හපුතලේ හෝටලයක් තුළ ඊයේ (22) රාත්රීයේ සිදුවූ වෙඩි තැබීමකින් මිනිස් ඝාතන නඩුවක සාක්ෂිකරුවකු මියගොස් හෝටලයේ හිමිකරු තුවාල ලබා ඇතැයි පොලිස් තොරතුරු අනාවරණය කළේය.Sri Lanka Latest News
ඝාතනය වූ පුද්ගලයා එම හෝලටයේ වසර එකහාමාරක පමණ කාලයක් තිස්සේ සේවයේ නිරතව සිටින අයෙක් බවත් ඔහු ගන්දර පදිංචිකරුවෙක් බවත් පොලිස් තොරතුරු සඳහන් කළේය.
මෙම පුද්ගලයා විසින් ලබාදුන් සාක්ෂියක් මත මිනිස් ඝාතනයක් සම්බන්ධයෙන් පුද්ගලයන් 06 දෙනෙක් බන්ධනාගාරගතව සිටින බවත් එම සාක්ෂිය ලබාදීම හේතුවෙන් ඔහුට මරණීය තර්ජන එල්ලවී තිබී ඇති බවත් පොලිසිය කියයි. ඒ නිසාම වින්දිතයන් ආරක්ෂා කිරීමේ අධිකාරිය විසින් ඔහුට පැය 24 පුරාම ආරක්ෂාවක් ලබාදීමට පොලිසියට නියෝගයක්ද කර තිබී ඇත.
ඒ අනුව ඔහු ගන්දර රැඳී සිටින කාලය තුළ පැය 24 පුරාම පොලිස් ආරක්ෂාවක් ලබාදී තිබී ඇතැයි උසස් පොලිස් නිලධාරියෙක් සඳහන් කළේය. ගන්දර රැඳී සිටීම ඔහුගේ ජීවිතයට තර්ජනයක් වූ බැවින් ඔහු සැඟවුණු ජීවිතයක් පසුගිය කාලය පුරාවට ගතකර ඇති බවද එම නිලධාරියා කීය.
දෙවුන්දර පෙරහර උත්සවය පැවැති දින කිහිපය තුළ මෙම පුද්ලයා නැවතත් ගන්දරට පැමිණ සිටි බවත් ඔහු දින තුනක් ගන්දර රැඳී සිටි බවත් එම නිලධාරියා පැවසීය. එසේ රැඳී සිටීම ජීවිතයට තර්ජනයක් බව පොලිසිය ඔහුට පැවසීම හේතුවෙන් එම පුද්ගලයා ගන්දරින් නැවතත් පිටත්ව ගිය බවත් ඔහු රැඳී සිටි කාලය තුළ පැය 24 පුරාම ආරක්ෂාවක් ලබාදීමට පොලිසිය වගබලාගත් බවත් එම උසස් නිලධාරියා වැඩිදුරටත් සඳහන් කළේය.
මෙම පුද්ගලයා ජීවිත තර්ජනය හේතුවෙන් ගන්දරින් ඈත්ව හපුතලේ කොළඹ පාරේ පිහිටි හෝටලයක සේවකයෙක් ලෙස රැඳී සිට ඇති බව පොලිසිය කියයි. සිව් දෙනකුගෙන් සමන්විත කණ්ඩායමක් හෝටලයට පැමිණ මෙම වෙඩි තැබීම සිදුකර ඇති බවත් පිස්තෝලයකින් වෙඩි තබා තිබෙන බවත් පොලිසිය කියයි.
ආරක්ෂක කැමරා දර්ශන ඔස්සේ වෙඩික්කරු සහ ඔහු සමඟ පැමිණි පිරිස සහ ඔවුන් පැමිණි වාහන ඊයේ රාත්රීය වන විට හඳුනාගැනීමට පොලිසිය දැඩි වෙහෙසක් ගනිමින් සිටියේය.
