මෑත කාලයේ රෝහල් තුළ සිදුවූ මත්භේදයට තුඩු දුන් මරණ 06යෙන් පහකට බොහෝ දුරට හේතු විය හැක්කේ ඖෂධ ආසාත්මිකතාවන් බව ඒ පිළිබඳ සෙවීමට පත්කළ විශේෂඥ වෛද්ය කමිටුව පවසයි.Sri Lanka Latest News
ඒ අදාළ සිදුවීම පිළිබඳව ඔවුන්ගේ නිර්දේශ ඇතුළත් වාර්තාව සෞඛ්ය අමාත්යාංශය වෙත භාරදෙමිනි.
කෙසේ වෙතත් සෞඛ්ය අමාත්ය කෙහෙළිය රඹුක්වැල්ල මහතා පවසන්නේ වෛද්ය හා රෝගී රහස්යභාවය රැකගැනීමේ අවශ්යතාව හේතුවෙන් එම සම්පූර්ණ වාර්තාව ප්රකාශයට පත් නොකරන බවය.
සෞඛ්ය ක්ෂේත්රයේ මෑත කාලීනව සිදුවූ අන්දෝලනාත්මක සිදුවීම් පිළිබඳ සොයා බැලීම සඳහා වෛද්ය පර්යේෂණ ආයතනයේ අධ්යක්ෂ වෛද්ය දේදුනු ඩයස් මහතාගේ සභාපතීත්වයෙන් යුත් සත් සාමාජික කමිටුවක් පත්කරනු ලැබීය.
ඒ අනුව සිදුකරන ලද විමර්ශනවලින් අනතුරුව එම කමිටුව සිය නිර්දේශ ඇතුළත් වාර්තාව සෞඛ්ය අමාත්යාංශය වෙත භාර දී තිබේ.
එම විශේෂඥ වාර්තාව මඟින් නිර්දේශ 12ක් නිකුත් කර තිබේ.
ජීවිත අවදානම් සහිත ආසාත්මිකතා කළමනාකරණය සඳහා සෞඛ්ය කාර්ය මණ්ඩල පුහුණු කිරීම සහ ඊට අදාළ යාන්ත්රණයක් සකස් කිරීම, ජීවිත තර්ජනයක් සහිත සිදුවීම් වාර්තා වූ අවස්ථාවන්හිදී නිසි සායනික විගණනයක් සිදුකිරීම, ඖෂධ ලියාපදිංචියේදී සහ අලෙවිකරණයෙන් පසුව අහඹු නියදි පරීක්ෂාවන් මඟින් රට තුළ භාවිත ඖෂධවල ගුණාත්මකභාවය රැකගැනීමට කටයුතු කිරීම ඇතුළු නිර්දේශ එම වාර්තාවට ඇතුළත් වේ.
අදාළ විශේෂඥ කමිටු වාර්තාවේ නිගමනය වී ඇත්තේ කමිටුවේ අවධානය යොමු වූ මරණ 06යෙන් පහකට හේතු වී ඇත්තේ ඖෂධ ආසාත්මිකතාවන් බවය.
එමෙන්ම අසාත්මිකතාවන්ට හේතුවූ ඖෂධ සම්බන්ධ තත්ත්ව පරීක්ෂණ වාර්තාද නොතිබූ බව එම වාර්තාවේ දැක්වේ.
මෙම වාර්තාව සම්බන්ධයෙන් අදහස් දැක්වු සෞඛ්ය වෘත්තීයවේදීන්ගේ විද්වත් සංගමයේ, සභාපති, රවී කුමුදේශ් මහතා,
“මේවා සාකච්ඡා විය යුතු කාරණා. මේවා දේශපාලනික කාරණා නෙමෙයි. මේවා ආණ්ඩු පෙරළන කාරණා නෙමෙයි. සෞඛ්ය සේවාව තවදුරටත් තියෙන තත්ත්වයෙන් දියුණු කරන්න උත්සාහ කරන කාරණා. ඒ නිසා අපි කියනවා ඖෂධ සඳහා පත්කරපු කමිටුව පිළිබඳව ජනතාව දෑස් දල්වාගෙන බලාගෙන හිටියා. ඒ බලගෙන හිටියට අපි නම් මුල ඉඳලම දන්නවා මේ කමිටුවට දීලා තියෙන වගකීම රටේ ඖෂධ ප්රශ්නයවත්, රටේ සෞඛ්ය ප්රශ්නයවත් නෙමෙයි. ඔවුන්ට ලබාදීලා තියෙන්නේ රටේ සෞඛ්ය ප්රශ්නයෙන් 1%ක් පමණ වන ඖෂධ ප්රශ්නය. එයිනුත් 1%ක් පමණ වන ආසාත්මිකතා ප්රශ්නය ගැන විතරයි අධ්යයනය කරන්න දීලා තියෙන්නේ. මහජනතාව වෙනුවෙන් පත්කළ කමිටු වාර්තාව මහජනතාවට වහාම ඉදිරිපත් කරන්න.”
