අපේ රටේ සහ අපට අසල්වැසි වූ අල්ලපු රටේ සිනමා නළුවන් දෙන්නෙක් ගැන කතාවක් කියන්නයි මේ සූදානම් වෙන්නේ. කතාව එයාලගේ නළුකම හෝ ජනප්රියත්වය ගැන නම් නෙවෙයි. ජනප්රියත්වය ගැන සඳහන් කරනවා නම් ඒ දෙන්නම ජනප්රිය නළුවෝ. එක්කෙනෙක් අපේ රන්ජන් රාමනායක. අසල්වැසි නළුවා කොලිවුඩය හොල්ලලා අතෑරපු සුපිරි වීරයා තලපති විජය. මේ දෙන්නම පසුගියදාක ප්රසිද්ධ දේශපාලනයට පය තිබ්බා. නිල වශයෙන් තම තමන්ගේ පක්ෂ හඳුන්වා දෙමින් මීටින් දෙකකුත් තිබ්බා. මේ ලියවිල්ලට මුල් වෙන්නේ අන්න ඒ කතන්දරයයි. ඒ කතාවේදී මුලින්ම අපි අපේ නළුවා ගැන කතා කරමු. රන්ජන් රාමනායක කියන්නේ ලංකාවම නෙවෙයි වුණත් ලංකාවේ බොහොමයක් මිනිස්සු ඇලුම් කරපු චරිතයක්. ඒ ඇලුම් කිරීමට යම් හේතු තිබුණා. එකක් ඔහු සරසවි සම්මානය කිහිප වතාවක්ම දිනාගැනීම. අනෙක දේශපාලන විෂය තුළ ඇති කරගත් මානුෂීය මුහුණුවර. විශේෂයෙන් මැදපෙරදිග සේවය සඳහා යන අපේ කාන්තාවන්ට සිදුවන අසාධාරණකම් වෙනුවෙන් නිතර හඬ නැගීම හුවාදක්වන්න පුළුවන්. මිනිස්සු ඔහුට ප්රිය කිරීමට තව හේතු තිබුණා. එකක් රාජපක්ෂ රෙජීමයට විරුද්ධව නැගී සිටීම. අනෙක රාජපක්ෂලාගේ ආණ්ඩු කාලයේදීම ඔහුව සිර අඩස්සියට දැමීම. (Sri Lanka Latest News)
‘රැවැටෙන්න එපා මල්ලි. උන්ට දේශපාලනයෙදී සතුරෝ වාගේ රඟපෑවට උන් ඔක්කොම යාළුවො මල්ලි…’
‘බලනකොට ඔක්කොම එකයි. උන් හැමෝම හොරු මල්ලි…’
ප්රසිද්ධියේ මයික් එකක් ඉස්සරහට ආවම නිතර කියන ඒ කතාව හින්දත් රන්ජන් රාමනායක ලොකු මිනිස්සු අතර කෙසේ වෙතත් පොඩි මිනිස්සු අතර ජනප්රිය වුණා. සෝෂල් මීඩියාවල පවා ඔහුගේ ඒ කතාවලට හොඳ ජනප්රියත්වයක් ලැබුණා. සමහර ජාතික පුවත්පත්වල ඔහුගේ ඒ ජනප්රිය කියමන් සිරස්තලවලට ගත්ත තැන්ද තිබුණා. අවසානයේ සිද්ධ වුණේ හැම දේශපාලකයකුටම ඇඟිල්ල දිගුකරමින් කියාපු ඒ ‘හොරු’ කතාව ඌරගේ මාළු ඌරගෙ ඇඟේම තියලා කපනවා වගේ ඔහුගේ පැත්තටම බූමරංගයක් වෙලා ආපු එකයි.
‘රන්ජන් ඉවරෙටම ඉවරයි. සල්ලිවලට පොල්ල තියලා සුගතදාසය ගිනි අරන්…’
‘අනුන්නට හොරා හොරා කියපු රන්ජන් රාමනායක අන්න පල් හොරෙකුට අහුවෙලා…’
ඊයේ පෙරේදා දවස්වල රන්ජන් ගැන මාධ්යවල ගියේ එහෙම කතා. ඒ කතා බොරුත් නෙවෙයි. සම්පූර්ණ ඇත්ත කතා. සුගතදාස ස්ටේඩියම් එකේ මහ ලොකුවට රන්ජන් සංවිධාන කරලා තිබුණු මීටින් එකට ඔහුගේ මංගල රැස්වීමට සෙනඟ ගෙන්නුවේ සුපිරි කෑම පැකට් එකකුයි තරමක සල්ලියකුයි දෙන ඇග්රිමන්ට් එක පිටලු. කතා කරගත්ත ඒ සෙනඟ අතර කැම්පස්වල කොල්ලෝ කෙල්ලොත් ඉඳලා. රැස්වීම ඉවර වුණාට පස්සේ දෙනවයි කිව්ව කෑම එකත් නැහැලු. සල්ලිත් නැහැලු. අනෙක මිනිස්සු කට වහගෙන පාඩුවේ ගෙදර ගියාට කැම්පස් කොල්ලෝ කෙල්ලෝ ටික නිකන් ඉඳලා නැහැ. උන් ටික ප්රසිද්ධ මාධ්යත් එක්ක එකතු වෙලා රන්ජන්ගේ පතුරු අරින්න ගත්තා. පසුගිය දවස්වල සෝෂල් මීඩියා පුරාත් මේ නවනින්දාව නිසා ඔහු මිනිස්සු අතර මවලා තිබුණු ඔහු විසින් ගොඩනගාගෙන තිබුණු යම් ජනප්රිය බවක් තිබුණද ඒ ජනප්රියත්වය සෝදාපාළුවෙලා ගියා.
‘රන්ජන් ඉවරෙටම ඉවරයි…’අන්න එහෙමයි මාධ්ය ඔහුගේ පතුරු ඇරියේ.
මහින්ද රාජපක්ෂට ‘සුනාමි හොරා’ කියලා ප්රසිද්ධියේම කෑගහපු, තව බොහෝ දේශපාලකයන්ට ‘හොරා’ කියපු රන්ජන් මේ විදියට ඇදගෙන නාගත්තේ ඇයි? මහ මැතිවරණයට ඉදිරිපත්ව සිටින දේශපාලන පක්ෂයක කවුරුත් නම ගම අහලා තියෙන ප්රසිද්ධ පුද්ගලයකු මාධ්ය හමුවේ කියා සිටියේ,
‘අනෙක් දේශපාලකයන්ට ‘හොරා’ කියපු රන්ජන් අන්න අලි හොරෙකුට අහුවෙලා’ යැයි කියාය.
අලි හොරා යැයි ඔහු කියන්නට ඇත්තේ සුබාස්කරන් අලිරාජා ගැනය. පොතේ හැටියට රන්ජන් නායකත්වය දරන එක්සත් ප්රජාතන්ත්රවාදී හඬ පක්ෂයට සල්ලි දෙන්නේ සුබාස්කරන් අලි රාජාය. ඉහත කී පුද්ගලයා අලි හොරෙකුට අහුවෙලා කියා නොකියා කීවේ ඒ කාරණය වන්නට ඇත. ඒක වෙනම කතාවකි. හා පුරා කියා සංවිධාන කරපු සිය මීටිමට අල්ලස් දී පිරිස ගෙන්වන එක තවත් කතාවකි. රන්ජන්ට එහෙම නොකර ඉන්නට තිබිණි. අනෙකුත් දේශපාලකයන්ට හොරා කියා කාඩ් ගහපු ඔහු, අන්තිමේදී තමාගේ කාඩ් එක තමා අතින්ම ගහ ගත්තේය. රාජපක්ෂලා මීටින්වලට සෝබනේට වාගේ හෙලිකොප්ටරෙන් ඇවිත් බහින එකට ඇතිවෙන්නම ගැසූ ඔහු තම යාම් ඊම් සඳහාද හෙලිකොප්ටරයට නැග්ගේය. බලාගෙන යනකොට රන්ජන්ගේ කාඩ් එක කුඩේ කුඩුය.
ජනප්රියත්වය තිබුණාට යහමින් සල්ලි වීසි කරන්න කෙරුම්කාරයෙක් හිටියාට හොඳ දේශපාලන නායකත්වයකට ඒ වරප්රසාද විතරක්ම සුදුසුකමක් වන්නේ නැති වග රන්ජන් දැනගන්නට ඕනෑය. නව දේශපාලන පක්ෂයක ස්ථාවරය ගොඩනගන විට සැලසුම් සහ ප්රතිපත්ති මිසක කයිවාරු හරියන්නේ නැත. කොහොමින් හරි කිව යුත්තේ රන්ජන් ඇදගෙන නාගත් බවකි.
ඒ අපේ රන්ජාගේ නෑම ගැන කතාන්දරයය. ඒ අතර තලපති විජයගේ දේශපාලන ආගමනයද සිදුවිය.
සිය දේශපාලන ගමන ගැන සුබ නිමිත්ත විජය ප්රසිද්ධ මාධ්යයට කිව්වේ මීට වසරකට හමාරකට පළමුවය. ඒ කාලය අතරතුර ‘තමිල්ගා වෙටි්ර කසාගම්’ නමින් වූ තම පක්ෂයෙහි විජග්රාහී පැමිණීම සිදුවිය යුතු ආකාරය ගැන සැලසුම් කළේය. ඉතා කල්පනාකාරීව එහි පිඹුරුපත් සැකසුවේය. 2024 අවුරුද්ද තුළ දේශපාලන ගමන අරඹනවා යැයි කී ආකාරයටම ඔහු 2024 ඔක්තෝබර් මස 27 වැනි දින තමිල්නාඩුවල වික්රවත්හිදී ඔහු සිය සමාරම්භක උත්සවය පැවැත්වූයේය. එය ඉතා උත්කර්ෂවත්ව තිබිණි. සංවිධානශීලීව තිබිණී. ඔහුට සහාය දෙන ආධාරකරුවන්ගේ හැසිරීමද උද්යෝගිමත් විය. අතිවිශාල ජනකාය අමතමින් විජය කළ කතාව බොහෝ ප්රශංසනීය බව දේශපාලන විචාරකයන් පවසා තිබිණි. මුළු ඉන්දියාවේම අවධානයට ලක්වූ ඔහුගේ කුලුඳුල් දේශපාලන මීටිමෙහි සමහර දර්ශන සෝෂල් මීඩියාවල සීමාවක් නැතිව වයිරල් වන්නට විය. කොටින්ම කියනවා නම් දකුණු ඉන්දීය සිනමාව වර්ණවත් කළ තලපති විජය නම් සුපිරි තරුව දේශපාලන කරළියද වර්ණවත් කරන බවට සියලු පෙරනිමිති පහළ කොට අවසානය.
ඉතින් ඇයි මේ රන්ජන් රාමනායකවත් තලපති විජයවත් මෙතැනදී සංසන්දනය කළේ?
ඒ ගැන හිතන අයට ඕනෑ දෙයක් හිතන්නට දෙන අතර, අපි ‘විජයගේ ඒමයි, රන්ජන්ගේ නෑමයි’ කියලා මේ සංගදියට සිරස්තලය හදමු.
මල්මි කෞෂල්යා
