අම්පාර දිස්ත්රික්කයේ සංවර්ධන ව්යාපෘති සහ ‘දිට්වා’ සුළි කුණාටුවෙන් පීඩාවට පත් ජන ජීවිතය යථා තත්ත්වයට පත් කිරීමේ වැඩසටහන්වල ප්රගතිය විමසා බැලීමේ විශේෂ සම්බන්ධීකරණ කමිටු රැස්වීම අද (22) පස්වරුවේ අම්පාර දිස්ත්රික් ලේකම් කාර්යාලයීය ශ්රවණාගාරයේදී පැවැත්විණි.Sri Lanka Latest News
මෙම රැස්වීමේදී දිස්ත්රික්කයේ ඉදිරි ප්රගතිය සහ පරිපාලන ව්යුහය සම්බන්ධයෙන් තීරණාත්මක කරුණු කිහිපයක් පිළිබඳව අවධානය යොමු විය.
ඉතිහාසයේ වැඩිම ප්රතිපාදන අයවැයෙන්
අම්පාර දිස්ත්රික්කයේ සංවර්ධන කටයුතු වෙනුවෙන් මෙතෙක් වෙන් කරන ලද වැඩිම මුදල වන රුපියල් මිලියන 22,000ක ප්රතිපාදන 2026 අයවැය මඟින් වෙන් කර ඇත. ඒ යටතේ ක්රියාත්මක වන මාර්ග, වාරිමාර්ග, පානීය ජල සහ නිවාස ව්යාපෘතිවල ප්රගතිය මෙහිදී දීර්ඝ ලෙස සමාලෝචනයට ලක් කෙරිණි. වෙන් කර ඇති මෙම ප්රතිපාදන 2026 මූල්ය වර්ෂය තුළදීම නිසි පරිදි යොදවමින් ජනතාවට කඩිනමින් එහි ප්රතිලාභ ලබා දීම රාජ්ය නිලධාරීන් සතු පැහැර හැරිය නොහැකි වගකීමක් බව මෙහිදී අවධාරණය කෙරිණි.
ඉඩම් කොල්ලයට එරෙහිව දැඩි පියවර
දේශපාලන බලය අනිසි ලෙස භාවිත කරමින් නැගෙනහිර පළාත තුළ සිදුවන අනවසර ඉඩම් අල්ලා ගැනීම් හේතුවෙන් මතුව ඇති බරපතළ ගැටලු පිළිබඳව මෙහිදී විශේෂ අවධානයක් යොමු විය. ඒ අනුව, නැගෙනහිර පළාතේ ඉඩම් සුරක්ෂිත කිරීම වෙනුවෙන් නියෝජ්ය පොලිස්පතිවරයාගේ (DIG) ප්රධානත්වයෙන් යුත් විශේෂ කමිටුවක් පත් කිරීමට කටයුතු කරන බව රැස්වීමේදී ප්රකාශයට පත් කෙරිණි.
ගංවතුර සහ වෙරළ ඛාදනයට ස්ථීර විසඳුම්
සෑම වසරකම ගල්ඔය පිටාර ගැලීම හේතුවෙන් අවට ප්රදේශවල හටගන්නා ගංවතුර තත්ත්වයට ස්ථීර විසඳුමක් සෙවීම සඳහා කඩිනම් අධ්යයනයක් සිදු කරන ලෙස අදාළ අංශවලට උපදෙස් දෙන ලදී. මීට අමතරව, සමුද්ර ඛාදනයෙන් දැඩි ලෙස බැටකන නැගෙනහිර වෙරළ තීරය ආරක්ෂා කර ගනිමින්, සංචාරක කර්මාන්තය ප්රවර්ධනය කිරීම සඳහා වන නිසි සැලැස්මක් කඩිනමින් සකස් කරන ලෙසද මෙහිදී නියෝග කෙරිණි.
“පරිපාලන ව්යුහය ජාතීන් අනුව බෙදිය යුතු නැහැ”
රැස්වීම අමතමින් වැඩිදුරටත් පෙන්වා දුන්නේ ප්රාදේශීය ලේකම් කොට්ඨාස සහ අධ්යාපන කලාප වැනි රාජ්ය පරිපාලන ව්යුහයන් ජාතීන් හෝ ආගම් පදනම් කර ගනිමින් වෙන් නොකළ යුතු බවයි. එවැනි ව්යුහයන් වෙන් කිරීමේදී භූමියේ විශාලත්වය සහ ජනගහනය වැනි පොදු නිර්ණායකයන් මත පමණක් පදනම් විය යුතු බව මෙහිදී ප්රතිපත්තිමය වශයෙන් අවධාරණය කෙරිණි.
