හදිසි නීතිය ඉවත් කර ආපදා කළමනාකරණ පනතට අනුගතව කටයුතු කරන ලෙස ඉල්ලා සමගි ජන බලවේගයේ මහලේකම් රංජිත් මද්දුමබණ්ඩාර මහතාගේ අස්සනින් යුතුව නිවේදනයක් නිකුත් කර තිබේ.
මෙම තත්ත්වය තුළ සැබෑ ලෙසම මහජන ආරක්ෂක ආඥා පනත ප්රකාරව හා ඒ යටතේ හදිසි තත්ත්වයක් ප්රකාශයට පත්කොට නොමැති අතර, මෙම ප්රකාශයට පත් කිරීම පුරවැසියන්ගේ මූලික අයිතිවාසිකම් තවදුරටත් සාවද්ය ලෙස සීමා කිරීමේ හා තවදුරටත් ඒකාධිපතිවාදය කරා ගමන් කිරීමේ යටි අදහස සහිතව සිදුකොට ඇත්තේ යන කරුණ ද අපගේ දැඩි සැලකිල්ලට ලක්ව ඇති බව සමගි ජන බලවේගය නිකුත් කළ නිවේදනයේ දැක්වේ.
හදිසි නීතිය ඉවත් කොට ආපදා කළමනාකරණ පනතට අනුගතව කටයුතු කරනු.
2021 අගෝස්තු මස 30 දිනැති අංක 2243/01 දරන අතිවිශේෂ ගැසට් නිවේදනය මගින් අතිගරු ජනාධිපතිතුමන් විසින් කොවිඩ්-19 වසංගත තත්ත්වය පදනම් කරගනිමින් මහජන ආරක්ෂක ආඥාපනතේ 2වන කොටස ක්රියාත්මක කරමින් හදිසි තත්ත්වයක් ප්රකාශයට පත්කොට ඇති බවක් පෙනේ.
මහජන ආරක්ෂක ආඥාපනත යන නමින්ම පෙනීයන පරිදි, එහි විධිවිධාන වසංගත තත්ත්වයක් හේතුකොට ඇතිවූ වටපිටාවකට වඩා මහජන ආරක්ෂාවට සිදුවන තර්ජනයක් මගින් ඉස්මතු කරන්නාවූ තත්ත්වයකට වඩාත් උචිත වේ.
අනෙක් අතින් 2005 අංක 13 දරන ශ්රී ලංකා ආපදා කළමනාකරණ පනත සකස් කොට ඇත්තේ විශේෂයෙන් වසංගතයන්ද ඇතුළත් වන පරිදි අර්ථ නිරූපිත ආපදා තත්ත්වයන් සම්බන්ධයෙන් කටයුතු කරනු පිණිසය.
කෙසේ වුවද, (කොවිඩ්-19 තත්ත්වය ලෝක වසංගත තත්ත්වයක් බවට ලෝක සෞඛ්ය සංවිධානය විසින් ප්රකාශයට පත්කොට මාස 18කට ආසන්න කාලයක් ගතවී ඇති වටපිටාවක වුවද) ජනාධිපතිතුමා විසින් රටතුළ ආපදා තත්ත්වයක් පවත්නා බවට ශ්රී ලංකා ආපදා කළමනාකරණ පනත යටතේ ප්රකාශයක් සිදුකොට නොමැත.
ජනාධිපතිතුමා සභාපතිත්වය දැරිය යුතු වන්නාවූ ආපදා කළමනාකරණ ජාතික සභාව ස්ථාපනය කිරීම සඳහා වූ යාන්ත්රණයක් ශ්රී ලංකා ආපදා කළමනාකරණ පනත තුළ පවත්නා බවද අප හට පෙනී යන අතර, එයද පිහිටුවීමට ජනාධිපතිතුමා අපොහොසත්ව ඇත. එ් වෙනුවට ජනාධිපතිතුමා විසින් දැනට පවත්නා නීතිමය රාමුවෙන් පිටත ‘කාර්ය සාධක බලකායක්’ පිහිටුවීමේ මගක් ගෙන ඇත.
වසංගතයට මාස 18ක් ගතවන මොහොතේ, වසංගතය සම්බන්ධයෙන් විශේෂයෙන් කටයුතු කිරීම සඳහා අදාළ වන නීති ක්රියාත්මක කිරීමට රජය අපොහොසත්ව ඇති බවද අප විසින් නිරීක්ෂණය කර ඇත. අන් බොහෝ රටවල් විසින් මේ සඳහා විශේෂ නීති පනවා ක්රියාත්මක කොට ඇත.
මෙම තත්ත්වය තුළ, සැබෑ ලෙසම මහජන ආරක්ෂක ආඥාපනත ප්රකාර හා එ් යටතේ හදිසි තත්ත්වයක් ප්රකාශයට පත්කොට නොමැති අතර, මෙම ප්රකාශයට පත් කිරීම පුරවැසියන්ගේ මූලික අයිතිවාසිකම් තවදුරටත් සාවද්ය ලෙස සීමා කිරීමේ හා තවදුරටත් එ්කාධිපතිවාදය කරා ගමන් කිරීමේ යටි අදහස සහිතව සිදුකොට ඇත්තේය යන කරුණද අපගේ දැඩි සැලකිල්ලට ලක්ව ඇත.
ගැසට් නිවේදනය තුළ ජනතාව වෙත ලබාදෙන අත්යවශ්ය සේවා හා සම්පාදනයන් පවත්වාගෙන යාම සම්බන්ධයෙන්ද කරුණු දක්වනු ලබයි.
කෙසේ වුවද, මහජන ආරක්ෂක ආඥාපනත ප්රකාර සිදුකරනු ලබන ප්රකාශයක් තුළින් අත්යවශ්ය සේවාවන් හා සම්පාදනයන්ට බාධාවක් ඇති නොවන්නේය යන්න අපගේ නිරීක්ෂණය වේ.
නිසි කලට හා පාරදෘශ්ය ආකාරයකින් එන්නත්, පරීක්ෂණ කට්ටල හා ඖෂධද ලබාගැනීම ඇතුළත් අත්යවශ්ය ක්රියාමාර්ග ගැනීමට රජය අපොහොසත්ව ඇති බව නිරීක්ෂණය කරමු, ගොවි ජනතාව වෙත අති මහත් ලෙස පාඩු ඇති කරමින් ගොවි නිෂ්පාදන මිලදී ගැනීමට අවශ්ය පහසුකම් ලබාදීමට අපොහොසත්ව ඇති අතර, මහජනතාවට අත්යවශ්ය ආහාර ද්රව්යයන්හි මිල ඉහළ නැංවී ඇත.
මෙයට අතිරේක වශයෙන්, රජයේ වැරදි සහගත ආර්ථික ප්රතිපත්ති මගින් රාජ්ය ආදායම අහිමි කොට, විදේශ සංචිත පහත වැටෙන තත්ත්වයක් ඇති කොට ඇති අතර, එ් හේතුවෙන් එල්.පී. ගෑස් හා කිරිපිටි ඇතුළු බොහෝ වෙනත් අත්යවශ්ය සැපයුම්හි හිඟතාවයක් අතිකර ඇත.
මෙයට සමානව, රජයට අති විශාල පාඩු (හෝ ආදායම් අහිමි කිරීම්) ඇති කරමින් සීනි වැනි සෙසු අත්යවශ්ය භාණ්ඩයන්හි පිරිවැයද රජයේ දූෂිත ප්රතිපත්ති හේතුකොට ඉහළ ගොස් ඇත.
2003 අංක 9 දරන පරිභෝගික කටයුතු අධිකාරිය පනත ප්රකාර, උපරිම මිල නිර්දේශ කොට භාණ්ඩ රැස්කොට, ගබඩාකොට තබාගැනීම වළකාලීමේ ව්යවස්ථාපිත බලතල පවත්නා බවද සටහන් කරමු.
මෙලෙසින්, යම් අත්යවශ්ය සැපයුම් හා සේවාවනට බාධා ඇතිවී ඇත්තේ නම්, එවැන්නක් සිදුවී ඇත්තේ රජයේ අකාර්යක්ෂමතාවය හා අවකළමනාකරණය හේතුකොටගෙන විනා මහජන ආරක්ෂක ආඥාපනත යටතේ හදිසි තත්ත්වයක් ප්රකාශයට පත්කළ යුතුවන කැළඹිලි සහගත තත්ත්වයක් හේතුකොට නොවන බව නැවතද ප්රකාශ කරමු. එසේ ප්රකාශයට පත් කළේ යැයි පැවසෙන හදිසි අවස්ථාව අසද්භාවයෙන් හා පුරවැසියන්ගේ මූලික අයිතිවාසිකම් නොකඩවා සාවද්ය ලෙස සීමා කරමින් තවදුරටත් එ්කාධිපතිවාදය කරා ගමන් කිරීමේ යටි අදහසින්ම සිදුකොට ඇති බව නැවතද ප්රකාශ කරමු.
එසේ ප්රකාශයට පත් කළේ යැයි පැවසෙන හදිසි තත්ත්වය වහා අවලංගු කොට (පුරවැසියන්ගේ හිමිකම්ද සුරකින අතරම වසංගත තත්ත්වය සම්බන්ධයෙන්ද ඵලදායක ලෙස කටයුතු කළ හැකි තත්ත්වයක් සහතික කරන්නාවූ) වසංගත තත්ත්වයට අදාළ කටයුතු කිරීමේ විධිවිධාන ප්රකාශයට පත් කිරීමට පියවර ගන්නා ලෙසද, එ් අතරවාරයේ, අදාළ ක්ෂේත්රයන්හි ප්රවීණයන්ගේ උපදෙස් හා මාර්ගෝපදේශ ලබා ගනිමින් වසංගත තත්ත්වය සම්බන්ධයෙන් කටයුතු කිරීමට අවශ්ය පියවර ගනු සඳහා ආපදා කළමනාකරණ ජාතික සභාව පිහිටුවීමට ශ්රී ලංකා ආපදා කළමනාකරණ පනත ප්රකාර කටයුතු කරන ලෙසද අතිගරු ජනාධිපතිතුමාගෙන් ඉල්ලා සිටිමු.
රංජිත් මද්දුමබංඩාර (පා.ම.)
මහ ලේකම්
සමගි ජන බලවේගය
