ඓතිහාසික ලෝක උරුම ගාල්ල කොටු පවුරේ පුරාවිද්යා ආරක්ෂිත කලාප තුළ පිහිටි ගාල්ල ක්රිකට් ක්රිඩාංගනය තුළ අනවසරයෙන් සිදුකරගෙන යන සංවර්ධන කටයුත්ත වහාම නතර කිරීමට පියවරගෙන ඇති අතර ඒ පිළිබද අවශ්ය නිතිමය කටයුතු කරන ලෙසට ගාල්ල දිස්ත්රික් පුරාවිද්යා අධ්යක්ෂිකාවට උපදෙස් ලබාදුන් බැව් පුරාවිද්යා අධ්යක්ෂ ජනරාල් මහාචාර්ය අනුර මනතුංග පැවසයි.
පුරාවිද්යා රක්ෂිතයක් තුළ පිහිටි පුද්ගලික ඉඩමක හෝ මෙවැනි සංවර්ධන කටයුත්තක් සිදුකරන්නේ පුරාවිද්යා දෙපාර්තමේන්තුවෙන් අවසර ලබාගෙන දෙපාර්තමේන්තුවේ අධික්ෂණය යටතේ බවද හෙතෙම පැවැසීය.
මෙම ක්රීඩාංගනය සම්බන්ධයෙන් යුනෙස්කෝව ලබාදුන් උපදෙස් ක්රියාත්මක නොවීම සම්බන්ධයෙන් මේ වන විට යළිත් පරීක්ෂණ පවත්වන මෙම අවස්ථාවේදී මෙවැන්නක් කිරීම බරපතළ ගැටලුවක් බවද පුරාවිද්යා කොමසාරිස්වරයා පවසයි.
ගාල්ල දිස්ත්රික් සහකාර පුරාවිද්යා අධ්යක්ෂිකා වසන්ති අලහකෝන්ගෙන් කළ විමසීමකදී ඇය පවසා සිටියේ මෙම සිද්ධිය දැනගත් වහාම නතර කරන ලෙසට දැන්වුවද ඔවුන් එය නොසලකා කටයුතු කළ බවත් පසුව පුරාවිද්යා අධ්යක්ෂ ජනරාල්වරයාගෙන් ලද උපදෙස් මත පොලිසියද මැදිහත් කොටගෙන මෙය නතර කළ බවත්ය.
මේ සම්බන්ධයෙන් ඉදිරි නීතිමය කටයුතු කිරීමට නීති අංශය දැනුවත් කරන බවත් මේ පිළිබඳ ගාල්ල නගර සභාවටත් නාගරික අධිකාරියත් ගාලු උරුමය පදනමත් අවශ්ය කටයුතු කිරීම සඳහා දැනුවත් කිරීමට කටයුතු කර ඇති බවත් ඇය වැඩිදුරටත් සඳහන් කළාය.
lankasara
