පුතා මියයෑමෙන් පසු ලේලියගේ නමට තිබූ මෝටර් රථයක් ව්යාජ ලෙස මාමාගේ නමට පවරානෙ ඇති බව කියන සිද්ධියකට අදාළ ලිපිගොනුවක් මෝටර් රථ ප්රවාහන කොමසාරිස් කාර්යාලයේදී අස්ථානගත වීම පිළිබඳ අපරාධ පරීක්ෂණ දෙපාර්තමේන්තුවට පැමිණිලි කරන ලෙස කරන ලද අධිකරණ නියෝගයක් පැහැර හැර ඇති බවට විවෘත අධිකරණයේදී අනාවරණය වීම හේතුවෙන් ඒ පිළිබඳ කරුණු දැක්වීම සඳහා මෝටර් රථ ප්රවාහන කොමසාරිස්වරයාට අධිකරණය ඉදිරියේ පෙනීසිටින්නැයි පෞද්ගලිකව දක්වන ලෙස ගම්පහ කොට්ඨාස විශේෂ අපරාධ විමර්ශන (වංචා විමර්ශන) ඒකකයේ ස්ථානාධිපතිවරයාට අත්තනගල්ල අංක 02 මහෙස්ත්රාත් මංජුල කරුණාරත්න මහතා පසුගිය 30 වැනිදා පස්වරුවේ නියෝග කළේය. Sri Lanka Latest News
වේගයන්ගොඩ ප්රදේශයේ පදිංචිව සිටි ප්රසිද්ධ ව්යාපාරිකයකුගේ විවාහක පුතකු වසර කිහිපයකට පෙර හදිසි රෝගී තත්ත්වයක් හේතුවෙන් මියයෑමෙන් පසු ඔහුගේ බිරියගේ නමට තිබූ මෝටර් රථයක් මියගිය පුද්ගලයාගේ පියාගේ නමට ව්යාජ ලේඛන පවරාගෙන ඇති බවට ගම්පහ කොට්ඨාස විශේෂ අපරාධ විමර්ශන ඒකකය මගින් අධිකරණයට පැමිණිල්ලක් ගොනුකර ඇත.
එම පැමිණිල්ල යළි පෙරේරදා (30) පස්වරුවේ කැඳවූ අවස්ථාවේ ඇප මත මුදාහැර සිටින මියගොස් ඇති තැනැත්තාගේ පියා හා මව සැකකරු හා සැකකාරිය අධිකරණ්ය ඉදිරියේ පෙනීසිටියහ.
මෙහිදී ගම්පහ කොට්ඨාස විශේෂ අපරාධ විමර්ශන ඒකකයේ පොලිස් සැරයන් එස්.ඒ.ඇස්.එල්. ගුණසේකර මහතා කරුණු දක්වමින් ප්රශ්නගත මෝටර් රථයට අදාළ ලිපි ගොනුව මෝටර් රථ ප්රවාහන කොමසාරිස් කාර්යාලයෙන් අස්ථානගත වී ඇති බවට එහි නිලධාරිනියක් අවස්ථා කිහිපයක්ම අධිකරණය ඉදිරියට පැමිණ ප්රකාශ කළ බව කියා සිටියේය.
මේ අනුව පෙර නඩු දිනයේදී ඒ පිළිබඳ අපරාධ පරීක්ෂණ දෙපාර්තමේන්තුවට පැමිණිලි කරන ලෙස මෝටර් රථ ප්රවාහන කොමසාරිස්වරයාට අධීකරණය නියෝග කර තිබියදී මෝටර් රථ ප්රවාහන කොමසාරිස්වරයා එය පැහැරහැර ඇති බැවින් ඒ පිළිබඳ සුදුසු නියෝගයක් කරන මෙන්ද පොලිස් සැරයන්වරයා වැඩිදුරටත් කරුණු දක්වමින් ඉල්ලා සිටියේය.
මෙයට පෙරද මෝටර් රථ ප්රවාහන කොමසාරිස්වරයාට අධිකරණය ඉදිරියේ පෙනීසිටින ලෙසට නියෝග කර තිබූ නමුත් ඔහු නොපැමිණ වෙනත් නිලධාරීන් එවන ලද බවද පොලිස් සැරයන්වරයා කීය. මෙහිදී පොලිසියේ කරුණු දැක්වීම් සලකා බැලූ මහෙස්ත්රාත්වරයා ඊළඟ දිනයේ මෝටර් රථ ප්රවාහන කොමසාරිස්වරයාට අනිවාර්යයෙන්ම අධිකරණය ඉදිරියේ පෙනීසිටින ලෙස ගම්පහ කොට්ඨාස විශේෂ අපරාධ විමර්ශන ඒකකයේ ස්ථානාධිපතිවරයා මගින් පෞද්ගලිකවම දක්වන ලෙසට නියෝග කළේය. නැවත කැඳවීම නොවැම්බර් මස 18 වැනිදාට කල්තැබිණි.
ගම්පහ කොට්ඨාස විශේෂ අපරාධ විමර්ශන ඒකකයේ පොලිස් සැරයන් එස්.ඒ.එස්.එල්. ගුණසේකර මහතා පැමිණිල්ල මෙහෙයවීය.
