මාර්ගගත සුරක්ෂිතභාවය පිළිබඳ පනත් කෙටුම්පත් සම්බන්ධයෙන් වූ පාර්ලිමේන්තු කාරකසභා අවස්ථාවේදී එම පනත් කෙටුම්පතේ ඇතැම් වගන්තීන් එම පනත් කෙටුම්පත සම්බන්ධයෙන් ගරු ශ්රේෂ්ඨාධිකරණය විසින් දෙන ලද තීන්දු හා තීරණවලට පටහැනිව සම්මත කර ගන්නා බවට විපක්ෂයේ මන්ත්රීවරුන් දැඩි විරෝධයක් ඉදිරිපත් කර සිටියදී එම විරෝධතා නොසලකා හරිමින් එකී ශ්රේෂ්ඨාධිකරණ තීන්දු තීරණවලට පටහැනිව ආණ්ඩු පක්ෂයට එම පනත් කෙටුම්පතේ යම් යම් වගන්තීන් සම්මත කරවා ගැනීමට ඉඩ ලබා දීමෙන් නිසා කතානායක මහින්ද යාපා අබේවර්ධන මහතා පාර්ලිමේන්තුවේ විශ්වාසයත් ආණ්ඩුක්රම ව්යවස්ථාවත් උල්ලංඝනය කර ඇති බව පවසමින් අද (26) සමගි ජන බලවේගය ප්රමුඛ සමගි ජන සන්ධානය කතානායකවරයාට විරුද්ධව විශ්වාසභංග යෝජනාවක් ගෙන ඒමට තීන්දු කරන ලදී.Sri Lanka Latest News
විපක්ෂ නායක සජිත් ප්රේමදාස මහතාගේ මූලිකත්වයෙන් මේ විශ්වාසභංග යෝජනාව ගෙන ඒම සඳහා සමගි ජන බලවේගය සහ සමගි ජන සන්ධානය නියෝජනය කරමින් පාර්ලිමේන්තු මන්ත්රී එම්. ඒ. සුමන්තිරන්, ලක්ෂ්මන් කිරිඇල්ල, ජී. ඇල්. පීරිස්, තිස්ස අත්තනායක, චන්දිම වීරක්කොඩි සහ ශාන් විජයලාල් ද සිල්වා මහතා ඇතුළු පිරිසක් අත්සන් කරන ලදී.
එම විශ්වාසභංග යෝජනාව තුළින් මාර්ගගත සුරක්ෂිතභාවය සම්බන්ධ පනත් කෙටුම්පතේ 13, 17, 20, 33 (6), 34 (1), 35 (1), 21, 22, 31 වගන්ති සම්බන්ධයෙන් ශ්රේෂ්ඨාධිකරණය විසින් ලබා දී ඇති යෝජනා නොසලකා කටයුතු කර ඇති බව මෙහි සඳහන් වේ. එසේම එම පනත් කෙටුම්පතේ ඇතැම් වගන්ති සම්මත කර ගැනීමේ දී ශ්රේෂ්ඨාධිකරණය විසින් ලබා දුන් තීරණ අනුව කටයුතු නොකර ඇති බවත් එසේ කටයුතු නොකිරීම නිසා දැනට එම පනත පවතින ආකාරයෙන් සම්මත කර ගැනීමට අවශ්ය ඡන්ද ප්රමාණයක් පාර්ලිමේන්තුවෙන් ලැබී ඇත්ද යන්න පිළිබඳ බලවත් ප්රශ්නයක් නැගී ඇති බවත් 2024.02.08 වැනි දින කතානායකවරයාට ලිපියක් යොමු කරමින් ශ්රී ලංකා මානව හිමිකම් කොමිෂන් සභාව ද සඳහන් කර තිබේ.
එසේම මෙම පනත තුන්වැනි වර කියැවීමේ දී විපක්ෂයේ ප්රධාන සංවිධායකවරයා විසින් පැහැදිලි බෙදීමක් ඉල්ලා සිටියත් එම ඉල්ලීමද නොසලකා හරිමින් ඡන්දයකින් තොරවම මෙය සම්මත කර ඇති බවත් මෙවැනි ගැටලු රාශියක් තිබියදී ඒ සම්බන්ධයෙන් ගැඹුරින් සලකා බලන තෙක් එම පනත් කෙටුම්පත නීතියක් වන ලෙස අත්සන් නොකරන ලෙස කතානායකවරයාගෙන් ඉල්ලා සිටියත් එම ඉල්ලීමද නොසලකා හරිමින් කටයුතු කර තිබීමත් මෙම විශ්වාසභංග යෝජනාව ගෙන ඒමට හේතු වී තිබේ.
කතානායකවරයා පක්ෂග්රාහීව කටයුතු කිරිම, පාර්ලිමේන්තු ස්ථාවර නියෝග සහ ආණ්ඩුක්රම ව්යවස්ථාව අමුඅමුවේම උල්ලංඝනය කිරීම, කතානායක ධුරයේ ස්වාධිනත්වය හා ගෞරවය කෙළෙසීම, විපක්ෂයේ මන්ත්රීවරුන්ගේ වරප්රසාද සහ අයිතිවාසිකම් කඩ කරමින් සිය වගකීම් පැහැර හැර ඇති බව පවසමින් මෙම යෝජනාව ඉදිරිපත් කර තිබේ.
අප රටේ ප්රජාතන්ත්රවාදී ක්රමවේදය තුළ විධායකය, ව්යවස්ථාදායකය සහ අධිකරණය යන ප්රධාන කුළුණු 3 ක්රියාත්මක වන බවත් අණපනත් සම්මත කර ගැනීම ව්යවස්ථාදායකය හරහා ක්රියාත්මක වන අතර එය නීත්යානුකූලව හා ව්යවස්ථානුකූලව ක්රියාත්මක කිරීම කතානායකවරයා ප්රමුඛ බලධාරීන් සතු වගකීමක් වුවත් මාර්ගගත සුරක්ෂිතතා පනත අද දවසේ නීතියක් බවට පත් වූයේ අනීතික ක්රමවේදයක් තුළ බව විපක්ෂ නායකවරයා පැවසීය.
එම කෙටුම්පත පිළිබඳ ශ්රේෂ්ඨාධිකරණය ලබා දුන් නිර්දේශ සහ යෝජනා මුළුමනින්ම බැහැර කොට මෙම පනත කතානායකවරයාගේ ප්රධානත්වයෙන් සම්මත වී ඔහු එයට අත්සන් තබා රටේ නීතියක් බවට පත් කර ඇත්තේ රටේ උත්තරීතර නීතිය වන ආණ්ඩුක්රම ව්යවස්ථාව උල්ලංඝනය කරමින් අනීතික ක්රමවේදයක් තුළ බවත් ඒ තුළින් කතානායකවරයා ආණ්ඩුක්රම ව්යවස්ථාව මෙන්ම පාර්ලිමේන්තු මන්ත්රීවරුන්ගේ වරප්රසාද පවා උල්ලංඝනය කර ඇති බවත් විපක්ෂ නායකවරයා පැවසීය.
කතානායකවරයා ආණ්ඩුක්රම ව්යවස්ථාවේ සඳහන්ව ඇති ආකාරයට උත්තරීතර නීතිය අනුගමනය කරමින් නිවැරදිව ක්රමවත්ව අණපනත් සම්මත කර ගැනීම සිදු කළ යුතු වුවත් එය ඔහු හිතාමතාම උල්ලංඝනය කර ඇති බවත් එම නිසා මාර්ගගත සුරක්ෂිතතා පනත සම්මත කර ගැනීමේ ක්රියාවලිය තුළ කතානායකවරයාගේ ක්රියාකලාපය ගැන ඔහුට අප්රසාද පළ කරමින් ඔහු තුළ ඇති විශ්වාසය භංග වී ඇති බවත් විපක්ෂ නායකවරයා පැවසීය.
විපක්ෂ නායක සජිත් ප්රේමදාස මහතා මේ බව කියා සිටියේ අද කතානායක මහින්ද යාපා අබේවර්ධන මහතාට විරුද්ධව විශ්වාසභංග යෝජනාවක් අත්සන් කිරීමෙන් පසු මාධ්ය වෙත අදහස් පළ කරමිනි.
අවස්ථා ගණනාවකදී සභාගර්බය තුළ හා ඉන් පිටත මේ වැරදි දේ නිවැරදි කර ගන්නා ලෙස තමා ඇතුළු විපක්ෂයේ මන්ත්රීවරුන් යෝජනා ඉදිරිපත් කළත් ඔහු හිතාමතාම එම යෝජනා බැහැර කිරීම නිසා මෙවැනි විශ්වාසභංග යෝජනාවකට මුල පුරන බවත් මෙය ඊළඟ පක්ෂ නායක රැස්වීමේ දී සාකච්ඡාවට ලක් කරන බවත් ඉන් පසුව කඩිනමින් එය විවාදයට ගෙන ඔහුව තනතුරෙන් ඉවත් කිරිමට කටයුතු කරන බවත් විපක්ෂ නායකවරයා මෙහි දී පැවසීය.
