ලිට්රෝ ගෑස් සමාගමට අයත් ගෑස් ටැංකියක් පුපුරා යාමෙන් තමාට සිදුවූ හානිය වෙනුවෙන් රුපියල් මිලියන 500ක් අයකර දීමට නියෝගයක් ලබා දෙන ලෙස ඉල්ලා කඩවත ප්රදේශයේ පදිංචි කාන්තාවක් ගොනු කර ඇති පැමිණිල්ලක් සම්බන්ධයෙන් කරුණු දැක්වීම සඳහා ජනවාරි මස 5 වන දින අධිකරණය හමුවේ පෙනී සිටින ලෙස දන්වා ලිට්රෝ ගෑස් සමාගමට සිතාසි නිකුත් කරන ලෙස කොළඹ දිසා විනිසුරු කේ.වී.එම්.පී. ද සිල්වා නියෝග කළා ය.Sri Lanka Latest News
දළුපිටිය පාර, මහර, කඩවත, ලිපිනයෙහි පදිංචි එස්.ඒ. ඩිස්නා ශිරානි සිය නීතිඥ ජයමුදිතා ජයසූරිය මගින් පෙනී සිටිමින් ගොනු කළ පැමිණිල්ලක් පිළිබඳව සලකා බැලීමෙන් අනතුරුව අධිකරණයෙන් එසේ නියම කෙරිණි.
ඉකුත් 2021 වසරේ නොවැම්බර් 6 වන දින හෝ ඊට ආසන්න දිනකදී තම ස්වාමිපුරුෂයා ඉහත සඳහන් විත්තිකාර සමාගමට අයත් කිලෝ ග්රෑම් 12.5 ගෑස් ටැංකියක් නිවසට රැගෙනවිත් පැමිණිලිකාරියට භාරදීමෙන් පසු අත්යවශ්ය කටයුත්තක් සඳහා ඔහු නිවෙසින් පිටව ගිය බව ද ඇය එම පැමිණිල්ල මගින් පෙන්වා දී ඇත.
සිය ස්වාමිපුරුෂයා නිවසින් පිටව යාමෙන් මඳ වේලාවකට පසු එම ගෑස් ටැංකිය පුපුරා යාම හේතුවෙන් තමා බරපතළ ලෙස පිළිස්සීමට ලක්ව තුවාල ලැබූ බවත් මේ හේතුව නිසා තමාට කොළඹ ජාතික රෝහලේ ප්රතිකාර ලබමින් සැත්කමකට පවා භාජන වීමට සිදුවූ බවත් ඇය පෙන්වා දී තිබේ.
මෙම අනතුරට පත්වීමට පෙර පවුලේ ආදායම් මාර්ගය ලෙස ආහාර අලෙවිසලක් තමා පවත්වාගෙන ගිය බවත් සිය ස්වාමිපුරුෂයා ද ව්යාපාර කටයුතුවල නිරතව සිටි බවත් එහෙත් මෙම අනතුර හේතුවෙන් එම කටයුතු ඉදිරියට කරගෙන යාමට නොහැකිව තම පවුලේ ආදායම් මාර්ග අතරමග නැවතී පවුලේ අය දැඩි ආර්ථික අර්බුදයකට පත්වූ බව ද ඇය පෙන්වා දී ඇත.
මෙම අනතුර සම්බන්ධයෙන් සිය ස්වාමිපුරුෂයා පෑලියගොඩ පොලිස් ස්ථානයට, පාරිභෝගික කටයුතු අධිකාරියට, අපරාධ පරීක්ෂණ දෙපාර්තමේන්තුවට, ශ්රී ලංකා මානව හිමිකම් කොමිසමට හා ශ්රී ලංකා පාර්ලිමේන්තුවේ මහජන පෙත්සම් සභාව වෙත පැමිණිලි ඉදිරිපත් කළ බව ද ඇයගේ පැමිණිල්ලේ සඳහන් ය.
මෙම අනතුරත් සමග සිය පවුලේ ආර්ථිකය කඩා වැටී අසරණභාවයට පත් වුව ද විත්තිකාර සමාගම තම පවුල වෙත කිසිදු වන්දි මුදලක් මේ දක්වා ලබා දී නොමැති බව ද ඇය පෙන්වා තිබේ.
තම පවුලේ ආර්ථිකයට සිදුවූ පාඩුව වෙනුවෙන් දින 14ක් ඇතුළත තම පවුල වෙත වන්දියක් ගෙවන ලෙස දන්වමින් සිය නීතිඥවරිය වන ජයමුදිතා ජයසූරිය මගින් ඉකුත් ඔක්තෝබර් මස 20 වන දින විත්තිකාර සමාගමට එන්තරවාසියක් යැවූ නමුත් මේ දක්වා එම සමාගම ඊට කිසිදු ප්රතිචාරයක් දක්වා නොමැති බවත් ඇයගේ පැමිණිල්ලේ සඳහන් ය.
මෙම අනතුර සිදුවූ කාලවකවානුව තුළ විත්තිකාර සමාගම විසින් බෙදාහරින ලද ගෑස් ටැංකි නියැදිවල ඉහළ ප්රොපේන් ප්රතිශතයක් අඩංගුවීම හේතුවෙන් සිලින්ඩරය තුළ ඇතිවූ පීඩනය වැඩිවීම මෙම අනතුර සිදුවීමට මූලික හේතුව බව ද ඇය පෙන්වා දී ඇත.
ඉහත සඳහන් විත්තිකාර සමාගමේ ගෑස් ටැංකිය නිවස තුළදී පිපිරීම හේතුවෙන් තමාගේ ශරීරය තුළ පිළිස්සුම් තුවාල ඇතිවීම, ශරීර කොටස් අකර්මණ්ය වීම, ශ්රවණ හා අක්ෂි රෝග තත්ත්වයන්ට ගොදුරු වීම, තුවාල සුවකර ගැනීම සඳහා ශල්යකර්ම සිදුකිරීම යන කරුණු නිසා ඇතිවන පීඩාවන් හා වේදනාවන්වලින් ජීවිත කාලය පුරාවට ම තමන්ට මානසික වේදනාවක් විඳීමට සිදුව ඇති බව ද ඇය සිය පැමිණිල්ල මගින් වැඩිදුරටත් පෙන්වා දී තිබේ.
