සිවිල් වැසියන්ට ලබා දී තිබෙන ගිනි අවි සියල්ල යළි කැදවීමට ආරක්ෂක අමාත්යංශය පසුගිය දා තීරණය කළේ ය. Sri Lanka Latest News
මෙසේ ගිනි අවි යළි භාර දිය යුතු පිරිස අතර, ගිනි අවි ලබා ගත් හිටපු මැති ඇමතිවරු සියයකට වඩා වැඩි පිරිසක් සිටින බව ආරක්ෂක අමාත්යංශ ආරංචි මාර්ග උපුටා දක්වමින් සන්ඩේ ටයිම්ස් පුවත්පත වාර්තා කර තිබේ.
ජනාධිපතිවරණයට පෙර, පාර්ලිමේන්තු මැති ඇමතිවරුන්ට ගිනි අවි දෙක බැගින් ලබා ගැනීමේ අවස්ථාව පැවති රජය ලබා දුන්නේ ය.
ගිනි අවි නැවත භාර දීමේ නව නියෝගය යටතේ එසේ ගිනි අවි භාරගත් හිටපු මැති ඇමතිවරුද, ඔවුන් ලබා ගත් ගිනි අවි නැවත ආරක්ෂක අමාත්යංශයට භාරදිය යුතුය.
නැවත එම ගිනි අවි ඔවුන්ට නිකුත් කරනු ලබන්නේ ආරක්ෂාව පිළිබදව සැබැවින්ම ගැටළුවක් පවතින්නේද යන්න සොයා බැලීමෙන් පසුව පමණක් බව ආරක්ෂක අමාත්යංශය පවසයි.
සිවිල් පුරවැසියන්ට ලබා දී තිබෙන ආයුධ නැවත කැදවීමට ආරක්ෂක අමාත්යංශය පියවර ගෙන ඇත්තේ, යුක්ති සහගත පදනමකින් තොරව, දේශපාලනඥයන් සහ සිවිල් පුරවැසියන් කීප දෙනෙකු ආයුධ සන්තකයේ තබාගෙන සිටින බවට වාර්තා වීමෙන් පසුව බව පැවසේ.
රජය නියෝග කර ඇති දිනට පෙර අවි ආයුධ භාර නොදෙන පුද්ගලයන්ට එරෙහිව නීතිමය පියවර ගන්නා බව ආරක්ෂක අමාත්යංශය පවසයි.
