කිසිදු හේතුවක් මත හෝ පක්ෂ නායකත්වය අත් නොහරින ලෙසට වජිර අබේවර්ධන හා ආශු මාරසිංහ යන මහත්වරුන් පක්ෂ නායක රනිල් වික්රමසිංහ මහතාට දැඩිව අවධාරණය කර ඇති බව වාර්තා වේ.
රනිල් වික්රමසිංහ මහතා හා ඔහුට හිතවත් මන්ත්රීවරුන් කිහිප දෙනකු අතර ඊයේ (19) රාත්රියේදී පැවැති සාකච්ජාවකදී මෙම මන්ත්රීවරුන් දෙදෙනා මේ බව දැනුම් දීමට කටයුතු කොට තිබේ.
වික්රමසිංහ මහතා හා කතානායක කරු ජයසූරිය මහතා අතර පෙරේදා (18) දින පැවැති සාකච්ජාවේදී පක්ෂ නායකත්වයෙන් ඉවත්ව පක්ෂය බාර දෙන ලෙසට කතානායක කරු ජයසූරිය මහතා වික්රමසිංහ මහතාට ඉතා පැහැදිලිව දැනුම් දීමට පියවර ගෙන තිබිණ.
එහිදී ජයසූරිය මහතා පෙන්වා දී ඇත්තේ පක්ෂ නායකත්වය සම්බන්ධයෙන් අවසන් වතාවේ තමන්ට ලැබුණු ලිපියට මන්ත්රීවරුන් 63 දෙනකු අත්සන් තබා තිබුණු බවත්, ඉදිරියේදී මෙම තත්ත්වය තවත් ඉහළ යා හැකි බවත්ය.
කෙසේවෙතත් එම සාකච්ජාවේදී කිසිදු අදහසක් දක්වා නොතිබූ වික්රමසිංහ මහතා තමන්ට ඊට පිළිතුරක් ලබා දීමට දින 2ක් කල් දෙන ලෙස කතානායකවරයාගෙන් ඉල්ලීමක් කර තිබිණ.
මීට පෙර එක්සත් ජාතික පෙරමුණේ පක්ෂ නායකයන් හා පැවති සාකච්ජාවේදී කරු ජයසූරිය මහතාට පක්ෂ නායකත්වය බාරගන්නා ලෙසටත්, සජිත් ප්රේමදාස මහතාට නව සන්ධානයේ නායකත්වය බාර ගන්නා ලෙසටත් යෝජනා ඉදිරිපත්ව තිබිණ.
