අදහස් විමසීමක් කළා.
දගලපු කිසිකෙනෙක්ට නායකත්වය ලැබුණේ නෑ -දයා ගමගේ
‘එක්සත් ජාතික පක්ෂයේ නායකයා වෙන්න දඟලපු කිසිකෙනකුට නායකත්වය ලැබුණෙ නැහැ. අගමැති ජනාධිපති වෙන්න එක්සත් ජාතික පක්ෂයේ සිටි ලලිත් ඇතුලත්මුදලි, ගාමිණී දිසානායකලාත් ඒ තනතුරු බලාගෙන වැඩ කළා. ගාමිණී වෙනත් පක්ෂයක් හදාගෙන ගිහින් ජනාධිපති වෙන්න උත්සාහ කළා. ඒ දෙන්නම පැරදුණා. ජනාධිපති ප්රේමදාස මහතා ඝාතනය වුණායින් පස්සෙ කවුරුත් හිතුවේ නැති ඩී. බී. විජේතුංග ජනාධිපති වුණා. චන්ද්රිකාගේ කාලෙත් ඒවගේ දේවල් තමයි සිදුවුණේ. ඒකාලෙ ජනාධිපති සිහින මැව්ව අය පරදා කවුද ජනාධිපති, අගමැති වුණේ. මහින්ද රාජපක්ෂ. කවුරුත් හිතපු නැති අයටයි ඒ තනතුරු ලැබුණෙ. හැම දෙයක්ම සිදුවන්නේ කවුරුත් සිතන අන්දමට නෙවෙයි. දේශපාලනය තුළ හැකියාව, පළපුරුද්ද තියෙන්න ඕනෙ. මම නම් එක්සත් ජාතික පක්ෂයේ කිසිම තනතුරක් ඉල්ලා නැහැ. කවුද හිතුවෙ ගෝඨාභය ජනාධිපති වෙයි කියලා. නමුත් හැම දෙයක්ම සිදුවන්නේ කවුරුත් හිතන විදියට නෙවෙයි. දින පනස් දෙකේ දේශපාලන වෙනස්වීමෙන් පසුව මට සමෘද්ධි අමාත්යාංශය ලැබී තිබුණා. ඒ වෙලාවේ මම සමෘද්ධිය ලැබිය යුතුව තිබුණු පන්ලක්ෂ තිස්හයදහසකට මාස දෙකක් ඇතුළත සමෘද්ධිය ලබා දුන්නා. තවත් තිස්අටදහසකට වැඩිහිටි දීමනාව ලබා දුන්නා. ආබාධිත අයට වගේම වකුගඩු රෝගීන්ටද සහන සලසා දුන්නා.
හැම කෙනෙකුටම බලාපොරොත්තු තියාගන්න පුළුවන්- අකිල විරාජ්
අපේ පක්ෂයේ හැම කෙනකුම නායකත්වය ගැන බලාපොරොත්තු තියාගන්න පුළුවන්. ඒ වගේ අය අපේ පක්ෂයේ හුඟාක් ඉන්නවා. නවීන් මන්ත්රීවරයා දරන අදහස ගැන ප්රශ්නයක් නැහැ.
පක්ෂයෙන් පිට ගිහින් ආපු කෙනෙක් කියන කතා ගැන පුදුමයක් නෑ -එජාප ප්රබල ජ්යෙෂ්ඨයෙක්
‘පක්ෂයෙන් පිටගිහින් ආපහු ආව අයෙක් එහෙම කියන එක පුදුමයක් නොවේ. ඒක පක්ෂයට හොඳ නැහැ. පක්ෂය ගැන හැඟීමක් නැති අය පක්ෂයේ අය අතර භේද ඇති කරන්නයි ඔය වගේ දේවල් කියන්නෙ.
මං ඕවට උත්තර බඳින්නේ නෑ -අර්ජුන රණතුංග
මම ඔය එක එක දේශපාලනඥයන් කියන දේවල්වලට උත්තර බඳින අයෙක් නෙවෙයි. මම මගෙ දෙයක් තියෙනවා නම් ඒ වෙලාවට ඒක කියන්නම්. මා එක්ක තරහ වෙන්න එපා මෙහෙම කිව්වට.
උත්තර දුන්නත් වජිරගෙන් උත්තරයක් නෑ
‘කවුද කතා කරන්නේ’ මම ‘මව්රට’ පත්තරයෙන්. විමසූ ඔහු අදාළ ප්රශ්නය යොමුකරද්දී දුරකතනය විසන්ධි නොකර පැත්තකින් තැබුවේය. ඊට පසු පැය භාගයක් කතා නොකරන දුරකතනයේ රැඳී සිටි අප පසුව දුරකතන සබඳතාව අප විසින්ම විසන්ධි කළෙමු.
සාගල නායකතුමා එක්ක සාකච්ඡාවක
මේ ගැන විමසීමට 22දා උදේ 8.45ට ඔහුගේ දුරකතනය හා සම්බන්ධ වූ විට ඔහු සඳහන් කළේ එදිනම දහවල් 12.30ට කතා කරන ලෙසයි. එම වෙලාවටම යළි කතා කළ විට දුරකතනය ඇමැතූ පුද්ගලයකු සඳහන් කළේ අපගේ දුරකතන අංකයට කතා කරන බවයි. ඊට අමතරව ඔහු පැවැසුවේ රත්නායක මහතා නායකතුමා සමඟ සාකච්ඡාවක යෙදී සිටින බවයි.
නවීන්ට හීනෙන් සුදු කොඩි පෙනිලා -පාලිත තෙවරප්පෙරුම
‘මේ වගේ කතා කියන්නෙ මැතිවරණ ළංවෙන කොට. ඕව ගණන් ගන්න ඕනෙ නැහැ. හීනෙන් සුදුකොඩි පේන කොටත් ඕවගේ කතා කියැවෙනවා. එයා එහෙම කියනවනම් අපිත් තනතුරුවලට සුදුසුයි. මම නම් කාටවත් රැකියා දෙනව, අරව දෙනවා කියල පොරොන්දු වෙන්නෙ නැහැ. ඒත් ඕනෑම අසාධාරණයකදී මම එතැනට ඇවිත් ඒකට විරුද්ධව නැඟී සිටිනවා.
ප්රේමලාල් විජේරත්න
