පසුගිය සතිය නිමාවෙන්නේ අතිශය ඛේදනීය සිදුවීම් කීපයක් සමගය.(Sri Lanka Latest News) ඒ කිසිවෙක් නොසිතූ ආකාරයේ මරණ කීපයක කතන්දරය. මින් දෙකක්ම මහනුවර ප්රදේශය ආශ්රිතව සිදුවූ ඒවාය. පළමු සිදුවීමෙන් පෙරපාසල් ශිෂ්යයෙක් ජීවිතක්ෂයට පත්වන අතර, දෙවැනි සිදුවීමෙන් පාසල් ශිෂ්යයෙක් ජීවිතක්ෂයට පත්වෙයි. මින් පළමු සිදුවීම ආන්දෝලනාත්මක ලෙස රටේ කතාබහට ලක්වී තිබේ. විශේෂත්වය වන්නේ එම සිදුවීමෙන් දවස් දෙක තුනක් යද්දී හූවක දෙකක දුරින් තවත් එවැනිම සිදුවීමක් වාර්තා වීමය. මේ පළමු සිදුවීම වන්නේ පෙරපාසලකට අසල්වැසි ඉඩමක තිබුණු ගසක් කඩා වැටීමය.
අදාළ පෙරපාසලේ දරුවන්ට විවේක කාලය ලබාදීමෙන් පසු එම දරුවන් ක්රීඩා කරන ස්ථානයක් වෙත යොමුකර තිබේ. බැලූ බැල්මටම එම ස්ථානයේ වරදක් නැත. අදාළ බලධාරීන් තමන්ගේ බිම සහ තමන්ගේ වටපිටාව ආරක්ෂිතව සහ ප්රසන්නව පවත්වාගෙන යාමට සියලු උපක්රම දරා ඇති බව මේ සිදුවීමෙන් පසුව වුවද වටහාගත හැකිය. අපි මේ කියන්නේ ඔවුන්ගේ පෙරපාසල පවත්වාගෙන ගිය ඉඩම පිළිබඳවය. නමුත් අවාසනාව තිබුණේ පෙරපාසල් ඉඩමට පිටස්තරවය.
ඉඩමට යාබද ඉඩමේ විශාල ගසක් තිබුණු බවත් එම ගස අනාරක්ෂිත බවත් කිසිම බලධාරියකුට දැනී තිබුණේ නැත. එවැන්නක් නොදැනීම කාගේ වරදක් දැයි කියන්නටවත් අපිටද තේරෙන්නේ නැත. තම පරිශ්රය ආරක්ෂිතව පවත්වාගෙන යාම මිස පරිශ්රයට අසල්වැසි ඉඩම්ද පරීක්ෂා කොට ඒවායේ අනාරක්ෂිත යමක් ඇත්දැයි සොයා බැලීම කළ හැකි නම් හොඳමුත් එය පහසුවෙන් කළ හැකිද යන්න අපට පවා ප්රශ්නයකි.
නමුත් මේ සිදුවීම කෙළවර වන්නේ අපහසු නමුත් පෙරපාසල් හෝ දරුවන් ගැවසෙන ස්ථාන පවත්වාගෙන යන්නේ නම් අසල්වැසි ඉඩම් පමණක් නොව, සිදුවේ යැයි සිතනා දේ පවා තුන්කල් දකිනා නුවණින් දැක කටයුතු කළ යුතු බවට පාඩමක් කියා දෙමිනි. මක්නිසාද යත් මේ දරුවාගේ හිස මත කඩා වැටෙන්නේ පෙරපාසල් ක්රීඩා පිටියට සැලකිය යුතු දුරකින් පිහිටි ගසකි. හරියටම විවේක කාලයේදීම කඩාවැටුණු ගසට මේ පුංචි පැටියා ඇතුළු දරු පිරිසක්ම යටවුණේය.
එක දරුවෙක්ගේ හිස මතටත් අනෙක් දරුවන්ගේ ශරීර මතටත් කඩාවැටුණු ගස නිහඬව නිසොල්මන්ව තිබුණේය. බලධාරීන් හැකි උපරිම ඉක්මනින් දරුවන් මුදාගත් නමුත් පරිස්සම් කරගන්නට පුළුවන් වුණේ එක දරුවෙක් හැර අනෙක් දරුවන්වය. එක පැටියෙක් යන්නම ගොස් තිබුණේය. තවත් පැටියෙක් ජීවිතයත් මරණයත් අතර සටනකය. නඩු හබ ගොඩක පැටලුණු බලධාරීන් දැන් ඉන්නේ වේදනාවත් දුකත් කනස්සල්ලත් පසුතැවීමත් සියල්ල උස්සාගෙනය. නීතිය තීන්දු දෙන තුරු අපට තීන්දු දිය නොහැක. නමුත් දැන් එය සිදුවී හමාරය.
මියගියේ ගම්පොළ ඉල්ලවතුර ප්රදේශයේ පදිංචිව සිටි මොහොමඩ් සෙයිම් අස්වි නමැති පස් හැවිරිදි දරුවෙකි.
කපා දැමූ ගසක් පෙරළී තවත් ගසක් මතට වැටීමෙන් තවත් පාසල් සිසුවකු ජීවිතක්ෂයට පත් වූ බවක් වාර්ත වී තිබේ. පසුගිය තුන්වැනිදා නෝර්වුඩ් පොලිස් වසමේ නිව්ටන් වත්තේ ගෙවත්තක තල් ගසක් කපමින් සිටියදී ගස පෙරළී තවත් ගසක් මතට වැටීමෙන් එහි අත්තක් අසල සිටි පාසල් සිසුවකු මතට වැටීමෙන් සිසුවා තුවාල ලබා තිබේ.
ඔහු නෝර්වුඩ් දෙමළ විද්යාලයේ 9 වැනි ශ්රේණියේ ඉගෙනුම ලබමින් සිටි මුරුගන්ය. ප්රතිකාර සඳහා ඔහු වහාම දික්ඔය ක්ලැංගන් ආදාර් රෝහල වෙත රැගෙන ගොස් ඇත. වැඩිදුර ප්රතිකාර සඳහා මහනුවර ශික්ෂණ රෝහලට රැගෙන යමින් සිටියදී නාවලපිටි ප්රදේශයේදී සිසුවා මියගොස් තිබේ. මේ සිදුවීම් දෙකම වෙන්නේ එකම ළඟය. එක දිගටමය. ඒ නිසාම දරුවන් පරිස්සම් කරගැනීමට සියල්ලෝම හැකි උපරිමයෙන්ම කැපවිය යුතු බව සඳහන් කළ යුතුය.
ජීවන පහන් තිළිණ
