පසුගියදා ශ්රී ලංකාවට බලපෑ සුළි කුණාටුව සහ ගංවතුර තත්ත්වය සම්බන්ධයෙන් ශ්රීපාද අඩවියේ බවුන් වඩන ස්වාමින්වහන්සේ නමක් මීට කලකට ඉහතදී Dhanush Vlogs SL යූටියුබ් නාලිකාව සමග සිදුකළ සංවාදයකදී පුරෝකථනය කර තිබෙනවා. පහත පළවන්නේ එම සංවාදයෙන් උපුටාගත් කොටසකි.Sri Lanka Latest News
ස්වාමින්වහන්සේ
සමහරවිට වාතය වෙන්න පුළුවන්, ජලය වෙන්න පුළුවන්. ආසියාව හරහා යම්කිසි ප්රදේශයක් පුරා හමායාමක් සිදුවෙනවා. මේක සුනාමිය කියලා බාරගන්නවත් එපා, සුළි සුළඟක් කියලා බාරගන්නවත් එපා. මං දකිනවා හමායාමක් යනවා. මේ හමායාම ලංකාවේ උතුරු නැගෙනහිර දෙපළාතට විශේෂයෙන්ම බලපානවා. අනුරාධපුර පොළොන්නරුවෙන් මෙහා පැත්ත, රට මැද කඳුකර හරිය, නැගෙනහිර සිට උතුරට හමා යාමකුත්, උතුර සිට දකුණට හමායාමකුත්, කැලඹීමක්. වාතය සහ ජලය දෙකම වෙන්න පුළුවන්, වාතය වෙන්න පුළුවන් ජලය වෙන්න පුළුවන් හමා යාමක් මං දකිනවා. අවසාන මාස හය තුළ කියමු. කාල නිර්ණයක් මට දෙන්න වෙන්නේ එහෙමයි. ඒක සක්රීය වෙලා ඇවිල්ලා ලොකු හමා යාමක්. ඉතින් ව්යසනයක්. ජනතාව ආරක්ෂා කරගන්න ඕනේ.
ප්රශ්නය
එහෙම ආරක්ෂා වෙන්න සුදුසු ස්ථානක් හරි, ඔය විනාශයට අහු නොවෙන ස්ථානයක් හරි අපේ ලංකාවේ තිබෙනවද ස්වාමින්වහන්ස?
ස්වාමින්වහන්සේ
මහපොළොව තුළ සිදුවන ස්වභාවික විපත්වලින් ආරක්ෂා වෙන්න ‘න අන්තලික්ඛේ න සමුද්ද මජ්ඣ – න පබ්බතානං විවරං පවිස්ස – න විජ්ජතී සෝ ජගතිප්පදේසෝ – යත්ථට්ඨිතෝ මුච්චෙය්ය පාපකම්මා’ කරපු පාප කර්මයෙන් මිදීමට අහසේ හැංගෙන්න තැනක් නෑ. පර්වත විවරයකවත් ගල් ගුහාවකවත් හැංගෙන්න තැනක් නෑ. මහ මුහුදේ රළ අස්සෙවත් හැංගිලා බේරෙන්න බෑ පාප කර්මයෙන්. මේ ලෝකවාසී ජනතාවම එක්තරා පාපකර්මී ක්රියා දාමයක් අරගෙන යනවා, ඔක්කොම එකතු වෙලා. එකෙක් දෙන්නෙක් නෙමෙයි, මුළු ලෝකවාසී ජනතාවම එක්තරා පාපකාරී රැල්ලක හඹා යනවා. ඉතින් ඒකට හැංගිලා හරියන්නෑ. හැංගෙන්න තියෙන්නේ තමන්ගේ සිත තුළ. සිතට හොරා මුකුත් කරන්න බැහැ, එහෙනම් හිතේ හැංගි මුත්තන් කෙළින්නේ නැතුව හිටියා නම් ඒකෙන් බේරෙන්න පුළුවන්.
ප්රශ්නය
අපි ඔය එන ව්යසනයෙන් ගැලවෙන්න නම් අපේ ලංකාවාසීන් කොයි විදියටද හැසිරෙන්න ඕනෙ ස්වාමින්වහන්ස?
ස්වාමින්වහන්සේ
‘ධම්මෝ හවේ රක්ඛති ධම්මචාරී’ – ධර්මයේ හැසිරීම ප්රමාණවත්. බුදු හාමුදුරුවෝ දීලා තියෙනවා පෝය දවසට අටසිල්, නිති පිරිසිදුව පන්සිල් රකින්න කියලා. ගිහියන්ට. කවුද රැකපු කෙනා. කවුද මේ පංචශීලය තුළ හිටපු එක්කෙනා? සතුන් නොමරමි කියන ස්වභාවධර්මයේ න්යායක්. මම මේ තුළ වාසය කරමි. අන් සතු දේ නොගනිමි කියන න්යායක්. බලන්න එතකොට අන් සතු දේ නොගනිමි කියන නියමයක් තිබුණාම දැන් මහා ධනස්කන්ධය තියෙන්නේ රාජ්ය භාණ්ඩාගාරය සතුවනේ. අපේ ලංකාවෙ ගත්තොත් රටේම ජනතාව පෝෂණය කරන්නේ මහබැංකුව හරහා. ඒක තමයි හදවත. ඉස්සර රජ කාලේ මුදල් ඇමැතිකම වගේ තනතුරු දුන්නම, ඒ මනුස්සයා භාණ්ඩාගාරේ හිස්වීමක් වුණොත් (මහමුදලි කෙනෙක් වගේ වෙන්න පුළුවන්) ඒ මනුස්සයාගේ පෞද්ගලික ධනය ගෙනත් දාලා භාණ්ඩාගාරය ආරක්ෂා කරනවා. මොකද රටට ව්යසනයක් වෙන්න ඉඩ නොතබා. ඒ සැබෑම රාජ පාලකයෙක්. දැන් මෑත යුගයේ, මම කියන්නේ නැහැ… මේ පාලකයෝ පාලකයෝ එකෙකාට කියාගන්න ටික මම කියන්නේ… එක එකා කිව්වට තරහ වෙන්නත් එපා, එහෙම කිව්වට කමක් නැහැ. මහබැංකුව මේ මහ දවල් බිඳගෙන කෑවයි කියලා ඒගොල්ලො ඒගොල්ලන්ට චෝදනා කරනවා. අපි චෝදනා කරාද? නෑ. ජනතාව චෝදනා කරාද? නෑ. පාලකයින් පාලකයින්ට චෝදනා කරගන්නවා. ‘වැටත් නියරත් ගොයම් කා නම් – කාට පවසම් මේ දුකා…’
ඉතින් දරුවෝ, පුරාතනයේ රට පෝෂණය කිරීමට මුදල් ඇමැතිගේ පෞද්ගලික ධනය ගෙනල්ල භාණ්ඩාගාරය ආරක්ෂා කරලා තිබ්බා. රජ්ජුරුවො දන්නෙත් නෑ. ඒ දුන්න තනතුර එයා ඉහළම අන්දමින් රැකගෙන හිටියා. මුකුත් වෙන්න දුන්නේ නෑ. ඒකට තමයි අද එක එක්කෙනා පත්කරලා තියෙන්නේ. රාජ්ය නායකයාට ඔක්කොටම ඇඟිලි ගහන්න පුළුවන්ද? බෑ. ඒවා බෙදලා දුන්නම එයා දැනගන්න ඕනෙ ඒ ටික කරලා තියන්න. එදා මුදල් ඇමැති වගේ තනතුර දරපු එක්කෙනා එයාගේ පෞද්ගලික ධනය ගෙනල්ලා දාලා රාජ්ය භාණ්ඩාගාරය හිස් කරන්නේ නෑ, සම්පූර්ණ කරලා තියෙනවා. විපතක් වුණාම ඇමැතිගෙන් අහන්නෙ නෑ රජ්ජුරුවො දන්නවා භාණ්ඩාගාරේ තියෙනවා නේ. බය නෑ, රටට විපතක් එනකොට රාජ්ය භාණ්ඩාගාරය හිස්වෙලා නෑනේ. දැන් ඉතින් මහබැංකුව බිඳගෙන කනවා නම් ජනතාවට කාගේ පිළිසරණක්ද?
එතකොට අන්න, අන් සතු දේ පැහැරගන්නේ ඉහළ පෙළේ පාලකයෝ ටික නම්, ප්රබල පිරිස නම්, ජනතාවට කවර පසුබිමක්ද? ඔන්න ස්වභාවධර්මය විපාක දෙනවා ඔක්කොම දෙනාට. ස්වභාව ධර්මයේ විපාක දෙනකොට තෝර තෝරා ඉන්නේ නෑ ස්වභාව ධර්මය. මේ අපේ රටේ විතරක් නෙවෙයි, ලෝකෙ පුරාමත් එච්චරයි. මම මේ අපේ රාජ්ය භාණ්ඩාගාරය ගැන විතරක් චෝදනා කරනවා නෙමෙයි, ලෝකෙ පුරාම එච්චරයි.
අපේ ගැමි වහරේ ලස්සන කතාවක් තියෙනවා. ගුරුන්නාන්සේ හිටගෙන බඩ දිය ඇල්ලුවොත්, ගෝලයා දුව දුවා ඕක කරනවාලුනේ? ඉතින් පාලකයෝ ටික මෙහෙම කළාම පල්ලෙහා නිලධාරී මණ්ඩලය කෙසේ වෙයිද? රටක් පවතීද? ලෝකයක් පවතීද? මේකට දඬුවම් දෙන්න උසාවියකුත් තියෙන්න එපායැ. දැන් පොල් ගෙඩියක් කැඩුවම හොරෙක්, එයාට දඬුවම් දෙනවා උසාවියකට දාලා. දැන් එතකොට මේ මූල සාධක, පළමු පිරිස, පාලක පිරිස කරන අපරාධවලට දඬුවම් දෙන්න කෝ උසාවියක්? තියෙනවද? ඒ අයට දඬුවම් දෙන්න තියෙනවද උසාවියක්? ඒ අයටත් දඬුවම් දෙන්න ස්වභාවධර්මයේ නීතිය තියෙනවා. ඒ දඬුවම තමයි මේ ලැබෙමින් පවතින්නේ. ලෝකෙ පුරාම ඔය ටික තමයි වෙලා තියෙන්නේ. ලංකාවේ විතරක් නොවෙයි, ලෝකෙ පුරාම ඔය ටික වෙලා තියෙනවා. එහෙනම් ස්වභාවධර්මයේ න්යාය නීතිය, ස්වභාවධර්මයේ නීතිය ඔය සියලු දෙනාට දඬුවම් දෙනවා.
චානක ලියනගේ
