මැයි 06 වැනිදා පැවති පළාත් පාලන ආයතන ඡන්ද විමසීමේ ප්රතිඵලවලට අදාළව රාජ්ය පරිපාලන, පළාත් සභා සහ පළාත් පාලන අමාත්යවරයාගේ ගැසට් නිවේදනයට අනුව එම සභා පිහිටුවීම හෙට (02) දිනයේදී සිදුකළ යුතු වෙයි. Sri Lanka Latest News
දේශපාලන පක්ෂයක් හෝ ස්වාධීන කණ්ඩායමක් විසින් බහුතර බලය හිමිකරගෙන ඇති ආයතන 161කට අදාළව සභා පිහිටුවීම හෙට දිනයේදී සිදුකළ හැකි අතර, අනෙකුත් ආයතනවල සභා පිහිටුවීම පළාත් පාලන කොමසාරිස්වරුන්ගේ ප්රධානත්වයෙන් එම පළාත් පාලන ආයතන රැස්වී තීරණය කරනු ඇත.
පළාත් පාලන ආයතන 339කට අදාළව මැයි 06 වැනිදා පැවති පළාත් පාලන ආයතන ඡන්ද විමසීමේ ප්රතිඵලවලට අනුව තේරී පත්වූ සහ තෝරා එවා ඇති සභිකයින්ගේ නම් මැතිවරණ කොමිෂන් සභාව මගින් ඊයේ දිනයේදී ගැසට් මගින් ප්රකාශයට පත්කර තිබුණි.
පළාත් පාලන ආයතන 161කට අදාළව බහුතර බලය දේශපාලන පක්ෂ හෝ ස්වාධීන කණ්ඩායම් විසින් හිමිකරගෙන ඇති අතර, තවත් ආයතන 178කට අදාළව තනි පක්ෂයක් හෝ ස්වාධීන කණ්ඩායමක් පූර්ණ ජයග්රහණයක් ලබාගෙන නැත.
ඒ අනුව මැතිවරණ කොමිෂන් සභාව මගින් ගැටලුවක් නොමැති පළාත් පාලන ආයතන සඳහා ඒ ඒ දේශපාලන පක්ෂ හෝ ස්වාධීන කණ්ඩායම් විසින් නම් කර එවා ඇති ආයතන ප්රධානීන්ගේ නම් ගැසට් මගින් ප්රකාශයට පත්කිරීමට කටයුතු කර තිබේ.
රාජ්ය පරිපාලන, පළාත් සභා සහ පළාත් පාලන අමාත්යවරයා පසුගිය පෙබරවාරි 17 වනදා නිකුත් කර ඇති ගැසට් නිවේදනය මගින්, පළාත් පාලන ආයතනවල ධුර කාලය හෙට දිනයේදී ආරම්භ විය යුතුය.
මේ අතර කිසියම් පක්ෂයකට බහුතර බලය හිමි නොවූ පළාත් පාලන ආයතනවල ප්රධානීන් පත් කිරීමේ බලය පළාත් කොමසාරිස්වරයා වෙත පැවරෙන බව මැතිවරණ කොමිසන් සභාව පවසයි.
පසුගිය දා පැවති පළාත් පාලන ආයතන ඡන්ද විමසීමේ දී කිසියම් පක්ෂයක් විසින් බහුතර බලය හිමිකරගත් ආයතන 161ක් සඳහා ප්රධානීන් පත් කිරීම මේ වන විට සිදුකර ඇති අතර ඊට අදාළ ගැසට් නිවේදනය ද ඊයේ (31) රාත්රී නිකුත් කරනු ලැබීය.
ඒ අනුව අදාළ පළාත් පාලන ආයතන හෙට දිනයේ සිට ඉදිරි දින කිහිපය තුළ රැස්වීමට නියමිත බව රාජ්ය පරිපාලන, පළාත් සභා හා පළාත් පාලන අමාත්යංශය සඳහන් කළේය.
කෙසේවෙතත් පළාත් පාලන ආයතන ඡන්ද විමසීමේ දී 178ක බහුතර බලය කිසිදු පක්ෂයකට හිමි නොවීම හේතුවෙන් එම ආයතනවල ප්රධානීන් පත් කිරීමේ බලය පළාත් කොමසාරිස්වරුන් වෙත පැවරේ.
ඒ අනුව ඔවුන් විසින් පළාත් පාලන ආයතන සඳහා නගරාධිපතිවරුන්, උප නගරාධිපතිවරුන්, සභාපතිවරුන් හා උප සභාපතිවරුන් පත් කරන ආකාරය පිළිබඳව පුවත්පත් දැන්වීම් පළකර දැනුම් දීම පළමුව සිදුකළ යුතු බව සඳහන් වේ.
එම දැනුම් දීමෙන් දින 14කට පසුව අදාළ ආයතනවල සභිකයින් රැස්වී ඒවායේ ප්රධානීන් පත් කරගැනීම සිදුකළ යුතු බවයි රාජ්ය පරිපාලන, පළාත් සභා හා පළාත් පාලන අමාත්යංශය සඳහන් කළේය.
ඒ අනුව එම පළාත් පාලන ආයතනවල ප්රධානීන් පත් කිරීම ජුනි මස 17 වන දිනෙන් පසු සිදුකෙරෙනු ඇති.
පළාත් කොමසාරිස්වරයා විසින් එම පත්කිරීම් සිදුකරන දිනයන් පිළිබඳව පෙර දැනුම් දීමක් සිදුකරන අතර එක් පළාතක් තුළ එක් දිනකදී සිදුකළ හැක්කේ එක් පළාත් පාලන ආයතනයක පත් කිරීමක් පමණක් බව අමාත්යංශය සඳහන් කළේය.
