ජනාධිපති ධුරයේ සිට අරගලය හේතුවෙන් රටින් පලාගොස් නැවත ලංකාවට පැමිණි හිටපු ජනාධිපති ගෝඨාභය රාජපක්ෂ මහතා හට ආණ්ඩුව නවාතැන් ගැනීම සඳහා ලබාදුන්නේ කොළඹ බෞද්ධාලෝක මාවතේ ප්රධාන මාර්ගයට මුහුණලා ඉදිකර ඇති විශාල නිල නිවෙසකි. ඒ, ගෝඨාගේ පෞද්ගලික නිවෙස වූ මිරිහානේ පිහිටි නිවෙසෙහි ආරක්ෂක තත්ත්වය ප්රමාණවත් නොවන බවට ඒ වන විට ආරක්ෂක අංශ විසින් ලබාදී තිබූ වාර්තා මුල්කොට ගෙනය. ඒ අනුව ලංකාවට පැමිණි දින සිට ගෝඨා පදිංචිව සිටියේ බෞද්ධාලෝක මාවතේ පිහිටි මෙම නිවෙසේය.
නමුත් දින කිහිපයක් ගතවෙද්දීම ගෝඨාට මෙම නිවෙසේ වාසය කිරීම විශාල අවුලක් බවට පත්වූයේ නිරන්තරයෙන්ම ඇසෙන වාහනවල ශබ්දය සහ ඒවායේ නලා ශබ්දයය. නිහඬ ජීවිතයක් ගතකිරීමට ප්රිය ගෝඨාට එය දින කිහිපයක් ගතවෙද්දීම මහත් කන්දොස්කිරියාවක් බවට පත්ව තිබූ ආකාරයක් දැකගත හැකි විය. ඒ නිසාම ගෝඨා අවස්ථා ගණනාවකදීම මෙම නිල නිවෙස වෙනුවට වෙනත් නිල නිවෙසක් ලබාදෙන ලෙස වගකිව යුත්තන්ට දැනුම් දීමටද පියවර ගෙන තිබිණි.
මීට අමතරව ගෝඨාගේ අදහස වී තිබුණේ හිටපු ජනාධිපති මහින්ද වාසය කරන විජේරාම මාවතේ පිහිටි නිල නිවෙස අලුත්වැඩියා කර අවසන් වී ඇති බැවින් මහින්ද එහි පදිංචියට ආ පසු එතෙක් ඔහු රැඳී සිටි බුලර්ස් පාරේ නිල නිවෙසේ පදිංචියට යෑමටය. නමුත් විවිධ හේතු මත එම නිල නිවෙසද ගෝඨාට ලැබෙන පාටක් දැකගන්නට ලැබුණේ නැත. එම තත්ත්වය යටතේ පසුගිය සතියේදී ගෝඨා එක් විශේෂ තීන්දුවක් ගත්තේය. ඒ, තමාට හුරුපුරුදු තමාගේ පෞද්ගලික නිවෙස වූ මිරිහානේ නිවෙසේ පදිංචියට යෑමටය. ඒ අනුව ගෝඨා මේ වන විට පදිංචිව සිටින්නේ නිහඬ නිසංසල පරිසරයක පිහිටි මිරිහානේ සිය පෞද්ගලික නිවෙසේය.
