අග්රාමාත්ය රනිල් වික්රමසිංහ මහතා ආණ්ඩුක්රම ව්යවස්ථා සහ මැතිවරණ ප්රතිසංස්කරණ වෙනුවට ආර්ථිකය ගොඩදැමීම කෙරෙහි අවධානය යොමු කළ යුතු බව ශ්රී ලංකා පොදුජන පෙරමුණේ පාර්ලිමේන්තු මන්ත්රී රියර් අද්මිරාල් (විශ්රාමික) සරත් වීරසේකර මහතා ‘අයිලන්ඩ්’ පුවත්පතට ප්රකාශයක් ලබා දී තිබේ.
ආර්ථිකය කඩාවැටී තිබියදී 22 වැනි සංශෝධනය ගෙන ඒම සඳහා අනවශ්ය කඩිමුඩියක් තිබීම ගැනද හිටපු මහජන ආරක්ෂක අමාත්යවරයා එහිදී ප්රශ්න කොට ඇත.
කොළඹ දිස්ත්රික් මන්ත්රීවරයා එසේ පැවසුවේ ශ්රී ලංකාව බංකොලොත් රටක් ලෙස ජාත්යන්තර මූල්ය අරමුදල (IMF) සමඟ සාකච්ඡා කරන බවට අගමැති වික්රමසිංහ මහතා පසුගියදා අඟහරුවාදා (05) පාර්ලිමේන්තුවේදී ප්රකාශ කිරීමත් සමඟය.
අගමැතිවරයා සහ මුදල්, ආර්ථික ස්ථායීකරණ සහ ජාතික ප්රතිපත්ති අමාත්යවරයා වශයෙන් එජාප නායකයා වත්මන් අර්බුදයෙන් ප්රයෝජන ගනිමින් තම දේශපාලන න්යාය පත්රය ඉදිරියට ගෙන යන බවක් පෙනෙන්නට ඇතැයි වීරසේකර මහතා පැවසීය.
වීරසේකර කියා සිටියේ අගමැති වික්රමසිංහ රටේ ප්රමුඛතා සමඟ තම ප්රමුඛතා පටලවා නොගත යුතු බවයි.
වීරසේකර මහතා චෝදනා කළේ වික්රමසිංහ මහතා හිමිකම් ඔප්පු ලබාදීමේ මුවාවෙන් රජයේ ඉඩම් පෞද්ගලීකරණය කිරීමේ කුහක උත්සාහයක් ක්රියාත්මක කරමින් සිටින බවයි. MCC (Millennium Challenge Corporation) ගිවිසුමට එක්සත් ජනපදය සමඟ සම්බන්ධ වීමට යහපාලන රජය මීට පෙර දැරූ උත්සාහය පසුබිම් කර ගනිමින් රජයේ ඉඩම් ලබාදීම පිළිබඳව සොයා බැලිය යුතු බව පාර්ලිමේන්තු මන්ත්රී වීරසේකර මහතා පැවසීය.
ශ්රී ලංකා පොදුජන පෙරමුණේ ඉහළ නායකත්වයට මෙම කරුණු දැනුම් දුන්නේදැයි විමසූ පාර්ලිමේන්තු මන්ත්රී වීරසේකර මහතා අවධාරණය කළේ කුමන ප්රතිවිපාක පැමිණියද තමන් නිහඬව නොසිටින බවයි. ආණ්ඩුක්රම ව්යවස්ථා සහ මැතිවරණ ප්රතිසංස්කරණ ක්රියාත්මක කිරීම තමන් අතට ගෙන රජයේ ඉඩම් පෞද්ගලීකරණය කිරීමට යෝජනා කර ඇති බව ජනාධිපති ගෝඨාභය රාජපක්ෂ මහතාගේ සහ අගමැති වික්රමසිංහ මහතාගේ ප්රධානත්වයෙන් සඳුදා (04) පැවැති ආණ්ඩු පක්ෂ කණ්ඩායම් රැස්වීමේදී පවා වීරසේකර මන්ත්රීවරයා අනාවරණය කළේය.
පාර්ලිමේන්තු මන්ත්රී වීරසේකර මන්ත්රීවරයා කණ්ඩායම් රැස්වීමේදී පවසා ඇත්තේ වික්රමසිංහ මහතා අග්රාමාත්යවරයා ලෙස පත් කිරීමට විරුද්ධ වුවද, පත්කිරීම සිදු කළ පසු තමා එය පිළිගත් බවයි. වික්රමසිංහ මහතා ඉදිරියට නොගන්නා ලෙස ජනාධිපති ගෝඨාභය රාජපක්ෂ මහතාගෙන් ඉල්ලා සිටීමේ මට්ටමට තමා ගිය බව ප්රකාශ කළ වීරසේකර මන්ත්රීවරයා, කෙසේ වෙතත්, ආර්ථිකය නගා සිටුවීමට එජාප නායකයා දරන උත්සාහයට සහාය දැක්වීමට අවශ්ය බව පැවසීය. එහෙත්, ප්රශ්නය වූයේ වික්රමසිංහ මහතා ජාතික අවශ්යතාවලට පටහැනි දේශපාලන න්යාය පත්රයක් අනුගමනය කිරීම බවද හෙතෙම කියා සිටියේය.
තවත් ප්රශ්නයකට පිළිතුරු දෙමින් පාර්ලිමේන්තු මන්ත්රී වීරසේකර මහතා අවධාරණය කළේ රජය භාරකාරයා පමණක් වන නමුත් එහි හිමිකරු නොවන බැවින් කිසිදු තත්ත්වයක් යටතේ හෝ සින්නක්කර ඔප්පු ලබාදිය නොහැකි බවයි.
මෙම සාකච්ඡාවේදී පාර්ලිමේන්තු මන්ත්රී වීරසේකර මහතා පෙන්වා දුන්නේ ජනාධිපති නීතිඥ ආචාර්ය විජයදාස රාජපක්ෂ මහතා යහපාලන පාලන සමයේදී හිමිකම් ඔප්පු ලබාදීමේ පියවර ව්යර්ථ කිරීමට සමත් වූ බවයි.
