ආසියානු සංවර්ධන බැංකුව මගින් තායිලන්තයේ සංවිධානය කළ වැඩමුළුවකට අදාළව රුපියල් ලක්ෂ 24කට අධික මුදලක් අවභාවිත කළ බවට එල්ල වී තිබූ චෝදනාවලින් ශ්රී ලංකා වාණිජ හා කර්මාන්ත මණ්ඩල සම්මේලනයේ හිටපු මහලේකම් සමන්ත බණ්ඩාර අබේවික්රම මහතා නිදොස් කොට නිදහස් කිරීමට කොළඹ මහාධිකරණ විනිසුරු ලංකා ජයරත්න මහත්මිය නියෝග කළාය.Sri Lanka Latest News
2007 වසරේදී සිදුවූ බව කියන මෙම සිදුවීම සම්බන්ධයෙන් රුපියල් 2,478,551ක මුදලක් සාපරාධී ලෙස පෞද්ගලික පරිහරණයට යොදාගත් බවට නීතිපතිවරයා විසින් අධිචෝදනා ගොනු කර තිබුණද, දීර්ඝ නඩු විභාගයකින් අනතුරුව විනිසුරුවරිය පෙන්වා දුන්නේ විත්තිකරු එම මුදල් සිය පෞද්ගලික අවශ්යතා සඳහා යොදාගත් බවට වන චෝදනා සාධාරණ සැකයකින් තොරව ඔප්පු කිරීමට පැමිණිල්ල අපොහොසත් වී ඇති බවයි.
අදාළ ගමනේදී සිදුකළ වියදම් තායිලන්ත සමුළුවට අදාළ නොවන බව ඔප්පු කිරීමට පැමිණිල්ල පාර්ශ්වය කිසිදු ලේඛනයක් ඉදිරිපත් කර නොමැති අතර, සාක්ෂි දුන් කිසිදු පාර්ශ්වයක් විත්තිකරු විසින් එම මුදල් සාපරාධී ලෙස පරිහරණය කළ බව තහවුරු කිරීමට සමත් වී නොමැති බවද තීන්දුවේ සඳහන් විය.
විශේෂයෙන්ම මෙම මුදල් අවභාවිතය පිළිබඳව මුලින්ම කරුණු අනාවරණය කරගත් බව කියන එවකට මණ්ඩලයේ සභාපති නන්දකුමාර මහතා සාක්ෂි දීම සඳහා කැඳවා නොතිබීම පිළිබඳව අධිකරණය සිය දැඩි සැකය මතු කළ අතර එය විත්තිකරු නිදහස් කිරීමට එක් හේතුවක් විය.
2009 වසරේදී වංචා විමර්ශන කාර්යාංශය වෙත කරන ලද පැමිණිල්ලක් මත ආරම්භ වූ මෙම නඩු විභාගයේදී සාක්ෂිකරුවන් හය දෙනෙකු සාක්ෂි ලබා දී තිබුණද ඔවුන් කිසිවෙකුටත් චෝදනා සනාථ කිරීමට නොහැකි වී තිබේ.
ඒ අනුව වසර 18ක් පුරා ඇදුණු මෙම නඩුවෙන් විත්තිකරු පූර්ණ ලෙස නිදහස් කිරීමට මහාධිකරණය නියෝග කළ අතර විත්තිකරු වෙනුවෙන් නීතිඥ සුගත් හෙට්ටිආරච්චි මහතා සහ නීතිඥ ඉනෝකා සෙනෙවිරත්න මහත්මිය පෙනී සිටියහ.
