‘රාජ්ය ආයතන ඔස්සේ දේශපාලනය කිරීමට මා අපේක්ෂා කරන්නේ නැත. කළයුත්තේ ආදායම් ජනනය කිරීම මඟින් ආයතන දියුණු කිරීමයි. ඒ සඳහා කාර්යක්ෂමතාව සහ ඵලදායිතාව වර්ධනය කර වියදම් සහ නාස්තිය පාලනය කළයුතුයි. රාජ්ය ආයතන නඩත්තු වන්නේ දහදිය හෙළමින් වෙහෙසී වැඩ කරන ජනතාව උපයන ආදායමින් බැවින් මෙම ආයතන ජනතාවට බරක් නොවිය යුතුයි..” යනුවෙන් ජනාධිපති ගෝඨාභය රාජපක්ෂ මහතා ශ්රී ලංකා ගුවන් විදුලි සංස්ථාවේ ප්රධානීන් සමඟ පැවති සාකච්ඡාවකදී අවධාරණය කර තිබේ.
ඊයේ (18) ජනාධිපති කාර්යාලයේ පැවැති සාකච්ජාවකදී ජනාධිපතිවරයා මේ බව දැනුම් දී ඇත.
එහිදී ජනාධිපතිවරයා මෙසේද ප්රකාශ කොට තිබේ.
සෞඛ්යය සහ අධ්යාපනය වැනි ක්ෂේත්ර මහජන සුබසාධන සේවා බැවින් ආදායම් උත්පාදනයක් ඒවායින් අපේක්ෂා නොකරන නමුත් සෙසු ආයතන තමන්ගේ නඩත්තුව සහ සේවක අභිවෘද්ධිය සඳහා අවශ්ය ආදායම් තමන්ම උත්පාදනය කළයුතු බව මාගේ දැක්මයි. කොරෝනා වසංගතයේ ව්යාප්තිය නිසා ලෝකයේ සෙසු රටවල සේම ශ්රී ලංකාවේ ද ආර්ථිකයෙහි බලවත් පරිහානියක් ඇතිව තිබේ. ලක්ෂ සංඛ්යාත රැකියා අහිමි වී ඇත. ආයතන ප්රධානීන් රට ගැන සිතා වැඩ කළයුතුයි. එසේ නොකළහොත් ආයතන කඩාවැටීමට පවා පිළිවන. මේ අර්බුදය ජය ගැනීමට පමණක් නොව අනාගත ආර්ථික සංවර්ධනය සඳහා ද රාජ්ය ආයතන සැලසුම්සහගතව ශක්තිමත් කළ යුතුය.
ගුවන් විදුලි සංස්ථාවේ වත්මන් ක්රියාකාරිත්වය සමාලෝචනය කරනු පිණිස සාකච්ඡාව කැඳවා තිබිණ. සිය ශ්රාවක ප්රජාව කවුරුන්දැයි නිවැරදිව හඳුනාගෙන ඔවුන්ගේ රුචිකත්වයට ගැලපෙන අයුරින් ජනප්රිය වැඩසටහන් සම්පාදනය කරන ලෙසත්, නිසි සැලැස්මක් ඇතිව ආදායම් උපයා ගැනීමට කැපවීමෙන් ක්රියාකරන ලෙසත්
සංස්ථා ප්රධානීන්ට උපදෙස් දුන්නෙමි. ආයතනය පත්ව ඇති තත්ත්වය ගැන සේවකයන් නිරතුරුව දැනුවත් කර තමන් ගැනම නොසිතා ආයතනයේ දියුණුව සඳහා වෙහෙසී වැඩ කිරීමට ඔවුන් පෙළඹවීමට කටයුතු කළ යුතුය.
සංස්ථා සේවකයන්ගේ උපරිම කාර්යක්ෂමතාව සහතික කරන අතර විධිමත් සැලැස්මක් යටතේ ආදායම් වර්ධනයට ගතයුතු පියවර ජනාධිපති ලේකම් පී.බී. ජයසුන්දර මහතා පැහැදිළි කළේය.
ගුවන් විදුලි සංස්ථාවේ සභාපති ජගත් වික්රමසිංහ, අධ්යක්ෂ ජනරාල් චන්ද්රපාල ලියනගේ යන මහත්වරු සහ අධ්යක්ෂ මණ්ඩල සාමාජිකයෝ සාකච්ඡාවට එක්ව සිටියහ.
