මාතර, වැලිගම, පැලෑන ප්රදේශයේ උ 15 හෝටලය ඉදිරිපිට සිදුවූ වෙඩිතැබීමේ සිද්ධියට අදාළව හිටපු පොලිස්පති දේශබන්දු තෙන්නකෝන් මහතා ඇතුළු පොලිසියේ තවත් සැකකරුවන් 06 දෙනකු අත්අඩංගුවට ගෙන අධිකරණයට ඉදිරිපත් කරන ලෙස මාතර මහෙස්ත්රාත් අධිකරණය නියෝග කොට මේ වනවිට දින 16ක් ගතවී ඇතත්, ඊට අදාළ කිසිදු සැකකරුවකු අත්අඩංගුවට ගැනීමට පොලිසියට මෙතෙක් හැකිවී නොමැත.Sri Lanka Latest News
එම සිද්ධියේ ප්රධාන සැකකරු වන හිටපු පොලිස්පති දේශබන්දු තෙන්නකෝන් මහතා සැඟව සිටින ස්ථානයක් සොයාගැනීමට පොලිසිය මෙතෙක් සමත්ව නොමැති අතර, පසුගිය බදාදා දිනයේදී හිටපු පොලිස්පතිවරයා තමන්ව අත්අඩංගුවට ගැනීම වළක්වාලන ලෙස ඉල්ලමින් අධිකරණය හමුවේ පෙත්සමක්ද ගොනුකළේය.
දේශබන්දු මහතාට අමතරව කොළඹ අපරාධ කොට්ඨාසයේ ස්ථානාධිපති ඇන්ස්ලම් ද සිල්වා මහතා ඇතුළු තවත් සැකකරුවන් හයදෙනකු අත්අඩංගුවට ගෙන අධිකරණයට ඉදිරිපත් කරන ලෙස මාතර මහෙස්ත්රාත් අධිකරණය නියෝග කළද, ඔවුන්ද අත්අඩංගුවට ගැනීමට පොලිසිය කටයුතු කර නොමැත.
කෙසේ වෙතත් සිද්ධියට අදාළ එක් පොලිස් සැකකරුවකු අධිකරණයට භාරවීමෙන් පසු, ඇප මත මුදාහැරීමට අධිකරණය කටයුතු කර තිබිණි.
ඒ අනුව, අනෙක් සැකකාර පොලිස් නිලධාරීන් කොහේ සැඟව සිටිනවාද, ඔවුන් රටින් පිටව ගොස් තිබේද, එසේත් නැත්නම් අපේක්ෂිත ඇප ඉල්ලුම්පත් අධිකරණයට ඉදිරිපත් කර තිබේද යන්න සම්බන්ධයෙන් මෙතෙක් නිශ්චිත තොරතුරක් නොමැති වීම විශේෂ සිදුවීමකි.
දේශබන්දු තෙන්නකෝන් මහතා ඇතුළු මෙම පොලිස් නිලධාරීන් හය දෙනා අත්අඩංගුවට ගන්නා ලෙස නියෝග කෙරුණේ 6314 / 23 නඩු අංකය යටතේ සිදුකෙරෙන නීතිමය කටයුත්තකට අදාළව මනුෂ්ය ඝාතනයක් සඳහා කුමන්ත්රණ කිරීමේ චෝදනාවක් යටතේය.
ඒ, ඉකුත් පෙබරවාරි 28 වැනි දිනය.
