ඇමැති කෙහෙළිය රඹුක්වැල්ල ඇතුළු විත්තිකරුවන් 12 දෙනකුට එරෙහිව කොළඹ ස්ථිර ත්රිපුද්ගල මහාධිකරණය හමුවේ ගොනුකරන ලද නඩුවේ විත්තිය වෙනුවෙන් පෙනී සිටින ජනාධිපති නීතිඥවරු දෙදෙෙනක් සිය සේවාදායකයන් වෙනුවෙන් තවදුරටත් පෙනී සිටිය නොහැකි බව පසුගියදා අධිකරණයට දැනුම් දුන්හ.Sri Lanka Latest News
එම නඩු විභාගයෙන් ඉවත්ව ඇත්තේ විත්තිය වෙනුවෙන් පෙනී සිටින ජනාධිපති නීතිඥ සරත් ජයමාන්න සහ ජනාධිපති නීතිඥ නලීන් ලද්දුවහෙට්ටි යන මහත්වරුය. ඔවුහු නඩුවේ 2 වැනි සහ 12 වැනි විත්තිකරුවන් වෙනුවෙන් පෙනී සිටියහ. මෙම නඩුව දිනපතා විභාගයට ගැනීමට අධිකරණය තීරණය කිරීම නිසා විත්තියේ නීතිඥවරු භාරගෙන ඇති අනෙකුත් නඩු සමඟ එම කාර්යයට සම්බන්ධ වීම අපහසු බැවින් ඉවත් වන බව ජනාධිපති නීතිනරු විවෘත අධිකරණයේ ප්රකාශ කළහ.
ඊයේ (08දා) මහාධිකරණ විනිසුරුවරුන් වන ප්රියන්ත ලියනගේ, විරාජ් මාලක වීරසූරිය, පී.එම්. බණ්ඩාර යන මහත්වරුන්ගෙන් සමන්විත කොළඹ ස්ථිර ත්රිපුද්ගල මහාධිකරණය ඉදිරියේ නඩුව කැඳවූ අවස්ථාවේ ජාතික ප්රසම්පාදන කොමිෂන් සභාවේ අධ්යක්ෂ (ප්රතිපත්ති) ප්රභාත් ඉන්දික ප්රසන්න මහතා විත්තියේ හරස් ප්රශ්නවලට පිළිතුරු දුන්නේය. ඔහුගේ සාක්ෂි විමසීම අවසන්වීමෙන් පසු අද (09දා) දින ශ්රී ලංකා රේගුවේ නියෝජිතයකු පැමිණිල්ල වෙනුවෙන් සාක්ෂි දීමට නියමිතය. හිටපු සෞඛ්ය ඇමැති කෙහෙළිය රඹුක්වැල්ලට අමතරව සැපයුම්කරු ලෙස ක්රියා කළ ‘අයුසුලේට් බයෝටෙක් ෆාර්මා’ සමාගමේ හිමිකරු වන සුදත් ජනක ප්රනාන්දු, වෛද්ය සැපයුම් අංශයේ හිටපු අධ්යක්ෂ වෛද්ය කපිල වික්රමනායක, වෛද්ය සැපයුම් අංශයේ හිටපු සහකාර අධ්යක්ෂ ශාන්ති සොලමන්, හිටපු ගණකාධිකාරී (සැපයුම්) නෙරාන් ධනංජය, හිටපු තොග පාලක සුජිත් කුමාර, සෞඛ්ය අමාත්යාංශයේ හිටපු ලේකම් ජනක ශ්රී චන්ද්රගුප්ත, වෛද්ය සැපයුම් ඒකකයේ නියෝජ්ය අධ්යක්ෂ ජනරාල් වෛද්ය එච්.එම්. ධර්මසිරි රත්නකුමාර හේරත්, හදිසි ප්රසම්පාදන ක්රියාවලියේ ප්රසම්පාදන කමිටු සාමාජික වෛද්ය ජයනාත් බුත්පිටිය, සෞඛ්ය අමාත්යාංශයේ හිටපු අතිරේක ලේකම් වෛද්ය සමන් රත්නායක සහ වෛද්ය සැපයුම් අංශයේ හිටපු අධ්යක්ෂවරයකු වන වෛද්ය ඒ. තුසිත සුදර්ශන නමැති තැනැත්තන් සෙසු වගඋත්තරකරුවන් වේ. එම විත්තිකරුවන්ට එරෙහිව 1982 අංක 12 දරන පොදු දේපළ පනතේ 5 (1) වගන්තිය යටතේ නඩු පැවරීම කර ඇත. ඖෂධ බව සඳහන් කර ඖෂධ නොවන දියර සෞඛ්ය අමාත්යාංශයේ වෛද්ය සැපයුම් අංශයට සැපයීම මඟින් සාපරාධී සාවද්ය පරිහරණය වරද සිදුකිරීමට කුමන්ත්රණය කිරීම, පළමු සැකකරු විසින් එම වරද සිදු කිරීම හා සෙසු සැකකරුවන් විසින් 2 වැනි සැකකරුට එම වරද සිදුකිරීමට අනුබල දීම ඇතුළු අධිචෝදනා 13ක් යටතේ චෝදනා ගොනුකිරීම සිදුකර තිබේ. හියුමන් ඉමියුනොග්ලොබින් සහ රිටොප්සිමැප් නමැති ඖෂධ නොවන වෙනත් ද්රව්ය කුප්පි 6, 195ක් සෞඛ්ය අමාත්යාංශයේ වෛද්ය සැපයුම් අංශයට සපයා ශ්රී ලංකා ජනරජයේ මුදල් රුපියල් ලක්ෂ 1444ක් වංක ලෙස ව්යපහරණය කිරීමට ඇතුළු චෝදනා යටතේ වගඋත්තරකරුවන්ට නඩු පැවරීම සිදුකර තිබේ. නියෝජ්ය සොලිසිටර් ජෙනරාල් ලක්මිණි ගිරිහාගම මහත්මිය නීතිපතිවරයා වෙනුවෙන් පැමිණිල්ල මෙහෙය වූවාය.
