මේ වන විට බොහෝ පාසල් දරුවන් ප්රචණ්ඩ තත්ත්වයට පත්ව ආවේගශීලීව කටයුතු කරන මානසික තත්ත්වයට පත්ව ඇති බවත්, ඒ තත්ත්වය මත ඔවුන්ගේ ඉල්ලීම් ප්රතික්ෂේප වූ විට මවුපියන් සමග පවා අර්බුද ඇති කරගන්නා අවස්ථා ඇති හෙයින් ඒ පිළිබඳ මවුපියන් දැඩි අවධානයකින් කටයුතු කළ යුතුව ඇතැයි ගාල්ල කරාපිටිය රෝහලේ මානසික රෝග විශේෂඥ වෛද්ය රූමි රූබන් මහතා ‘මව්රට’ට පැවැසීය. (Sri Lanka Latest News)
මේ දිනවල දරුවන් සහ මවුපියන් සමග සිදුකරන සාකච්ඡාවලදී එම මානසික තත්ත්වයන් ගැන හෙළිදරව් වූ බවයි ඔහු සඳහන් කළේ.
විශේෂයෙන් අන්තර්ජාලයෙන් නරඹන ඇතැම් දර්ශනවලින්ද නොමග ගිය අවස්ථා ඇති හෙයින් දරුවන් අන්තර්ජාලය භාවිත කිරීමේදී මවුපිය අධීක්ෂණය සහිතව එය සිදුකිරීමට ඉඩ ලබාදීම කළ යුතු බවයි ඔහු පෙන්වා දෙන්නේ.
දැනට පවතින ආර්ථික ගැටලු නිසා ඇතැම් අවස්ථාවලදී මවුපියන්ට දරුවන්ගේ ඉල්ලීම් ඉටුකර දීමට නොහැකි වීම මතද පාසල් දරුවන් දැඩි තීරණවලට එළැඹීමේ මානසික තත්ත්වයට පත්වන බවද වෛද්ය රූමි රූබන් මතා පැවැසුවේය.
දරුවන් ඇසුරු කරන පුද්ගලයන් කවුරුන්ද යන්න ගැන මවුපියන් නිරන්තර අවධානයෙන් සිටීමෙන් පාසල් වයසේ දරුවන්ගේ මනස හැඩගැස්වීමට මවුපියන්ට හැකියාව ඇති බවයි ඔහු වැඩිදුරටත් සඳහන් කළේ.
ප්රේමලාල් විජේරත්න
