ඇත්තටම අපි දන්නවා මේක මේ විහිළු කරන වෙලාවක් නෙවෙයි. ඒ වුණාට සමහර දේවල් විහිළුවට කියනකොට අපිටත් පොඩි විහිළුවක් කරන්න හිතෙනවා. රටක දේශපාලනය විහිළුවක් නෙවෙයි. රටක ජාතික ප්රශ්න විහිළු නෙවෙයි. රටක දෙයක් වෙනකොට ඒකට ගන්න ඕනේ පියවරවල් විහිළු නෙවෙයි. ඇත්තටම ජාතියක් විදියට අපි සමහර ප්රශ්නවලදී අපි දුන්නු උත්තර එච්චර සාර්ථක නෑ. ඒවා නිකන් ගොං පාට් කියලා කිව්වොත් මම හිතන්නේ හරියටම හරි. පහුගිය කාලේ ලංකාවේ විශාලම ප්රශ්න තිබුණා. මේක ඇත්ත. ඒක අලුත් ජනාධිපති කෙනෙක් පත්වූ පලියට විසඳන්න පුළුවන් ප්රශ්න නෙවෙයි ඒවා. ඇත්තටම සමහර ප්රශ්නවලදී අපි හුඟක් වැඩිපුර හිතුවා. ඒක අනුර කුමාර දිසානායක ජනාධිපතිතුමාට හෝ මාලිමාවේ ආණ්ඩුවට මැජික් කරන්න පුළුවන් තත්ත්වයක් නෙවෙයි. අපි දන්නවා මේ රටේ පොල් ප්රශ්නෙට, හාල් ප්රශ්නෙට ඔය සමහර ප්රශ්නවලට මේ අලුතින් පත්වෙච්ච ආණ්ඩුවට කරන්න දෙයක් නෑ. ඇත්තටම ඒගොල්ලෝ මේක ඇඟේ දාගන්න අවශ්යත් නෑ. ප්රශ්නවලට උත්තර හොයන්න තමයි ජනාධිපති කෙනෙක් පත්කර ගත්තේ. ජනාධිපති කෙනෙක් කියන්නේ ඉන්ද්රජාලිකයෙක් නෙවෙයි. ඔවුන් පත්වෙන්න කලින් එක පෑන් පාරින් ප්රශ්න විසඳන්න පුළුවන් කිව්වට අපි දන්නවා එහෙම එක පෑන් පාරින් රටක ප්රශ්න විසඳන්න බෑ. රටක ප්රශ්න කියලා කියන්නේ ඉහළ සිට පහළට කිලෝමීටර් ගානක් දුරට දුවන ප්රශ්න. ඒවාට උත්තර හොයන්න මහන්සි වෙනකොට රටේ එක තැනක එක බලධාරියෙක්ට එක මන්ත්රීවරයෙක්ට එක ඇමැතිවරයෙක්ට එක පුද්ගලයෙක්ට මේවා විසඳන්න බෑ. ඒක දැන හෝ නොදැන ජනතා විමුක්ති පෙරමුණේ සහෝදරයෝ වේදිකාවල කිව්වා. අන්න ඒ කියපු නිසා දැන් සමහර අය මේක දේශපාලන තර්කයක් කරගෙන ඔවුන්ගෙන් ප්රශ්න කරනවා. ‘කෝ එක පෑන් පාරින් විසඳුවද?’ කියලා. ඔවුන්ට මේකට දෙන්න තියෙන්නේ සරල උත්තරයක්. මේක රටක්. වීඩියෝ ගේම් එකක් නෙවෙයි. මේක ඒ පැත්ත මේ පැත්ත පෙරළලා ඉවර කරන්න පුළුවන් නම්, ඇයි කලින් ආණ්ඩු ඒක නොකළේ? ඒ ප්රශ්නෙට උත්තර දෙන්න මේ රටේ එදාමෙදාතුර බිහිවෙච්ච සියලු දේශපාලකයන්ට සිද්ධ වෙනවා. මේ රටේ කරන්ට් කැපුවා, හාල් ප්රශ්න ආවා, වී නැති වුණා, කුඹුරුවල ප්රශ්න ඇතිවුණා, වී මිලදීගැනීම් සම්බන්ධ ප්රශ්න ඇතිවුණා, තෙල් පෝලිම්, ගෑස් පෝලිම් ඇති වුණා. මේ හැම දේම වුණා. Sri Lanka Latest News
ඒ නිසා රටක් විදියට ප්රශ්නවලට උත්තර හොයන්න ජනාධිපතිවරයෙක් පත්කර ගත්තට පස්සේ ඔහුගෙන් මැජික් බලාපොරොත්තු වෙලා හරියන්නේ නෑ. ඒක තමයි ඇත්ත. හැබැයි මේකේ තියෙන භයානක දේ තමයි මේ ආණ්ඩුව මේ වෙලාවේ මේ ප්රශ්නවලට දෙන අමුතු අමුතු උත්තර. අන්න ඒ නිසා සමහර ප්රශ්න විහිළු විදියට පේනවා. ඇත්තටම අපි ඉන්නේ මේ ආණ්ඩුවට මේ ප්රශ්නවලට මෙහෙම චෝදනා කරනවා කියන එක වැරැදියි කියන තැන. ඒත් අවාසනාවකට අපිටත් මේවා පේනවා, දකිනවා, ඇහෙනවා.
පහුගිය දවසක ජනාධිපතිතුමා එක කතාවක එක කොටසකදී එක වැඩසටහනකදී ඔහු කියනවා මේ බල්ලො පූසොත් බත් කනවනේ, ඒගොල්ලන්ගේ මේ කෑම ගණින්නේ නෑනේ වගේ කතාවක්. ඇත්තටම රටක මේ බල්ලො පූසොන්ගේ කෑම ගැන ගණනය කරලා ඒ රටේ හාල් හිඟයට උත්තර හොයන්න බැරි බව අපිට වඩා හොඳට අනුර කුමාර දිසානායක ජනාධිපතිතුමා දන්නවා. එතුමා කියන්න ඇත්තේ වෙන කතාවක්. හැබැයි ඒක රටක් විදියට ගත්තේ වෙන පැත්තකින්. විපක්ෂය ඒක ඉදිරිපත් කරන්න ගත්තේ වෙන විදියකට. විපක්ෂය එහෙම වෙන විදියකට ඉදිරිපත් කරනවා නම් එහෙම දේවල් ඇයි එතුමාලා කියන්නේ කියන එක අපිට ප්රශ්නයක් තියෙනවා. මොකද බල්ලො පූසෝ බත් කනවා කියන එකට තාර්කිකව දේවල් හොයන්න ගියොත් එහෙම, ගෙවල්වල බල්ලන්නට පූසන්ට වෙනම උයලා කන්න දෙන්නේ නෑ. බල්ලන්ට පූසන්ට හාල් කිලෝ ගණන් කන්න දෙන්නෙත් නෑ. බල්ලො පූසෝ ජීවත් වෙන්නේ ගෙවල්වල අපිත් එක්ක ඉතාම අනාදිමත් කාලයක ඉඳලා. උදාහරණයක් විදියට ගත්තොත් ලංකාවට විජය රජ්ජුරුවෝ එද්දීත් කුවේණියට බල්ලෙක් හිටියා. එතැන ඉඳන් මෙහාට ගත්තම බල්ලො පූසොත් එක්ක තමයි අපි සදාකාලිකව ජීවත් වෙලා තියෙන්නේ. ඒ නිසා උන්ට කන්න උයලා හාල් හිඟවුණේ නැති බව අපි හැමෝම දන්නවා. ඒ නිසා පය බරවායට පිටිකර බෙහෙත් බඳින පන්නයේ උත්තර දෙන්න ගියාම තමයි මේ වැඩේ වෙන්නේ.
ඒ අස්සේ පොල් ගැන කතාකරන්න ගියාම සමහර අය කියන්න ගත්තා පොල් අඩුවෙලා තියෙන්නේ රිළව් කාලා කියලා. ඇත්තටම පොල් කන්න රිළව් ආවේ පහුගිය මාස තුනේවත්, මේ කන්නෙවත් නෙවෙයි. පොල් සම්බන්ධ ප්රශ්නේ හරි ලේසියි තේරුම් ගන්න. අපේ ගම් තුලානවල උදවිය තාමත් කියනවා පොල් ටික වලු අල්ලන්නේ වෙසක් මුරේට, ඊට කලින් පොල් වලු අල්ලන්නේ නෑ කියලා. ඒ කියන්නේ පොල් වල්ලේ ගෙඩි අඩුයි කියලා. ඒකට පෑවිල්ලකුත් ආවම, වැස්සකුත් ආවම, ඇට්ටි වැටුණම, මල් හැලුණාම මේ පොල් ඵලදාව අඩු වෙනවා. ඊට අමතරව කුරුණෑගල සහ ඒ ප්රදේශවල විශාල වශයෙන් පැතිරිච්ච කොළ කහ වෙන ලෙඩේ මේ ප්රශ්නෙට හේතුව. මේ ප්රශ්නෙට හේතුව විදියට මෙතුමලා රිළව් කන එක ගැන කියන්න ගත්තම ඇත්තටම මේ රටේ දේශපාලනය පොඩි විහිළුවක් පොඩ්ඩක් අපිට හිනාවෙන්න පුළුවන් එකක් බවට පත්වෙනවා. ඒකෙම එකක් තමයි මේ ඊයේ පෙරේදා වඳුරා පැනපු කතාව. ලයිට් ගියාම වඳුරෙක් පැන්නා කියලා ලයිට් එක අස්සට වඳුරෙක්ව දාලා මේ ලයිට් කතන්දරේට වඳුරෙක් පටලගෙන මොකක්ද බහුබූත කතාවක් මේගොල්ලෝ කිව්වා.
ඒ නිසා ෆේස්බුක් එකේ කියනවා අනිත් ආණ්ඩුවලට ප්රශ්න තිබුණේ එල්.ටී.ටී.ඊ. එකෙන්, ඊට පස්සේ ප්රශ්න තිබුණා අයි.එස්.අයි.එස්. එකෙන්, ඊට පස්සේ ප්රශ්න තිබුණා අරගලකාරයන්ගෙන්, මේගොල්ලන්ට ප්රශ්න තියෙන්නේ බල්ලන්ගෙන්, පූසන්ගෙන්, රිළවුන්ගෙන්, වඳුරන්ගෙන් කියලා. ඔය වගේ කතා නාහා මේක හරියට තේරුම් අරගෙන ප්රායෝගිකව මේ ප්රශ්න විසඳලා ප්රායෝගිකව කතන්දර කියලා දේශපාලනික වශයෙන් උත්තර හොයනවා නම් මේ ආණ්ඩුවට ඉතාම යහපත් ගමනක් තියේවි කියලා අපිට හිතෙනවා.
ජීවන පහන් තිළිණ
