විදේශයෙන් ආනයනය කර රේගුවේ නිස්කාශනය නොකර නවතා තබා ඇති සුඛෝපභෝගී වාහනවල ඡායාරූප පෙන්වා රුපියල් 27660000.00ක් වංචා කළේ යැයි කියන සිද්ධියේ සැකකරුවන් තවත් සිටී නම් වහා අත්අඩංගුවට ගෙන අධිකරණයට ඉදිරිපත් කරන්නැයි කොළඹ ප්රධාන මහේස්ත්රාත් තනුජා ලක්මාලි මහත්මිය රහස් පොලිසියට ඊයේ (09) නියෝග කළාය. (Sri Lanka Latest News)
අදාළ සිද්ධියට හිටපු ජනාධිපතිවරයකුගේ දියණියකගේ ආරක්ෂකයා සම්බන්ධ බවත්,රටම දන්නා ඔහු අත්අඩංගුවට ගැනීමට රහස් පොලිසිය කටයුතු නොකරන බවට විත්තිකරු වෙනුවෙන් පෙනී සිටී නීතිඥ හරිස්ක සමරනායක මහතා කළ කරුණු දැක්වීම් වලින් පසුව මහේස්ත්රාත්වරිය මෙම නියෝගය නිකුත් කළාය.
රේගුවේ තිබෙන සුඛෝපභෝගී වාහන අටක ඡායාරූප පෙන්වා රුපියල් දෙකෝටි හැත්ත හය ලක්ෂ හැටදාහක් වංචා කළේ යැයි කියන සිද්ධිය සම්බන්ධයෙන් වැලිමඩ පදිංචි ලංකා ගමනාගමන මණ්ඩලයේ සේවකයෙකුට එරෙහිව 2023 වසරේ පවරා තිබූ නඩුවක් කැඳවූ අවස්ථාවේදී මෙසේ නියෝග කළාය.
ඇප මත සිටින ගුණසිරිලාල් නැමැති සැකකරු අධිකරණයේ පෙනී සිටීමෙන් පසුව විත්ති වෙනුවෙන් පෙනී සිටි නීතිඥයා හරිස්ක සමරනායක මහතා අධිකරණයට කරුණු දක්වමින් කියා සිටියේ සිය සේවා දායකයා මිතුරකුගේ මාර්ගයෙන් මෙම සිද්ධියට සම්බන්ධ වී ඇති බවය.
මෙම සිද්ධියේ ප්රධාන සැකකරුවන් විය යුත්තේ හිටපු ජනාධිපතිවරයාගේ දියණියගේ ආරක්ෂකයා බවත්, ඔහු මෙම සිද්ධියට සම්බන්ධ බවට හොඳාකාරවම තොරතුරු තිබියදී හෙතෙම අත්අඩංගුවට ගැනීම සිදු නොකරන්නේ කුමක් නිසාදැයි නීතිඥයා ප්රශ්න කළේය.
lankadeepa
