මේ මොහොතේ ශ්රී ලංකාවේ විගණකාධිපතිවරයෙක් නැහැ. මාස හතක් තිස්සේ විගණකාධිපති තනතුර හිස්. මාස හතක් තිස්සේ රටේ ඉන්නේ වැඩබලන විගණකාධිපතිවරයෙක්. ජී.එච්.ඩී ධර්මපාල. ඔහු වසර තිහක් විගණකාධිපති දෙපාර්තමේන්තුවේ සේවය කරන, නියෝජ්ය විගණකාධිපතිවරයා. තනතුරට සුදුසුම පුද්ගලයා ඔහු. ඔහු තමයි විගණකාධිපතිවරයාගේ අනුප්රාප්තිකයා. නමුත් ජනාධිපතිවරයා විසින් තවමත් වැඩබලන විගණකාධිපතිවරයාව සිය තනතුරේ ස්ථිර කර නැහැ.Sri Lanka Latest News
විගණකාධිපති තනතුර ස්ථිර කරන්නේ ව්යවස්ථාදායක සභාවෙන්. ඒ සඳහා නමක් යෝජනා කර එවිය යුත්තේ ජනාධිපතිවරයා. හිටපු විගණකාධිපතිවරයා විශ්රාම ගියාට පස්සේ, ජනාධිපතිවරයා එම තනතුරට එස්.ජී.බී චන්දන යෝජනා කළා. ඔහු එක දවසක්වත් රාජ්ය සේවයේ වැඩ කරපු පුද්ගලයෙක් නෙවෙයි. ඔහුට විගණකාධිපති දෙපාර්තමේන්තුවේ කිසිදු අත්දැකීමක් නැහැ. මේ රටේ වැදගත්ම තනතුරක්. අත්දැකීම් නැති මිනිහෙකුට කරන්න පුළුවන් තනතුරක් නෙවෙයි. ඇයි එහෙනම් අනුරට, චන්දනටම විගණකාධිපති ධුරය ලබාදීමට අවශ්ය වුණේ?
චන්දන ජනාධිපතිවරයාගේ කැලණි කල්ලියේ පුද්ගලික මිතුරෙක්. ඔහුට ශ්රී ලංකාවේ වැදගත්ම තනතුරකට පත්වීමට තිබුණු ප්රධාන සුදුසුකම ඒ මිත්රත්වය. රටේ විගණකාධිපති ධුරය කියන්නේ ස්වාධීන වියයුතු තනතුරක්. මහජන මුදල් අවභාවිතයන්, වංචා, දූෂණ මේ සියල්ලටම නඩු පැවරීමේදී විගණකාධිපති වාර්තා අත්යාවශ්යයි.
මෙච්චර කාලයක් රට පාලනය කරපු කිසිම ආණ්ඩුවක් විගණකාධිපති තනතුරට අත තිබ්බේ නැහැ. විගණකාධිපති ධුරය දේශපාලනික වුණේ නැහැ. ඒ ඒ රජයන් විසින් සිදුකළ අවභාවිතයන් ගැන නිර්භීත විගණන වාර්තා පවතින්නේ ඒකයි. හැබැයි විගණකාධිපති ආණ්ඩුවේ ඉත්තෙක් වුණාම, විගණකාධිපති දෙපාර්තමේන්තුවට වෙන්නෙත් අල්ලස් කොමිසමට වෙච්ච දේමයි. ‘පිරිසිදු’ය කියන මාලිමා ආණ්ඩුවට විගණකාධිපති තනතුර පවා තමන්ගේ ගෝලයකුට දෙන්න වුවමනා වුණා. නමුත් ව්යවස්ථාදායක සභාව එම යෝජනාව ප්රතික්ෂේප කළා. නියෝජ්ය විගණකාධිපතිවරයා, වැඩබලන විගණකාධිපති තනතුරට පත්වෙන්නේ ඊට පස්සේ.
හැබැයි එතැනින් පස්සේ ජනාධිපති අනුර ඔහුගේ තනතුර ස්ථිර කරන්නේ නැහැ. ඒ වෙනුවට ඔහුට වැඩබලන තනතුරට මාස තුනෙන් තුනට කොන්ත්රාත්තු ලබාදෙනවා. මෙවර ව්යවස්ථාදායක සභාවෙන් ඔහුගේ වැඩබලන පත්වීම ස්ථිර කිරීම ප්රතික්ෂේප කළා. ව්යවස්ථාදායක සභාවෙන් වැඩබලන විගණකාධිපතිවරයාගේ ස්ථිර කිරීම ඉල්ලා සිටිනවා. නමුත් අනුරට වුවමනා ඔහු වැඩබලන තනතුරේ තබාගැනීමට පමණයි. වෙලාව ආපු ගමන් තමන්ගේ මිත්රයාට ලබාදීම වෙනුවෙන් ඔහු තනතුර ආරක්ෂා කරමින් සිටිනවා.
දැන් ශ්රී ලංකාව විගණකාධිපතිවරයකු නොමැති රටක්. ඒක තනිකරම සිදුවුණේ ජනපති අනුරගේ, රටේ හැම තනතුරක්ම පැලවත්තට ලබාදීමේ වුවමනාව නිසා. ලංකාව වගේ රටකට විගණකාධිපතිවරයෙක් නැතිවීම පාඩුවක්. හැබැයි මේ වගේ ආපදා වෙලාවක රටකට විගණකාධිපතිවරයෙක් නැතිවීම ඊට එහා ගිය මහා ජාතික අපරාධයක් ?
ඒ ඇයි ? මේ ශ්රී ලංකාව ආපදාවකට මුහුණ දීලා ඉන්න වෙලාවක්. රටේ යටිතල පහසුකම්, රටේ ජන ජීවිතය, රටේ ආර්ථිකය හැකි ඉක්මනින් යථාතත්ත්වයට පත්කරන්න වුවමනායි. ඒකට ශ්රී ලංකාවට විදෙස් ආධාර ඕනෙ.
බොහෝ විදෙස් රටවල්, විදෙස් සංවිධාන රටකට ආධාර ලබාදෙද්දී ඒ රටේ සිස්ටම් එක බලනවා. තමන් ලබාදෙන ආධාර කොතරම් දුරට අරමුණු වෙනුවෙන් වැයවෙනවද කියලා දැනගන්න සිස්ටම් එකක් ඔවුන්ට වුවමනායි. අපි හොරකම් නොකරන, පිරිසිදු ආණ්ඩුවක්ය කියලා වැඩක් නැහැ. හොරු හිටියේ කලින්ය කියලා තේරුමක් නැහැ. ලංකාවේ ඩෝබීන් වගේ විදෙස් රටවල්, ජාත්යන්තර සංවිධාන දේශපාලන සටන් පාඨ අමුවෙන් ගිලින්නේ නැහැ. ඔවුන්ට අවශ්ය සිස්ටම්ස්. ඒ රටවල්, තානාපති කාර්යාල, සංවිධාන, පරීක්ෂා කරද්දි රටේ ස්ථිර විගණකාධිපතිවරයෙක් නැතිවීම රටට ලොකු පාඩුවක්.
අවම වශයෙන් ව්යවසනයට පස්සෙවත් ආණ්ඩුවට විගණකාධිපතිවරයෙක් පත්කිරීමට තිබුණා. නමුත් දේශපාලනික අවශ්යතා නිසා ඒ පත්කිරීම සිදුවුණේ නැහැ. මාලිමා ආණ්ඩුව ෆේල් කියලා කියන්නේ, ඔවුන්ගේ අසමත්කම, දැක්මක් නොමැතිකම නිසාම නෙවෙයි. ඔවුන්ගේ දේශපාලනික තීරණ නිසා, රාජ්ය සේවය සහ ස්වාධීන ආයතන පවා පැලවත්ත යටතට ගැනීමේ උණ නිසා සිදුවන වක්රව සහ අනියමින් රටට සිදුවන විනාශයන්ද ඊට හේතුවක්.
ඉතින් මේවා ලියන අපි ඉලක්ක කර මුදල් ගෙවා මඩ කැම්පේන් කළාට තේරුමක් නැහැ. අපිට මඩ ගහන්න බජට් අනුමත කරන වේගයෙන්ම සුළි කුණාටුවට සූදානම් වුණා නම් අද රටට මේ තරම් අපරාධයක් නොවෙන්න තිබුණා.
මංජුල රාජපක්ෂ
