සියල්ල උඩු යටිකුරු ව ගිය යුගයක මුල කොටස ගෙවා දමා අවසන්ය. අප මේ ඉන්නෙ එහි අග හෝ මැදය. එය කෙසේ වුවද මනුෂ්ය ශිෂ්ඨාචාරය ඇරඹි දා සිට ලෝකයම එක බියකින් ත්රස්තව ගෙවූ දෙමසක පමණ අත්දැකීම් ලැබූවෝ අපය. මරණය දොරකඩට පැමිණ ඇති වග නිතර ඇහෙනා අතර අපි රාත්රී පුවත් අතර මරණ ගණන් බලනායුරු බලා සිටියෙමු. ඡන්ද ප්රතිඵල වගේ මරණ ලැයිස්තු ඉදිරිපත් කරනා හැටි බලා සිටියෙමු. ලෝකය සොහොන් පිටියක් සේ පාලුවී ගියේය. ගම් නගර ප්රාන්ත ඉනික්බිති රටවල්ද වැසී ගියේය. ආගම් පරාජය විය. ජ්යොතිෂය නක්ශත්රය අභියෝගයට ලක්විය. තාක්ෂණය නිශ්ක්රීය විය. බුද්ධියට තවදුරටත් ඉඩක් නොවීය. උත්තර හොයනා එක කාලයට පැවරුණේය. අපි මනුෂ්ය වර්ගයා බිහිවූදා සිට හයානකම සාමූහික ව්යසනයට මුහුණ දුන් පරම්පරාව ලෙස ඉතිහාසයට එක් විය.
දැන් අප ඒ දෙමස පසුකර යමින් සිටිමු. අපද ශ්රී ලංකාවේ ජාතික පුවත්පතක් ලෙස ඔබ සමග එක්ව ඒ ව්යසනය බෙදා ගත්තෙමු. අපි එක් සතියක් හෝ නිහඬව නොසිට ඔබ වෙනුවෙන් අපේ රාජකාරිය කළෙමු. එය කිසිඳු මූල්ය ලාභයක් පිළිබඳ බලාපොරොත්තු නොතබා, අවදානම නොතකා කටයුතු කළ කාලයක් විය. අපි රට වෙනුවෙන් පැනවූ සීමා මායිම් අත්තනෝමතික ලෙස පසුකර ගියේද නැත. ඒ අතරම සත්ය සොයා වෙහෙසෙනා එක නතර කළේද නැත. අපේ කණ්ඩායමේ බොහෝ අය නිවසේ සිට රාජකාරි කළේය. ඒ අතර කිසිම මාධ්ය ආයතනයකට ළඟා විය නොහැකි සීමාවල වූ අතිවිශේෂ හෙළිදරව් වෙනුවෙන් වෙහෙසෙන්නට විය. ඒවා හැකි උපරිමයෙන් අපි කළෙමු. ආදරණීය පාඨක ඔබ අපේ සේවය වෙනුවෙන් තෘප්තිමත් නම් එය අපේ ජයග්රහණයයි. මේ පත්තර ගමනේ අපේ කණ්ඩායමට ඔබෙන් ලැබෙනා පැසසුම් තරම් වෙන වටිනා දෙයක් නැත. බොහෝ අය අපට ඔබේ අදහස් කියා තිබේ. නමුත් පැසසුම් සේම චෝදානාද අප ඉවසන්නට සූදානම් ය. “මව්රට” මේසා දුරක් ආවේ ඒ සමග ය.
මේ අවසන් සති කීපය තුළ “මව්රට” ශ්රී ලංකාවේ පත්තර ලෝකයේ අන්තර්ජාල වාර්තාවක් තබන තැනට ඔසවා තැබුවේ ඔබය. ලෝකයේ මුද්රිත පුවත්පත යම් අභියෝගයකට ලක්ව ඇති විටක අපි ඒ වෙනුවෙන් නව මගක් නිර්මාණය කළෙමු. ඒ වටා මිලියන ගණනක පාඨක විශ්වාසය පෙළ ගැසී තිබේ. එය සතියෙන් සතිය ගණන් බැලූ විට අප ආ මග දෙස යළි හැරී බැලුවාක් වැනිය. බොහෝ අපහසුතා ඉවසමින් ගල් බොරලු පිරි මාවතක ආ අපි අද මල් පිපී ඇති බව දැක සතුටු වන්නෙමු. නමුත් තවම රිදුම් දෙන දෙපා පිරිමදිමින් විඩා නිවන්නට ඉඩක් නැත. අපි හෙට තැනෙනා අලුත් ලෝකයට ගැලපෙනා සේ වෙනස් විය යුතුය.
මාර්තු 22 වැනිදා වන විට අපට පුවත්පත මුද්රණය නොකර ඉන්නට සිදුවිය. ඒ සතියේ පෝස්ට් රීච් එක ලෙස අපට පාඨකයෝ 341,606 දෙනෙක් අපේ පුවත්පත කියවූ බවට නිල වශයෙන් වාර්තා විය. ඉන් පාඨකයෝ 8,943 දෙනෙක් අපට ප්රතිචාර දක්වා තිබණහ.
මාර්තු 29 වන විට ලංකාවේ කොරෝනා අර්බුදය නරක අතට හැරුණ අතර, අපගේ ‘ඉ’ පුවත්පතට ලැබුණ පාඨක ප්රතිචාරය 200562ක් විය. ඉන් 6,822ක පිරිසක් අප සමග අදහස් බෙදාගෙන තිබුණේය. අප්රේල් පස්වෙනිදා වන විට එය 212,859 දක්වා ඉහළ ගිය අතර, ඉන් 14,358 දෙනෙක් සිය අදහස් පළ කර තිබුණේය. අප්රේල් 12 වැනිදා වන විට අපේ පාඨක ප්රතිචාරය වාර්තාගත ලෙස ඉහළ ගියේය. ඒ 415,512ක් ලෙසය. ඉන් පාඨකයෝ 16,860 දෙනෙක් සිය අදහස් අප සමග බෙදා ගත්තේය. 19 වැනිදා වන විට එය 448,225ක් බවට පත්විය. ඒ තවත් තිස්දහසකට වැඩි පාටක ආදරය සමගය. අප සමග අදහස් බෙදාගත් පාඨක ප්රමාණය 22,121ක් වී තිබුණේය. ඒ සතියක කාලයක් තුළ හයදහසකට ආසන්න ඉහළ යාමකි. නමුත් 519,602ක පාඨක සහභාගීත්වය පත්තර ලෝකය උඩු යටිකුරු කිරීමකි. මේ කරදර සමය පත්තර ඉතිහාසය නව ප්රවාහයකට ගෙන ආ බවට වූ චමත්කාරජනක සාක්ෂියකි. මේ “මව්රට” අපි අපි වෙනුවෙන් කරනා හුදෙක් උදම් ඇනීමක් නොවේ. එය අප සමග එක්ව ජීවිතය බෙදා ගන්නා සියලු පත්තර සහෝදරයන්ගේ ජයග්රහණයකි. එදා සිට මේ දක්වා “පත්තර” වෙනුවෙන් වෙහෙසුණු දහස් ගණන් “පත්තර කාරයන්ගේ” ජයග්රහණයකි.
1,337,746ක පාඨක ඇසුරක් මේ වන විට අප ලබා තිබේ. ඒ ගණන් හිලව් අපි කියන්නේ ජාත්යන්තර ගණනය කිරීම් අනුවය. දහතුන් ලක්ෂයකට අධික පාඨක ආදරය සමග අපිට කියන්නට ඇත්තේ “පත්තර අවසන් නැත”, මේ ඒ වෙනුවෙන් තැනුන නව මාවතයි. හැම අඳුරු වළාවකම අඳුරු ඉරක් සේ මේ කොරෝනා සමය අපට අලුත් මගක් විවර කර දුන්නේය. අපි යළි මෙතැන් සිට මුද්රිත පුවත් පතකින් ඔබ සොයා එන්නෙමු. නමුත් ඔබට පෙර සේම “ඔන්ලයින්” පුවත්පතක් ලෙසද ප්අර්ඒබැඅිගකන ඔස්සේ අප කියවිය හැකිය.
අපට අවශ්ය තිබුණේ මේ කරදර සමය නිමවෙනා තෙක් ඔබට සවියක් වන්නටය. ඒ වෙනුවෙන් දැන් ඔබ අපට සවියක් වී තිබේ. ඔබේ ආදරයට ස්තූතියි.
මේ ‘මව්රට’ අපි…
