මෝදිගේ මාලදිවයින් සංචාරය ඉන්දීය මාධ්ය විසින් මෝදිගේ රාජ්යතාන්ත්රික ජයග්රහණයක් ලෙස සඳහන් කිරීම චීන මාධ්යයන්ට හොඳටම රිදිලා තිබේ. මෝදිගේ මාලදිවයින් සංචාරය ගැන චීනයේ ග්ලෝබල් ටයිම්ස් මාධ්ය කියන්නේ මෙවැනි විග්රහයක්ය. Sri Lanka Latest News
ග්ලෝබල් ටයිම්ස් ඇතුළු චීන මාධ්ය එලෙස කීවද මාලදිවයින් ජනාධිපතිගේ ඉන්දීය ප්රතිපත්තිය මේ වනවිට විශාල වෙනස්කමකට ලක්ව තිබේ. මාලදිවයින් ජනාධිපති බලයට පත්වූයේ ඉන්දියා අවුට් කැම්පේන් එකකින්. ඔහුට ජනවරම ලැබුණේද ඔහු ඉන්දියාවට එරෙහිව ගෙන ගිය ප්රචාරක ව්යාපාරය නිසාය. ජනාධිපති වූ විගස මාලදිවයින් ජනාධිපති ඔහුව බලයට පත් කළ ජනතාවට දුන්න පොරොන්දුව එලෙසම ඉටුකරමින් මාලදිවයිනෙන් ඉන්දීය හමුදා ඉන්දියාවට ගෙන්වා ගන්නා ලෙස මෝදිගෙන් ඉල්ලා සිටියේය. සාම්ප්රදායිකව මාලදිවයින් ජනාධිපතිවරු ජනාධිපති වූ පසු යන පළමු සංචාරය ඉන්දියාව වුවත් මාලදිවයින් ජනාධිපති මුයිසු ගියේ චීනයටය. මෙය ඉන්දියාවට ගහපු කම්මුල් පහරක් ලෙස ඉන්දියාව දැක්කේය. මෝදි මාලදිවයිනට පාඩමක් උගන්වනු ඇතැයි ඉන්දීය මාධ්ය කීවත් මෝදි ඉවසා සිටියේය. ඔහු මාලදිවයිනේ සංචාරය නොකරන ලෙස ඉන්දියානුවන්ගෙන් ඉල්ලා සිටියා මිස දැඩි ප්රතිචාරයක් දක්වන්න ගියේ නැත. ලංකාව ඉන්දීය බලපෑම මත චීන පර්යේෂණ නැව් තහනම් කරද්දී මාලදිවයින චීන පර්යේෂණ නැව්වලට එන්න අවසර දුන්නේ ඉන්දියාවේ අකැමැත්ත නොසලකා හරිමිනි. ඒත් මෝදි මාලදිවයින කෙරෙහි දැක්වූයේ ලොකු සහෝදරයා සමග තරහා වුණු පොඩි සහෝදරයකු තරහා අවසන් වූවාට පසු තමන් ළඟට එයි කියන මතයය. මෝදි නිවැරැදිය. අවසානයේ මාලදිවයින් ජනාධිපති මාලදිවයිනේ ආර්ථික අර්බුදය විසඳන්න මෝදිගේ සහාය ඉල්ලා ඉන්දියාවට ගියේය. මෝදිද පරණ තරහා අමතක කොට ඔහුට උදව් කළේය. මාලදිවයින් ජනාධිපති මෝදිට මාලදිවයින් නිදහස් උළෙලට එන්න ආරාධනා කළේය. මෝදි ඒ ආරාධනාව සුහදව පිළිගත්තේය. මාලදිවයින් ජනාධිපති මුයිසු බලයට පත්වීමට පෙර හිටපු මාලදිවයින් ජනාධිපතිගේ ප්රතිපත්තිය වූයේ ඉන්දියා ෆස්ට් ප්රතිපත්තියය. මුයිසු ආවේ ඉන්දියා අවුට් ප්රතිපත්තිය ක්රියාත්මක කරන්නටය. දැන් ඉන්දීය මාධ්ය කියන්නේ මාලදිවයින් ජනාධිපති ‘යූටර්න්’ එකක් ගසා ඇති බවය.
මෝදිගේ මාලදිවයින් සංචාරය අවසන් වෙනවාත් සමග ලංකාවේ චීන හිතවාදී ජවිපෙ නායක ජනාධිපති අනුර මාලදිවයින් ජනාධිපතිගේ ආරාධනයෙන් මාලදිවයිනට ගියේය. අනුර සහ ජවිපෙට වුණේ මාලදිවයින් ජනාධිපතිට වූ දේමය. ඔවුන්ද බලයට ඒමට පෙර දැඩි ඉන්දීය විරෝධී ප්රතිපත්තියක් පෙන්නුවේය. අනුර සිය පළමු විදේශ සංචාරය ඉන්දියාවට යෑමෙන් සහ මෝදි ලංකාවේ සංචාරය කිරීමෙන් පසු අනුරත් ජවිපෙත් වෙනස් වී ඇත. පසුගියදා ජවිපෙ මහ ලේකම් ටිල්වින් කීවේ ජවිපෙ 1976 ඉන්දියානු ව්යාප්තවාදය පන්තිය ජවිපෙ පන්ති පහෙන් ඉවත් කළ බවය. ජවිපෙ හිටපු සාමාජිකයන් කියන්නේ එය බොරු බවය. 1987 ඉන්දු-ලංකා ගිවිසුමට එරෙහිව ජවිපෙ සටන් කළේ ඉන්දියානු ව්යාප්තවාදය පන්තියේදී තමන් කී අනාවැකිය හරි කියමින් බවය. කෙසේ හෝ මෝදි සිය රාජ්යතාන්ත්රිකභාවය හරහා වශී කළ මුයිසු සහ අනුර බිත්ති හතර තුළ කතා කරන්නේ මොනවාදැයි ඉන්දියාව මෙන්ම චීනයද උනන්දුවෙන් බලා සිටී.
