චීනය කොරෝනා වසංගතයේ ව්යසනයට මුහුණ දුන්නේ එරට ආර්ථික අර්බුද සහ රැකියා විරහිතභාවය තදින් තිබුණු අවස්ථාවකදීය. ඒ මගින් උද්ගතව තිබුණු ප්රශ්න තවත් අතිශය දරුණු තත්ත්වයට පත්වන්නට විය. දැනට මාස 04ක පමණ කාලයක් පුරා ආසාදිතයන් 20,000කට වැඩි සංඛ්යාවක් චිනය තුළින් සොයාගනු ලැබූ අතර, මරණ 3500ක්ද වාර්තා වී ඇත. පසුගිය දිනවල මෙම කොරෝනා වසංගත තත්ත්වය යම් ආකාරයකින් සමනය වී තිබුණද නැවත දෙවැනි වතාවටද චීනය තුළ එය හිස ඔසවන ආකාරයද දැන් පහළ වී ඇත. කෙසේ හෝ යම් ආර්ථික ඉලක්කයක් කරා යමින් සිටි චීනය මේ වන විට මහත් දැඩි ආර්ථික අගාධයකට පත්වෙමින් සිටියි.
කොරෝනා වසංගතය මුලින්ම ඇරඹි සහ ඉන් පසුව ප්රබලව ව්යාප්ත වුණු වූහාන් නගරයේ ඇති සියලුම කර්මාන්ත ශාලා සහ පර්යේෂණ හා සංවර්ධන මධ්යස්ථාන රැසක්ද මේ වන විට මුළුමනින්ම වසාදමා ඇත. පසුගිය දිනවල කොරෝනා රෝග තත්ත්වය යම් ආකාරයකින් සමනය වූ හෙයින් මෙම සමහර කර්මාන්ත ශාලා හා සංවර්ධන, පර්යේෂණ මධ්යස්ථාන විවෘත කිරිමට කටයුතු යොදා තිබුණත් නැවැත මෙම රෝගය උත්සන්න වන්නට වූ හෙයින් එම කටයුතු නවතා දමා ඇත. ඒ අතරම චීනයේ මානව සම්පත් සහ සමාජ ආරක්ෂණ අමාත්යංශය ප්රකාශ කර සිටියේ ඉදිරියේදී චීනයේ කර්මාන්ත ශාලාවල කටයුතු නැවත ඇරැඹීම සඳහා මෙතෙක් පැවැති කම්කරු නීති රීති රැසක් ලිහිල් කර විවිධ සහනයන්ද ලබාදෙන බවය. වසංගත රෝග සමයේ රැකියාවලට යන්නට නොහැකි වූ සේවකයන්ට එම කාලය සඳහා අනුමත වන වැටුප් හා දීමනාද අනිවාර්යයෙන් ගෙවිය යුතු බවට නීති රීති පනවා ඇත.
මෙවැනි තත්ත්වයක් යටතේ චීන සේවකයන්ගේ රැකියා අහිමි කිරීම හෝ පඩිනඩි ගෙවීම මඟහැරීම සපුරා තහනම් වන අතර, එලෙස කරනු ලබන කර්මාන්ත ශාලා බලධාරීන්ට එරෙහිව කටයුතු කිරීමටද චීන රජය තීරණය කර ඇත. මේ අතර කොරෝනා වසංගතයට අදාළව විවිධ සහන සේවා කටයුතුවල නිරත වූ චීන සේවක පිරිස්වලටද විශේෂ දීමනා ගෙවීමද රජය විසින් ලබාදෙනු ඇත. ඔවුන්ගේ ණය කාඞ්පත් (ක්රෙඩිට් කාඞ්) සහ ණය මුදල් ලබාගැනීම්වල සහ උකස් කිරීම්වල ආපසු වාරික ගෙවීමද නියමිත කාලයට වඩා කල් දැමීමට රජය තීරණය කර ඇත. එසේම එසේ සාමාන්ය ජනතාවගේ විදුලි, ජල සහ දුරකතන බිල්පත්වල ගෙවීම් කාලසීමාවද ඉදිරියට දමා ඇත. තවද එම සේවා කිසිදු කප්පාදුවකින් තොරව සිදු කෙරෙයි. එය ජනතාවට මහත් සහනයකි.
මේ අතර චීනයේ තිබෙන අති සුවිශාල කර්මාන්ත ශාලා වන නැව්, දුම්රිය සහ ගුවන් යානා නිෂ්පාදනය කරන සමාගම් සියල්ලෙහිම කටයුතු මේ වන විට මුළුමනින්ම නවතා දමා ඇත. දශක ගණනක් පුරා චීනය විසින් ලෝකයේ රටවල් රාශියකට නැව්, දුම්රිය සහ ගුවන් යානා සපයනු ලබන අතර, එය වාණිජ මට්ටමින් සහ හමුදාමය මට්ටමින්ද සිදුකෙරෙයි. මේ නිසා ඉදිරියේදී කාලයක් යනතුරු ලෝකයේ රටවලට එවැනි සැපයුම් ලබාදීමට ප්රමාද වනු ඇත. එසේම චීනයේ අවි ආයුධ නිෂ්පාදනය කරන සමාගම්වලද කටයුතු ඇනහිට ඇත. චීනය ලෝකයේ රටවල් රැසකට අවි ආයුධ සපයයි.
චීනයේ ඇති තවත් සුවිශාල කර්මාන්ත ශාලා සමූහයක් වන්නේ ලෝකයේ ප්රකට ජංගම දුරකතන සන්නාම නාමයක් රැසක් යටතේ ජංගම දුරකතන නිෂ්පාදනය කරනු ලබන සමාගම්ය. මෙම සමාගම්වල කටයුතු මුළුමනින්ම පාහේ අඩාලව ඇති අතර, එවැනි කර්මාන්ත ශාලාවල සේවකයන් 400,000කට (ලක්ෂ 04ක්) අධික පිරිසක් සේවය කරති. එහෙත් කෙසේ හෝ ජංගම දුරකතන සන්නිවේදන සේවා සපයන ප්රධාන සමාගම් සියල්ලම තම කටයුතු කිසිදු අඩාලවීමකින් තොරව සිදුකරගෙන යනු ලබයි. එම කටයුතු බාධාවකින් තොරව සිදු කිරීමට චීන රජය එම සමාගම්වලට උපදෙස් ලබාදී ඇත.
කෙසේ හෝ දැන් පසුගිය කාලය තුළ කොරෝනා වසංගතයේ යම් අඩුවීමක් වීමත් චීනය තුළ දක්නට වූ හෙයින් මෙසේ වසා දමා ඇති සමහර අත්යවශ්ය කර්මාන්ත ශාලා පමණක් නැවත ආරම්භ කර ඒවායෙහි කටයුතු යම් පමණින් සිදු කෙරීගෙන යනු ලබන බැව් චීනයේ රාජ්ය නිල පුවත් සේවය වන ‘ෂින්හුවා’ ප්රකාශ කර ඇත. මේ නිසා දැන් යම් පමණකින් සේවකයෝ තම රාජකාරි කටයුතුවලට පැමිණෙමින් සිටිති.
දැනට චීනයේ කොරෝනා වසංගත තත්ත්වය යම් ආකාරයකින් පාලනය කර තිබුණද මුලින්ම මෙම වසංගතය ඇතිවූ අවස්ථාවේ එය මෙල්ල කර ගැනීමට චීන රජය සහ චීන ජනාධිපති ෂී පින් පින් කටයුතු නොකළ බවට චීන ජනතාව දොස් පවරති. පසුගිය නොවැම්බර් මාසයේ අගදී මෙම මාරක රෝගය දැනගත් විටදී චීන රජය එවැන්නක් නැති බවට ජනතාවට අසත්ය කරුණු ප්රකාශ කරමින් වංචනික අයුරින් කටයුතු කළේය. මෙම රෝගය ගැන කරුණු හෙළිකළ සමහර විද්වත් පිරිස් සොයා අත්අඩංගුවට ගෙන ඔවුනට එරෙහිව දඬුවම්ද පමුණුවනු ලැබීය. මෙම වගතුග මාධ්යයෙන් හෙළිකළ මාධ්යවේදීන් දෙදෙනකු පවා අතුරුදන් විය. මේ තත්ත්වය යටතේ චීන රජය කෙරෙහි චීන ජනතාවගේ ඇති විශ්වාසයද බිඳහෙළිණි. අවසානයේදී කොරෝනා මාරයා මුළු චීනයම ගිල ගන්නා තත්ත්වයට පත්විය.
පරිවර්තනය – ප්රියන්ත හෙට්ටිගේ
