10 වැනි පාර්ලිමේන්තුවට සභිකයන් තෝරා පත්කර ගැනීම සඳහා පැවැති මහ මැතිවරණයෙන් 2/3ක බලයක් සහිත ඓතිහාසික ජයක් වාර්තා කිරීමට ජනාධිපති අනුර කුමාර දිසානායක මහතාගේ නායකත්වයෙන් යුත් ජාතික ජන බලවේගය සමත් විය.
මැතිවරණ ප්රතිඵලවලට අනුව ජාතික ජන බලවේගය ඡන්ද 6,863,186ක් ලබාගනිමින් ආසන 159ක් ලබාගැනීමට සමත් විය.
වාර්තා රැසක් බිහිකරයි
මෙහි ඇති විශේෂත්වය වන්නේ අතීත මහ මැතිවරණ වාර්තා ගණනාවක්ම මාලිමාව විසින් මෙවර බිඳහෙළා තිබීමය.
ඉන් පළමු වාර්තාව වන්නේ මහ මැතිවරණයක පක්ෂයක් ලබාගත් වැඩිම ප්රතිශතය මෙවර වාර්තා වීමය. එය 61.56%කි. මීට පෙර 2010 වසරේදී එක්සත් ජනතා නිදහස් සන්ධානය විසින් 60.33%ක ඡන්ද ප්රතිශතයක් වාර්තා කළ අතර, මෙවර එය මාලිමාව විසින් බිඳහෙළනු ලැබීය.
එමෙන්ම මහ මැතිවරණයක ජයගත් වැඩිම ඡන්ද කොට්ඨාස ගණන වාර්තා කරමින් 152ක් මාලිමාව ජයගත් අතර, මීට පෙර 2010 වසරේදී එක්සත් ජනතා නිදහස් සන්ධානය කොට්ඨාස 136ක් ජයග්රහණය කොට තිබිණි.
මීට අමතරව දිස්ත්රික්ක 21ක් ජයග්රහණය කරමින් මහ මැතිවරණයකදී ජයග්රහණය කළ වැඩිම දිස්ත්රික්ක ගණන මාලිමාව විසින් වාර්තා කළේය. මීට පෙර 2010දී එක්සත් ජනතා නිදහස් සන්ධානය දිස්ත්රික්ක 19ක් ජයග්රහණය කොට තිබිණි.
එමෙන්ම මහ මැතිවරණයක පක්ෂයක් ලබාගත් වැඩිම ඡන්ද සංඛ්යාව වන්නේද මෙයය. ඒ, 6,863,186කි. මීට පෙර 2020දී පොදුජන පෙරමුණ ඡන්ද 6,853,960ක් ලබාගෙන තිබිණි.
දිස්ත්රික් මට්ටමින් වැඩිම ආසන ගණනක් දිනාගත්තේද මාලිමාවය. ඒ, ආසන 141කි. මීට පෙර වැඩිම ආසන සංඛ්යාවක් ජයග්රහණය කර තිබුණේ 2020 වසරේදී පොදුජන පෙරමුණය. එය 128කි.
මහ මැතිවරණයක ලබාගත් වැඩිම ජාතික ලැයිස්තු ආසන ගණන වූ 18ක ප්රමාණය මෙවර මාලිමාව විසින් හිමිකර ගෙන තිබේ. මීට පෙර 2020දී පොදුජන පෙරමුණ ජාතික ලැයිස්තු ආසන 17ක් හිමිකරගෙන තිබිණි.
මහ මැතිවරණයක ජයග්රහණය කළ වැඩිම ආසන සංඛ්යාව දිනාගත්තේද මෙවර මාලිමාව විසිනි. එය 159ක් වන අතර, මීට පෙර 2020දී පොදුජන පෙරමුණ ආසන 145 ජයග්රහණය කර තිබිණි.
සමානුපාතික ක්රමය යටතේ පාර්ලිමේන්තුවේ ආසන 225න් 2/3ක ආසන ප්රමාණයක් තනි පක්ෂයක් විසින් දිනාගැනීමේ වාර්තාවද හිමිවන්නේ මාලිමාවටය.
එමෙන්ම මීට පෙර මහ මැතිවරණයේ 3%ක ඡන්ද ප්රතිශතයේ සිට 61% ඉක්මවූ ජයග්රහණයක් වාර්තා කළ ලංකාවේ පළමු පක්ෂය වන්නේද මාලිමාවය.
සජිත්ට විපක්ෂය
මෙවර මහ මැතිවරණයෙන් ආසන 40ක් ලබාගනිමින් සජිත් ප්රේමදාස මහතාගේ නායකත්වයෙන් යුත් සමගි ජන බලවේගය විපක්ෂයේ බලය අත්පත් කරගැනීමට සමත්ව තිබේ.
සජබය මෙවර ලබාගෙන ඇති ඡන්ද සංඛ්යාව 1,968,717ක් වන අතර, එය ප්රතිශතයක් ලෙස 17.66%කි.
රනිල් සිලින්ඩරෙත් ඉවරම කරයි
අනෙක් අතට මෙවර මහ මැතිවරණයේදී හිටපු ජනාධිපති රනිල් වික්රමසිංහ මහතා විසින් නායකත්වය දුන් සිලින්ඩරය ලකුණ යටතේ තරග වැදුණු නව ප්රජාතන්ත්රවාදී පෙරමුණ අන්ත පරාජයකට ලක්ව තිබීම විශේෂ සිදුවීමකි.
ඒ යටතේ සියලු දිස්ත්රික්කවලට තරග වැදුණු අපේක්ෂකයන් පරාජයට පත්ව ඇති අතර, යන්තමින් හෝ ජයග්රහණය කර තිබුණේ මහනුවරින් අනුරාධ ජයරත්නත්, කළුතරින් රෝහිත අබේගුණවර්ධනත්, බදුල්ලෙන් චාමර සම්පත් දසනායකත්ය.
මීට අමතරව අලියා ලකුණෙන් තරග වැදුණු ජීවන් තොණ්ඩමාන් නුවරඑළියෙන් ජයග්රහණය කර තිබිණි.
කෙසේ වෙතත් මෙවර දැකගැනීමට ලැබුණු සුවිශේෂම තත්ත්වය වන්නේ ඉකුත් මහ මැතිවරණයේදී මෙන්ම මෙවර මහ මැතිවරණයේදී එජාපයෙන් කිසිදු සාමාජිකයකු ජයග්රහණය කර නොතිබීමය. ජයග්රහණය කළ සිවුදෙනාම වෙනත් පක්ෂවල සිට සිලින්ඩරයට එක්වී තරග වැදුණු නියෝජිතයන්ය.
දිලිත්ට එඩිතර පරාජයක්
මීට අමතරව එඩිතර විපක්ෂයක් නිර්මාණය කරන බව කියමින් තරග වැදුණු සර්ව ජන බලය පක්ෂයේ නායක දිලිත් ජයවීර මහතා මෙවර ගම්පහ දිස්ත්රික්කයෙන් අන්ත පරාජයකට ලක්ව තිබේ.
ඒ මහතාගේ පක්ෂයට කිසිදු මන්ත්රී ධුරයක් ලබාගැනීමට නොහැකි වූ අතර, ජාතික ලැයිස්තුවෙන් පමණක් එක් මන්ත්රී ධුරයක් හිමිව තිබේ.
වන්ෂොට් නොකවුට්
එක්සත් ප්රජාතන්ත්රවාදී හඬ පක්ෂයෙන් රන්ජන් රාමනායක මහතාගේ නායකත්වයෙන් තරග වැදුණු කිසිවකුටද මෙවර පාර්ලිමේන්තු අසුනක් හිමිකර ගැනීමට හැකියාව ලැබී නැත.
රන්ජන් රාමනායක මහතා ගම්පහ දිස්ත්රික්කයෙන් තරග වැදුණු අතර, ඔහුද මෙවර මැතිවරණයෙන් පරාජයට පත්ව තිබීම විශේෂත්වයකි.
මෙන්න අවසන් ප්රතිඵලය
ජාතික ජන බලවේගය – 6,863,186 (61.56%) ආසන – 159
සමගි ජන බලවේගය – 1,968,717 (17.66%) ආසන – 40
ඉලංකෙයි තමිල් අරසු කච්චි – 257,813 (2.31%) ආසන – 8
නව ප්රජාතන්ත්රවාදී පෙරමුණ – 500,835 (4.49%) ආසන – 5
ශ්රී ලංකා පොදුජන පෙරමුණ – 350,429 (3.14%) ආසන – 3
ශ්රී ලංකා මුස්ලිම් කොංග්රසය – 87,038 (0.78%) ආසන – 3
සර්වජන බලය -178,008 (1.60%) ආසන – 1
එක්සත් ජාතික පක්ෂය – 66,234 (0.59%) ආසන – 1
ප්රජාතන්ත්රවාදී ද්රවිඩ ජාතික සන්ධානය 66,382 (0.59%) ආසන – 1
අඛිල ඉලංකෙයි තමිල් කොංග්රසය – 39,894 (0.36%) ආසන – 1
අඛිල ඉලංකෙයි මක්කල් කොංග්රසය – 33,911 (0.30%) ආසන 1
යාපනය ස්වාධීන කණ්ඩායම 17 – 27,855 (0.25%) ආසන 1
ශ්රී ලංකා කම්කරු පක්ෂය – 17,710 (0.16%) ආසන 1
