2018 වසරේ පැවති පලාත් පාලන මැතිවරණය සදහා ඉදිරිපත් කරන ලද වියදම් ඇස්තමේන්තුවට සාපේක්ෂව මාර්තු 09 පැවැත්වීමට අදාල මැතිවරණය සදහා පොලිසිය විසින් ඉදිරිපත් කර තිබෙන වියදම් ඇස්තමේන්තුව ඉතා ඉහළ අගයක් ගෙන ඇති බවත්, එය තුන්ගුණයකින් ඉහළ නංවා ඇති බවත් සන්ඩේ ටයිම්ස් පුවත්පත සිය මුල්පුවතෙන් වාර්තා කරයි.
මේ සම්බන්ධයෙන් මැතිවරණ කොමිසම මහා භාණ්ඩාගාරයට පැමිණිලි කිරීමට නියමිත බව පැවසේ.
මාර්තු නමය මැතිවරණය සදහා ඇස්තමේන්තුගත වියදම ලෙස පොලිස් දෙපාර්තමේන්තුව ඉදිරිපත් කර තිබෙන මුදල රුපියල් බිලියන 2.8 ක් බව පැවසේ.
දීමනා, ඉන්දන වියදම්, වාහන කුළියට ලබා ගැනීම, දුරකථන හා අනෙකුත් සන්නිවේදන පහසුකම් ලබා ගැනීම වැනි දෑ සදහා මෙවර පොලිස් දෙපාර්තමේන්තුව ඉදිරිපත් කර තිබෙන වියදම් ඇස්තමේන්තුව පසුගිය මැතිවරණය සදහා ඉදිරිපත් කර තිබෙන ඇස්තමේන්තුව මෙන් හය ගුණයකින් ඉහළ ගොස් ඇති බව පැවසේ.
වාහන කුලියට ගැනීමේ පිරිවැය මිලියන 138 සිට මිලියන 745 දක්වා ඉහළ ගොස් තිබේ. ඉන්ධන වියදම රුපියල් මිලියන 108 සිට 675 දක්වා වැඩි වී තිබේ.
අදාල සේවා සදහා යනු ඇතැයි අපේක්ෂිත වියදම් සම්බන්ධයෙන් මැතිවරණ කොමිසන් සභාව වෙනම වියදම් ඇස්තමේන්තුවක් සකස් කර තිබෙන බවත් ඒ හා සසදා බැලීමේ දී පොලිස් දෙපාර්තමේන්තුව විසින් එවා තිබෙන ඇස්තමේන්තුව ඇදහිය නොහැකි බවත් මැතිවරණ කොමිසම චෝදනා කරයි.
