පාස්කු ප්රහාරයත් කොවිඩ් වසංගතයත් මගින් සිදුවූ අහිතකර බලපෑමෙන් අනතුරුව මෙරට සංචාරක කර්මාන්තය නැවත ප්රගතියක් ලබා ඇති බවත්, එවැනි පසුබිමක් තුළ වත්මන් රජය වීසා ගාස්තු වැඩිකිරීම හරහා සංචාරක කර්මාන්තය යළි බිඳවැටීමකට ලක්විය හැකි බව විපක්ෂ නායක සජිත් ප්රේමදාස මහතා පැවැසීය. (Sri Lanka Latest News)
පාස්කු ප්රහාරයත් කොවිඩ් වසංගතයත් මගින් සිදුවූ අහිතකර බලපෑමෙන් අනතුරුව මෙරට සංචාරක කර්මාන්තය යළිත් ප්රගතියක් ලබා ඇති බව පෙනෙන්නට තිබෙනවා. ඒ පිළිබඳ අපි සතුටු වෙනවා. එවැනි පසුබිමක් තුළ වත්මන් රජය හදිසියේම වීසා සඳහා අයකරනු ලබන ගාස්තු වැඩිකර ඇති බව වාර්තා වෙනවා. මෙය පිබිදෙමින් පවතින මෙරට සංචාරක කර්මාන්තය යළි බිඳවැටීමකට හේතුවිය හැකි බව අපි විශ්වාස කරනවා. රජයේ අත්තනෝමතික තීරණ හමුවේ මෙරටට විශාල විදේශ විනිමයක් උපයා දෙන සංචාරක කර්මාන්තය කඩාවැටීම සමස්ත රටටම අහිතකර වෙනවා කියන එක දන්නේ නැද්ද කියලා මම අහන්න කැමැතියි. මම කැමැතියි විශේෂයෙන්ම මේ වීසා ප්රශ්නය පිළිබඳ ප්රශ්න ගණනාවක් ඉදිරිපත් කරන්න.
විශේෂයෙන්ම මම සභාගත කරන්න කැමැතියි The Hotels Association of Sri Lanka සහ SLAITO කියන ආයතන මේ වීසා ගාස්තු වැඩිකිරීම පිළිබඳ විමතියට පත්වෙලා තිබෙනවා. ඒ අය ඉදිරිපත් කරපු ලිපි මම මේ අවස්ථාවේ සභාගත කරනවා, හැන්සාඩ්ගත කරනවා රජයේ දැනගැනීම පිණිස.
මම මේ අවස්ථාවේ ඉදිරිපත් කරනවා මේ වීසා ලබාදීමේ ක්රමය වෙනස් කිරීම පිළිබඳ කැබිනට් පත්රිකා කිහිපයක් ඉදිරිපත් වුණා. ඒ කැබිනට් පත්රිකාවලින් මේක පිළිබඳ අනු කමිටුවක් ස්ථාපනය කරලා ඒ අනුකමිටුව වාර්තාවක් ඉදිරිපත් කරලා තිබුණා. ඒ අනුකමිටු වාර්තාව තුළ බොහොම පැහැදිලිව සඳහන් වෙනවා පවතින ක්රමයේ තියෙන මෘදුකාංග පහසුකම් අලුත් ක්රමය තුළ නැති කතාවක්. පවතින ක්රමය තුළින් අයකරලා තියෙන්නේ ඉල්ලුම්කරුවන්ගෙන් එක ඩොලර් එකයි. නමුත් මේක වැඩිවෙලා තිබෙනවා ඩොලර් 18 දක්වා. ඒ වගේම අපේ රටේ නීතියට අනුකූලවද මේ අලුත් ක්රමවේදය ක්රියාත්මක වෙන්නේ කියන එක මම අහන්න කැමැතියි. ඒ වගේම ආයතන 3ක එකතුවක් හරහා තමයි මේ නව වීසා ක්රමවේදය ක්රියාත්මක වන්නේ. මේ කරුණු සලකා බලලද අදාළ ගිවිසුම් අස්සන් වෙන්නේ කියන එකත් මම අහන්න කැමැතියි. මේ කාරණාව පිළිබඳ රජයෙන් විධිමත් පිළිතුරක් බලාපොරොත්තු වෙනවා.
